ვანო მერაბიშვილის სამთავრობო საათი ოპოზიციისთვის არ შედგა. პარლამენტის თავმჯდომარის მოადგილემ გიგი წერეთელმა განაცხადა, რომ “ბატონმა ვანომ საგანგებო საკითხის გამო, ვერ მოახერხა სხდომაზე მოსვლა”.
რა იყო ეს საგანგებო საკითხი, რამაც ვანო მერაბიშვილს ბოლო წამს პარლამენტში მოსვლა გადააფიქრებინა, გიგი წერეთელს არ დაუკონკრეტებია.
ამ მიზეზის გარკვევა “გურია ნიუსმა” საპარლამენტო უმრავლესობის ერთ-ერთ ლიდერთან პეტრე ცისკარიშვილთან სცადა. მან თავისი კომენტარი ოპოზიციის იმ წარმომადგენელთა სქციელის შეფასებით დაიწყო, რომლებმაც სამთავრობო საათი პროტესტის ნიშნად დატოვეს.
პეტრე ცისკარიშვილი: “ჩემი აზრით, არასწორი პოლიტიკური გადაწყვეტილება იყო. მათი ინიციატივით იყო მოწვეული ეს სამთავრობო საათი და პირველ რიგში მათთვის უნდა ყოფილიყო საინტერესო იმ კითხვებზე პასუხის მოსმენა, რომელიც თვითონ ჩასვეს იმ წერლში. როგორც ჩანს, მათი ამოცანა სხვა რამე იყო, არა კითხვებზე პასუხის მოსმენა, არამედ პოლიტიკური სკანდალ-შოუს მოწყობა და ამისთვის სჭირდებოდათ შინაგან საქმეთა მინისტრის დარბაზში ყოფნა, რაც შესაბამისი მიზეზების გამო, ვერ მოხერხდა. ვფიქრობ, რომ ქალბატონმა ეკა ზღულაძემ ძალიან კარგად და ამომწურავად გასცა ყველა კითხვას პასუხი.
_ თქვენთვის ცნობილია ის საგანგებო მდგომარეობა და მიზეზი, რის გამოც ვანო მერაბიშვილმა რამდენიმე წუთით ადრე გადაიფიქრა აქ მოსვლა?
_ ჩვენ ვიცით ამ ფორსმაჟორის შესახებ და ძალიან სამწუხაროა, რომ ბატონმა ვანომ ვერ მოახერხა მოსვლა.
_ ფორსმაჟორიs მიზეზი გამჟღავნება არ შეიძლება?
_ საჭირო რომ ყოფილიყო, გაცხადდებოდა…
_ თინა ბურჯალიანმა სანდრო გირგვლიანის მკვლელობას უბედური შემთხვევა უწოდა, თქვენც ასე ფიქრობთ თუ ტერმინოლოგიურ შეცდომად მიგაჩნიათ?
_ არა, ეს ტერმინოლოგიური შეცდომა არ არის. თინა ბურჯალიანმა თქვა, _ მსგავსი უბედური შემთხვევები რომ არ მოხდესო და სიტყვებზე ხომ არ გამოეკიდები ადამიანს? ანუ ის გულისხმობდა, რომ მსგავსი ტრაგიკული შემთხვევები რომ არ მოხდესო. სამართლებრივად, რა თქმა უნდა, თინაც აღიარებს და ჩვენც ვიცით, რომ ეს იყო დანაშაული.
_ რაც შეეხება აღსრულებას, თქვენი აზრით, ოჯახისთვის 50 000 ევროს გადახდა ვადებში ჩატევით, აღსრულება იყო? საქმე ხომ გამოძიებას უნდა დაბრუნებოდა?
_ ეგ ყველაფერი ჰკითხეთ თინა ბურჯალიანს…
