"ენერგო პრო ჯორჯიას" და საპარლამენტო უმრავლესობის ლიდერის, ოზურგეთის მაჟორიტარი დეპუტატის ზვიად კვაჭანტირაძის დაპირისპირება 2 იანვარს, მას შემდგ დაიწყო, რაც ოზურგეთის მუნიციპალიტეტის სოფლების უმრავლესობა და ქალაქის რამდენიმე უბანი უშუქოდ დარჩა _ თან ახალი წლის ღამეს.
_ ასობით აბონენტი ოზურგეთის მუნიციპალიტეტში (ძირითადად სოფლებში) უშუქოდ შეხვდა ახალ წელს. წარმოიდგინეთ? _ მესმის, დღეს ამის წარმოდგენა ძნელია, მაგრამ ფაქტია.
მართალია, ამ გაფუჭებულ საქმეზე მაქსიმალურად მოიკრიბეს ძალები და 70 %-ის აღდგენა მოხერხდა გუშინ 12 საათამდე, მაგრამ ამ წუთისთვის, ანუ , 2 იანვრის 01:05 ისთვის ისევ 3500 აბონენტია გამორთული. ფიზიკური მიზეზი??? _ ნუ იტყვით და თოვლი მოსულა.
სასაცილოა, სატირალი რომ არ იყოს. დეკემბერში თოვლი აბა არ უნდა მოვიდეს? _ ალბათ, "ენერგო პრო ჯორჯია" ახალ წელს თოვლს საერთოდ არ ელოდებოდა.
ჯერ კიდევ ოქტომბრის პირველ რიცხვებში ერთი ძალიან გამოცდილი კაცი მეძმარიშვილი გვაფრთხილებდა ყველას, მოემზადეთ ზამთრის სეზონისთვისო. ყველას დავუგზავნე მაშინ ეს გაფრთხილება. ეტყობა, ენერგო პრო ჯორჯიაში არც უნახავთ. ან ჩემი გაფრთხილება რათ უნდათ, რა, თავად არ იციან, რომ დამპალი ბოძები და სადენები, რომელთა მოვლა- პატრონობის და ზამთრისთვის მომზადების პირდაპირი ვალდებულება გააჩნიათ პრობლემებს შექმნიან თუ დროზე არ მიხედე?
ტარიფების მომატებაზე ხომ იზრუნეთ, ამ დროს გამრიცხველიანებასაც კი ვერ ახერხებთ!!! ერთ თეთრს ერთი დღით არავის პატიობთ და გინდათ თქვენმა აბონენტებმა გაპატიოთ ასეთი უპასუხისმგებლობა!
2 ღამეა ოზურგეთში მთელი ხელმძღვანელობა ფეხზე დგას, საკუთარ ოჯახებშიც არ მისულან, ხან ერთი ხაზის რემონტზე არიან, ხან მეორესი და ასობით საყვედურის მოსმენა უწევთ.
რატომ, თორემ კი? _ არ გაფრთხილებდნენ, არ გთხოვდნენ დროზე მიგეღოთ ზომები და ზამთრისთვის სარემონტოები ბოლომდე მიგეყვანათ? ხვალ 15 ბრიგადას აგზავნიან ოზურგეთში. აქამდე რომ გეზრუნათ არც ამ ბრიგადებს გაუმწარებდით ახალი წლის დღესასწაულებს.
არც კი იფიქროს ვინმემ თქვენი გამოქომაგება "ენერგო პრო ჯორჯია" !!!
რაც თქვენ ეს ორი დღეა თქვენი უპასუხისმგებლობით ხალხს და ჩვენს ხელისუფლებას გვავნეთ, ამას ასე მარტივად არ გადაგატანინებთ. პასუხს მოგთხოვთ მთელი სიმკაცრით! _ ეს სტატუსი ზვიად კვაჭანტირაძემ ფეისბუქის საკუთარ გვერდზე 2 იანავვრს გამოაქვეყნა.
