გურიის რეგიონის სამივე მუნიციპალიტეტის, ოზურგეთის, ლანჩხუთის და ჩოხატაურის სოფლებში არსებული საექიმო ამბულატორიები, 1 აპრილიდან კერძო კომპანიის შპს “მედალფას” დაქვემდებარებაში გადავა. ეს ინფორმაცია “გურია ნიუსს” შპს “მედალფას” გენერალურმა დირექტორმა ზაზა ჯაფარიძემ და მისმა მოადგილემ ლევან ანთაძემ დაუდასტურეს. მათი განცხადებით, გურიაში მოქმედი ყველა სამედიცინო დაწესებულება სახელმწიფომ მართვაში კერძო კომპანიას გადასცა და ამ კომპანიამაც სახელმწიფოს წინაშე აიღო ვალდებულება.
აღნიშნულმა ცვლილებამ, გურიის რეგიონის სამივე მუნიციპალიტეტის სოფლების ამბულატორიებში მომუშავე ფიზიკური პირების უკმაყოფილება გამოიწვია. ცვლილების შესახებ სოფლის ექიმებს შპს “მედალფას” გენერალურმა დირექტორმა ზაზა ჯაფარიძემ განუცხადა. თუმცა მედიცინის მუშაკებმა ხელშეკრულებებს ხელი არ მოაწერეს, უფრო მეტიც, გაფიცვის მოწყობა გადაწყვიტეს იმ მიზეზით, რომ ხელფასი ნაკლები ექნებოდათ და ყველაზე დაზარალებული ამ შემთხვევაში ექთნები დარჩებოდნენ. თუმცა, იმ დღეს სიტუაციის განმუხტვას გურიის გუბერნატორი ვალერი ჩიტაიშვილი ცდილობდა. ლევან ანთაძის თქმით, გუბერნატორმა ექიმებს და ექთნებს შეპირდა, (?) რომ სიტუაციაში გაერკვეოდა და მათ ხელფასები არ მოაკლდებოდათ.
“გურია ნიუსს” არაერთი განაწყენებული ექიმი და ექთანი ესაუბრა:
_არ ვიცით, რა ხდება, თუმცა გვითხრეს, რომ ჯერ გადაწყვეტილი არაფერი არისო. ჩამოსული იყვნენ შპს “მედალფას” მმართველები და ასე გვითხრეს, პირველი აპრილიდან თქვენ დაექვემდებარებით “შპს მედალფას”და იქნებით ჩვენი პირადი თანამშრომლებიო. ოზურგეთის მუნიციპალიტეტის სოფლების ექიმები 2 საათზე ვიყავით დაბარებული. დილით იყვნენ ლანჩხუთის მუნიციპალიტეტის და ჩოხატაურის წარმომადგენლები. იყო გუბერნატორიც. ჯერჯერობით, ვართ ადგილზე და ველოდებით რას დაგვირეკავენ, _გვითხრეს ექიმებმა.
_გადავყავართ მათ დაქვემდებარებაში, ექთნების ხელფასი მცირდება, კარგს არაფერს ველოდებით. ჯერჯერობით, მხოლოდ დაპირების იმედად ვართ და არ ვიცით, რა იქნება, _გვითხრეს ექთნებმა.
ალეკო თავბერიძე, ოზურგეთის მუნიციპალიტეტის ნარუჯის ექიმი: სოფლის ამბულატორიები _ ჯანდაცვის ეს რგოლი სამართავად გადასცეს კერძო კომპანიას. ამან გამოიწვია ის, რომ შპს “მედალფამ” განაცხადა, ფინანსები, რომელსაც ამბულატორიებისთვის გვირიცხავენ, შესაძლებლობა არ გვაქვს, აქედან მოგცეთ ხელფასიო. “მედალფამ” ის თანხაც შეგვიმცირა, რომელსაც სადაზღვევო კომპანიები გვიხდიდნენ გარკვეული რაოდენობით. თავიდან იყო 60 თეთრი, მერე 48 თეთრამდე შეამცირეს, ბოლოს 12 თეთრი იყო და ახლა საერთოდ გააუქმა. ჩვენ ვუთხარით, რომ არ მოგვწონს ეს პირობები.
