2016 წლის პირველი ბაშო გამარჯვებით დავიწყეთ. პირველივე შეხვედრაში შთამბეჭდავი ორთაბრძოლა მოიგო გაგამარუმ. თანაც ისეთ მეტოქესთან, რომელთანაც აქამდე გამარჯვება არ ჰქონდა (0-6).
ჩვენმა გოლიათმა იაპონელ სადანოუმის (ა-მ9) ორივე მკლავი მოროძაშით დაუბლოკა და დოჰიოს კიდისკენ მძლავრად მიაწვა. თუმცა, დიდი წინააღმდეგობის გამო, როდესაც მეტოქე ტავარას მიღმა ვერ გაიყვანა, მარცხენა მხარეს მოიქნია და კოტენაგეს მოხდენილი გდებით დაანარცხა დოჰიოზე.
სამწუხაროდ, მას მხარი ვერ აუბა ტოჩინოშინმა. ლევანს მოქმედმა ჩემპიონმა, მონღოლმა იოკოძუნა ჰარუმაფუჯიმ შერკინების სტარტზევე მძლავრი ნოდოვა (ბოჭვა კისრის არეში) აგემა, შემდეგ კორპუსში ჩაავლო და უვატენაგეს ილეთით დასცა დოჰიოზე.
ფავორიტთაგან აღსანიშნავია მხოლოდ იაპონელი ოძეკი კისენოსატოს მარცხი, ვეტერან თანამემამულე ამინიშიკისთან (ა-მ1). დანარჩენებმა უკლებლივ მოიგეს თავიანთი ორთაბრძოლები.
მომდევნო შერკინებას გაგამარუ იაპონელ მე-8 მაეგაშირა მიოგირიუსთან გამართავს, რომელმაც დღეს მარცხი იწვნია კიდევ ერთ მე-8 მაეგაშირა ტაკაიასუსთან. ურთიერთშეხვედრებში უპირატესობას მიოგირიუ ფლობს ჩვენებურთან – 5:1.
რაც შეეხება ტოჩის მომდევნო მეტოქეს, ეს გახლავთ მონღოლი ოძეკი ტერუნოფუჯი, რომელმაც დღეს გვარიანი ოფლი დაღვარა, იაპონელი შოჰოძანის (დ-მ1) დასამარცხებლად და ბეწვზე გადაურჩა წაგებას.
ლევანი მონღოლ გოლიათს აქამდე 5-ჯერ შეხვედრია დოჰიოზე და პირველად წინა ბაშოზე (ფუკუოკაში) სძლია. აღსანიშნავია, რომ 5-ივე განვლილ შეხვედრაში უკომპრომისო, ძალისმიერი ბრძოლა გაიმართა და ყველა მათგანში კლასიკური იორიკირი დაფიქსირდა.
და ბოლოს, დღეს ტოჩინოშინი პუბლიკის წინაშე ახალი, ნაცრისფერი მავაშით წარსდგა. აქამდე იგი მხოლოდ ლურჯი და მუქი ლურჯი ფერის მავაშებს ატარებდა.
Developed By Web Features 2026 © All rights reserved