ოზურგეთის მაჟორიტარ დეპუტატს "ენერგო პრო ჯორჯიას" გენერალურმა დირექტორმა მიხეილ ბოცვაძემ "ქრონიკის" ეთერში კი გუშინ უპასუხა:
_ ფეისბუქ პოსტი 4 დღის წინ გავრცელდა და ჩვენ ამ დრომდე არ გაგვიცია პასუხი, მაგრამ როცა ეს ცენტრალური ტელევიზიებით შუქდება, ჩვენ ვუპასუხებთ და ვიტყვით, რომ სრული მობილიზაცია იყო და სრული პასუხისმგებლობით მოეკიდა კომპანია მოსალოდნელ სტიქიას.
მობილიზება იყო უპრეცენდენტო, მათ შორის ოზურგეთში. პიკზე იყო გათიშული 4000 აბონენტი და უშუქოდ ახალ წელს შეხვდა 300 აბონენტი დაახლოებით. ამის სანაცვლოდ ყველა სოფელი, ყველა ავარია ფეხით გვაქვს შემოვლილი ყველას.
ვერ მივიღებთ ვერანაირ ბრალდებას. ჩვენი 1200 თანამშრომლის ლანძღვას, რომლებიც ახლაც ბოძებზე არიან ასულნი და სტიქიას ებრძიან უპასუხოდ ვერ დავტოვებთ. შეიქმნას კომისია, შევხდეთ და განვიხილოთ ყველა ჩატარებული ღონისძიება.
ბრალდებები, რომელიც არსებობს ნამდვილად განსახილველია. სტიქიის დროს უნდა დაზიანდეს თუ არა საყრდენი, ხაზები, თუ ეს არის კითხვა, გიპასუხებთ, რომ დიახ, უნდა დაზიანდეს.
როდესაც სახლები ინგრევა, აეროპორტები იკეტება, უნდა დაზიანდეს.
არცერთ ქვეყანაში არ ხდება ისე რომ სტიქის დროს სიცოცხლის რისკის ფასად მომუშავე კოლექტივს თავს ესხმოდნენ. ჯერ ხდება ამ პროცესების დასრულება და მერე განხილვა.
ყველაფერზე მზად ვართ პასუხი გავცეთ. თბილისიდან შესაძლოა ძალიან მარტივად ჩანს, გარწმუნებთ ყველა სოფელში ვიყავით, ადგილზე მყოფმა ადამიანებმა ნახეს ჩვენი მობილიზება, _ განაცხადა მიხეილ ბოცვაძემ.
ბოცვაძის ამ კომენტარს ისევ სოციალურ ქსელში უპასუხა ზვიად კვაჭანტირაძემ:
_ კარგია, რომ რაღაც პასუხი მაინც მივიღეთ. ყოველშემთხვევაში, ცინიკური პასუხი მაინც არაა. რა თქმა უნდა, ყველაფერს დეტალურად განვიხილავთ. კრიტიკა და არა ლანძღვა "ე.პ.ჯ" – ს ხელმძღვანელობას ეხება და არა კომპანიის სხვა, მითუმეტეს რიგით თანამშრომლებს, რომელთა თავგადადებულ შრომაზე მე იმავე პოსტში ავღნიშნე.
არაა ლამაზი ასეთი ტყუილების ტირაჟირება და დაუზუსტებელი ციფრების მოყვანა, ვინ როდის იყო გათიშული და რამდენი ხნით.
სტიქია რაა ყველას გვესმის. როგორ მოამზადეთ სისტემა ზამთრისთვის და სხვა ვალდებულებებს როგორ ასრულებს "ე.პ.ჯ" ამაზე ერთად სერიოზული მსჯელობა და თქვენ კი გადაწყვეტილებების მიღება მოგიწევთ.
ჩვენი კრიტიკა ხომ სწორედ ამას ეხება და არა იმ შრომას, რასაც თქვენ 31 დეკემბრიდან დღემდე ეწევით? ფაქტი სახეზეა, ენერგო პრო ჯორჯიას მონოპოლიური სისტემა ზამთარს სათანადოდ მომზადებული ვერ შეხვდა და მოსახლეობის, აბონენტების დიდი ნაწილი, ათასობით ოჯახი, კონკრეტულად გურიაში ძალიან უკმაყოფილოა.
სხვათაშორის, გათიშვები კონკრეტულად ოზურგეთში სხვა დროსაც არაა იშვითობა. ამაზე, ყველაფერზე სერიოზული საუბარი მოგვიწევს მალე, _ წერს კვაჭანტირაძე.