_არც ჩვენ გვინდოდა ის, რაც მოხდა, მაგრამ დაგვავალეს და რა ვქნათო, ჩვენ კერძო სტრუქტურა ვართ და მეტს ვერაფერს შემოგთავაზებთო, _ გვითხრეს.
_ბატონო ალეკო, ვინ გითხრათ ეს?
_ეს სიტყვები, ჩვენთან შეხვედრისას, ზაზა ჯაფარიძემ თქვა. რატომ დარჩა ასე ჰაერში გამოკიდებული სოფლის ამბულატორიები? ყველა ქვეყანაში ძირითადი აქცენტი სოფლის ამბულატორიებზეა გადატანილი. ასე კვალიფიციური დახმარება ეწევა პაციენტს. ეს პირველი რგოლი ჩვენთან მოიქნიეს. ვერ გეტყვით, რატომ. გეკითხებით, პასუხი ვინ უნდა გაგვცეს? ამასთან დაკავშირებით გაფიცვის მოწყობაც გადაწყვიტეს. გუშინ ახალი ხელშეკრულებების ხელმოწერა უნდა მომხდარიყო, “მედალფასთან” შეერთების გამო და ამ ყველაფერმა აღშფოთება გამოიწვია. ექიმებმა და ექთნებმა არ მოაწერეს ხელი. ბატონი გუბერნატორიც იქ იყო, რომელმაც განაცხადა, დაწყნარდით, გვადროვეთ და ყველაფერს გავარკვევთო.
_ბატონო ალეკო, თქვენი აზრით, მოაწერენ თუ არა ექიმები ხელს ახალ ხელშეკრულებას?
_როგორც გითხარით, ხელი არავის მოუწერია. ჯერ არავინ შეგვხმიანებია, ველოდებით, რა იქნება, წინაწარ ვერაფერს გეტყვით.
აღნიშნულ საკითხთან დაკავშირებით, “გურია ნიუსმა” რამდენჯერმე სცადა ვალერი ჩიტაიშვილთან დაკავშირება, თუმცა ჩვენს სატელეფონო ზარებს გუბერნატორმა არ უპასუხა.
“გურია ნიუსი” ასევე დაუკავშირდა სადაზღვევო კომპანია “ალფას” და ჯანდაცვის სამინისტროს პრესსამსახურებს, რომლებმაც ჩვენს კითხვებს მოუსმინეს და გვითხრეს, რომ სიტუაციაში გაერკვეოდნენ და მოგვიანებით დაგვირეკავდნენ. თუმცა ისინი არ შეგვეხმიანნენ და არც ჩვენს სატელეფონო ზარებს აღარ უპასუხეს.
შპს “მედალფას” გენერალური დირექტორი ზაზა ჯაფარიძე “გურია ნიუსთან” საუბარში აღნიშნავს, რომ ყველაფერი დარჩება ისე, როგორც იყო.
_ყველაფერი არის ისე, როგორც იყო, ოღონდ მართვაში გადმოეცა კერძო კომპანიას. ცნობილია, რომ კერძო კომპანია უკეთ მართავს სტრუქტურას, ვიდრე სახელმწიფო.
_ანუ, ბატონო ზაზა, თქვენ უკეთესი მენეჯმენტი გაქვთ, ვიდრე სახელმწიფოს?
_რა თქმა უნდა. აბა რატომ გადმოგვეცა სასწრაფო? იმიტომ, რომ მენეჯმენტს უკეთესად აწარმოებს კერძო კომპანიები. ამას კი არ ვიგონებ, ეს არის ცნობილი ფაქტი. ასე ხდება ბევრ სფეროში.
_ბატონო ზაზა, მაშინ რატომ აპროტესტებენ ექიმები და ექთნები ამ გადაწყვეტილებას? თქვენი აზრით, მათ არ იციან, კერძო კომპანიაში უკეთესი პირობები არის თუ არა? მედიკოსებმა ხელი არ მოაწერეს ხელშეკრულებას.
