ზვიად კვაჭანტირაძე: “შეხვედრაზე ჩვენ გადმოგვცეს ირაკლის ბოდიში”

საპარლამენტო უმრავლესობის ლიდერის ზვიად კვაჭანტირაძის განცხადებით საგურამოში “ მხოლოდ ფრაქცია “ქართული ოცნების” და მათი ოჯახის წევრების შეკრება იყო"  და მხოლოდ ამიტომ არ მიიწვიეს კოალიციის სხვა წევრები.

_ მოვიწვიეთ ყოფილი და მოქმედი პრემიერები. ის ადამიანები, რომლებიც არ იყვნენ შეხვედრაზე, ვფიქრობ არ უნდა იყვნენ განაწყენებულნი, რადგან ვფიქრობ, რომ უფრო ფართო შემადგენლობით კიდევ გვექნება ბევრი შესაძლებლობა, რომ შევხდეთ და ავღნიშნოთ სხვა დღესასწაულები, _ განაცხადა კვაჭანტირაძემ გადაცემა 20/30-ის პირდაპირ ეთერში.

კვაჭანტირაძემ ირაკლი კობახიძის ცნობილ განცხადებაზეც ისაუბრა, რომლის თანახმადაც საარჩევნო სიაში  სპორტსმენები და მსახიობები "ასე ჭარბი რაოდენობით" არ იქნებიან:

_ შეხვედრაზე ამ თემას გვერდი ვერ ავუარეთ და ჩვენ გადმოგვცეს ირაკლის ბოდიში იმ კოლეგების მისამართით, რომელთაც მეტ-ნაკლებად შეეხოთ ეს განცხადება. ვფიქრობ და მჯერა, რომ  ირაკლი კობახიძეს თავის განცხადებაში არ უგულისხმია, რომ პარლამენტში სპორტსმენები და მსახიობები არ გვჭირდება.

ჩემი აზრით, მან სიტყვა _ჭარბი ზედმეტად გამოიყენა, რადგან არც მსახიობები და არც სპორტსმენები ასეთი სიჭარბით ნამდვილად არ არინ პარლამენტში. ისინი ჩვენი გუნდის ღირსეული წევრები არიან და საპარლამენტო მუშაობაში აქტიურად მონაწილეობენ, _ აღნიშნა კვაჭანტირაძემ.

მისივე თქმით, რომელმე პროფესიის მიმართ კვოტების დადგენა დისკრიმინაციული იქნება.

კვაჭანტირაძემ არ დაადასტურა დეპუტატ ომარ ნიშნიანიძის მიერ გავრცელებული ინფორმაცია იმის შესახებ, რომ კოალიციაში ირაკლი ალასანიას დაბრუნების საკითხზე მსჯელობა მიმდინარეობს:

_ საიდან მოიტანა ჩემთვის ღრმად პატივცემულმა და ჩემმა საყვარელმა კოლეგამ ეს ინფორმაცია არ ვიცი. შეიძლება ვიღაცის მიმართ მას უფრო მეტი ნდობა აქვს იმის, ვინც  ეს ინფორმაცია მიაწოდა, მაგრამ არა მგონია ეს სიმართლესთან ახლოს იყოს. თუნდაც იქიდან გამომდინარე, რომ ლოგიკური არ იქნებოდა არც იმ განცხადებების ფონზე, რომელიც ისმის, _ თქვა კვაჭანტირაძემ.