ბათუმის შოთა რუსთაველის სახელმწიფო უნივერსიტეტის პროფესორი თავის სტუდენტებს საგამოცდო ქულის მომატებას უჩვეულო და საინტერესო მიზეზით პირდება.
ბათუმის სახელმწიფო უნივერსიტეტის ეკონომიკისა და ბიზნესის ფაკულტეტის დეკანი ვლადიმერ ღლონტი ზაზა ფაჩულიას მხარდაჭერის შემთქვევაში მზადაა, თავის სტუდენტებს 1 საგამოცდო ქულა აჩუქოს. ამის შესახებ ბათუმელმა პროფესორმა სოციალური ქსელის მეშვეობით განაცხადა.
"გურია ნიუსი" ვლადიმერ ღლონტს დაუკავშირდა და მასთან ინტერვიუ ჩაწერა.
_ ბატონო ვლადიმერ, ზაზა ფაჩულიას მხარდაჭერასთან დაკავშირებით თქვენი განცხადება, ხუმრობაა თუ რეალურად აპირებთ სტუდენტებისთვის ქულის მომატებას?
_ ერთი ქულის მომატება ყოველთვის შეიძლება, მით უფრო მე პირადად მაქვს ბონუს ქულის პრაქტიკა, რაც ზოგჯერ სტუდენტის სასარგებლოდ 2 ქულის მომატებასაც გულისხმობს…
ბუნებრივია, ეს არის მოტივაციის, დაინტერესების და კეთილგანწყობის ზრდის მცდელობა, რომელიც ძალიან შორსაა ბანალური ქულების ბანალური დაჯამებისაგან. ეს ჩემი განზრახვა სოციალური სოლიდარობის ერთგვარი ხელშეწყობა იყო.
_ როგორი რეაქცია მოჰყვა სტუდენტების მხრიდან თქვენ ინიციატივას?
_ აქტივობა საკმარისად მაღალია. მაგრამ ყველა ეს მხარდაჭერის კომენტარი ძალიან შორსაა მერკანტილური განზრახვისგან – ერთი ქულის დამატება გამოცდაზე . სტუდენტი თუ უკვე არა სტუდენტი ვინც აკომენტარებდა, პირველ რიგში ადასტურებდა მაღალ სოციალურ პასუხისმგებლობას და სოლიდარობას.
ხოლო ჩემს ინიციატივას თავად ხვდებოდნენ ნახევრად ხუმრობით. აი მაგალითად – "წინა წლეებში მე უკვე მომიმატეთ ქულა"… ასე რომ, ამ ინიციატივამ ერთგვარი კატალიზატორის როლი შეასრულა სოციალური სოლიდარობის გამოვლენისას და გააკეთა ეს ხალისით, კარგი განწყობის გამოვლენით.
_ სავარაუდოდ თქვენ გადაწყვეტილებას კრიტიკოსები გამოუჩნდებიან. რა პასუხი გექნებათ მათთვის?
_ კრიტიკოსები ყოველთვის გამოჩნდებიან. ეს ის ხალხია, რომლებიც გონების თვალზე ბოღმა გადაფარებულები ყოველ ნაბიჯს (თუნდაც ჩემსას) გამრუდებული გამადიდებელი შუშით ზომავენ და ჩრეკენ… სამწუხაროდ, დღეს კიდევ ცოცხალია საბჭოთა კავშირის ორტოდოქსული მენტალიტეტის რეციდივები, რაც ვიღაცას ათქმევინებს, რომ პროფესორმა ღლონტმა თავის უფლებამოსილებას გადაამეტა და გამაკრიტიკოს ამისთვის ან ეჭვი შეიტანოს ჩემს კომპეტენციაში…
ეგ არაფერი. დაე თქვან, პასუხს მიიღებენ, დამაჯერებელს და არგუმენტირებულს… მე კი მიხარია, ეს რომ გავაკეთე, რადგანაც სწორედ ადამიანური თანადგომის გამოვლინებას ერთგვარად შეუწყვე ხელი, რაც ნამდვილად ვერ დაითვლება და შეფასდება ელემენტარული შეკრება-გამოკლების არითმეტიკული ოპერაციებით… ცხოვრება გაცილებით უფრო მრავალფეროვანია, ვიდრე ქულის პრიმიტიული მომატება ან მოკლება!
_ როგორ ფიქრობთ, კოლეგების რიგებში მიმბაძველები გეყოლებათ?
_ ეს ყველას პირადი საქმეა, რომელიც ინდივიდუალური გადაწყვეტილების დონეზე მიიღება.
_ და ბოლოს: რამ განაპირობა ამ უჩვეულო გადაწყვეტილების მიღება?
_ მინდა, რომ ზაზამ ითამაშოს ოლ სტარში. რატომ? _ იმიტომ რომ ქართველი ვარ, მახარებს და მაძლიერებს ქართველების და საქართველის წარმატება!