_ამას დრო უნდა, რომ გაიგონ. (?) თავიდან ადამიანი ხანდახან ვერ იგებს იმას, რასაც სთავაზობენ. ეს არის აბსოლუტურად სწორი გადაწყვეტილება სახელმწიფოს მხრიდან. ჩვენ მივესალმებით ამას.
_ბატონო ზაზა, თქვენ ექიმებს შეხვედრაზე განუცხადეთ, რომ ჩვენც არ გვინდოდა ეს მომხდარიყო, მაგრამ დაგვავალეს და მეტი გზა არ გვაქვსო. . . ადასტურებთ თუ არა ამ ინფორმაციას და იქნებ, გვითხრათ, ვინ დაგავალათ?
_ ვინ დაგვავალა და სახელმწიფომ, ეს იყო სახელმწიფოს ნება. პირველი აპრილიდან სოფლის ექიმების ინსტიტუტი იქნება კერძო კომპანიის ქვემდებარე, _გვითხრა ჯაფარიძემ.
“გურია ნიუსი” აღნიშნულ საკითხთან დაკავშირებით, შპს “მედალფას” გენერალური დირექტორის მოადგილეს ლევან ანთაძესაც ესაუბრა.
_სოფლის ამბულატორიები ისევ ისე მოემსახურება სოფელს, როგორც ადრე. არაფერი არსად არ გადასულა, რასაც სახელმწიფო უკვეთავდა ფიზიკურ პირებს, ექიმებს და ექთნებს, უშუალოდ გურიის რეგიონში, ისე შეუკვეთავს შპს “მედალფა” მათ. ჩვენ ვიქნებით ვალდებული სახელმწიფოს წინაშე ჯანდაცვის საქმანობაზე, თუმცა სახელმწიფო პროგრამა რჩება ისევ ისე.
_ბატონო ლევან, როგორც ვიცით, ამ საკითხთან დაკავშირებით ექიმები და ექთნები განაწყებული არიან. მათ პროტესტის ნიშნად გაფიცვის მოწყობაც გადაწყვიტეს. არ მოაწერეს ხელშეკრულებებს ხელი, სიტუაცია კი ჩიტაიშვილმა განმუხტა?
_გაფიცვის რა მოგახსენოთ, უკმაყოფილება ექთნების მხრიდან ნამდვილად იყო, რადგან მათ შეიძლებოდა შეხებოდათ ხელფასის კლება. 75 ამბულატორიაა და მართვას, ელემენტარულად, სჭირდება ხარჯები, რომელიც გაწერილი არ არის. თვითონ პროგრამის არსი მოიცავდა ფიზიკური პირების შეკვეთის მიცემას და შესრულებას. მცირდებოდა ექთნის ხელფასი, მაგრამ მათ შორდებოდათ კომუნალური გადასახადები. ამიტომ ექთნების მხრიდან, ნამდვილად იყო უკმაყოფილება, ფორმდებოდა ხელშეკრულება, მოვიდა გუბერნატორიც, რომელმაც დაპირდა მედპერსონალს რომ სიტუაციას გაარკვევდა. სთხოვა მათ, რომ თავი შეეაევებინათ ასეთი ხმაურისგან და ექთნებს რომ დღეს ხელფასები არ უმცირდება ეს ჩიტაიშვილის აქტიური ჩარევის შედეგი და დამსახურებაა.(???)
_ესე იგი, ბატონო ლევან, ექთნებს და ექიმებს ხელფასი არ შეუმცირდებათ?
_არა, ყველაფერი ისე დარჩება, როგორც იყო. ასევე იქნება ლანჩხუთის და ჩოხატაურის მუნიციპალიტეტებშიც.
_თქვენი აზრით სიტუაცია დარეგულირებულია ?
_ სამედიცინო ცენტრში დასარეგულირებელი არაფერი არ ყოფილა და არ არის. ყევლაფრი დარეგულირებული და მოწესრიგებულია. როგორ მომსახურებასაც ღებულობს გურიის მოსახლეობა ჩვენს ახალ სამედიცინო ცენტრში, შემიძლია გითხრათ, რომ ასეთი მომსახურება დასავლეთ საქართველოში სხვაგან არსად არის.
