საჯარო მოხელეებს ოზურგეთის ცენტრალური მოედნის რეაბილიტაციის პროექტი საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა და საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ვაჩეიშვილმა ოზურგეთის თეატრალურ მოედანზე 30 მარტს გააცნო.
თუმცა, დილით ოზურგეთის მუნიციპალიტეტის პრესსამსახურიდან გვაცნობეს, რომ ნიკოლაიშვილი და ვაჩეიშვილი მოსახლეობას შეხვდებოდნენ.
მინისტრ ნიკოლაიშვილის თქმით, ქალაქ ოზურგეთის ცენტრალური ნაწილის სრული რეაბილიტაცია დაიწყება. რეკონსტრუქცია უტარდება “თეატრალური მოედნის” მიმდებარე ტერიტორიაზე მდებარე სკვერს, განახლდება შენობების გარე ფასადები, “ჭადრების ბაღში” მოეწყობა კაფე. გახორციელდება რუსთაველის ქუჩის ტროტუარებისა და თეატრალური მოედნის სრული რეაბილიტაცია.
მინისტრმა ასევე თქვა, რომ ეს სამუშაოები დაახლოებით, ერთ კვირაში დაიწყება. ასევე ისიც გახდა ცნობილი, რომ ჭავჭავაძის #4 ბინის სახურავზე სამხატვრო სკოლა დაიდებს ბინას.
“ამ პროექტების დასრულებისთვის დიდხანს ვემზადებოდით, მინდა გითხრათ, რომ ბევრმა არქიტექტორმა იმუშავა პროექტებზე. ოზურგეთი ულამაზესი ცენტრი იქნება, მშენებლობები მომდევნო დღეებში იწყება, მობილიზაცია უკვე გაკეთებულია, რაც მოგვცემს შესაძლებლობას, სექტემბრის თვეში განახლებული მოედანი მივიღოთ და მშენებლობები დასრულებული იყოს”, _ თქვა მან.
რამაზ ნიკოლაიშვილი და ნიკა ვაჩეიშვილი პროექტების წარდგენის შემდეგ, ღმრთისმშობლის მიძინების ოზურგეთის საკათედრო ტაძარში მივიდნენ. ისინი შემოქმედელმა მიტროპოლიტმა იოსებმა მიიღო, ვისთვისაც ამ შეხვედრაზე გახდა ცნობილი, რომ ოზურგეთში ძველი აბანოების ნაშთი იყო აღმოჩენილი. შემოქმედელი მიტროპოლიტი იოსები რამაზ ნიკოლაიშვილმა იმ ადგილზე მიიყვანა, სადაც აბანოების ნაშთია, შემდეგ კი ისინი შემოქმედის ეპარქიაში წავიდნენ.
