ჩვენი წყაროს ინფორმაციით, ამ პროცესში ჩართულნი არიან რამდენიმე სოფლის რწმუნებული, საჯარო მოხელეები და სხვადასხვა, ე.წ. აიპი-ებში დასაქმებული პირები.
2010 წლის თვითმმართველობის არჩევნების წინა პერიოდში არა ერთი ანალოგიური ფაქტი დაფიქსირდა _ საჯარო მოხელეები აგიტაციას სამსახურეობრივი მოვალეობის შესრულების დროს ეწეოდნენ, რაც საარჩევნო კოდექსით აკრძალულია. ოზურგეთის მუნიციპალიტეტის ტერიტორიული ერთეულების _ გურიანთის, მერიისა და ოზურგეთის რწმუნებულები სამუშაო კაბინეტებს წინასაარჩევნო შტაბებად იყენებდნენ. “ერთიანი ნაციონალური მოძრაობის” სააგიტაციო მასალა და მხარდამჭერთა სიები მათი სამუშაო ოთახების შემადგენელი ნაწილი იყო, რასაც არც მალავდნენ: “მე ხელისუფლების წარმომადგენელი ვარ და შვიდიანები ხომ არ მექნება კაბინეტში?!” _ აცხადებდა მაშინ სოფელ ოზურგეთის რწმუნებული, გრიგოლ ჩხაიძე. ამავე სოფლის საბავშვო ბაღის ყოფილი გამგე, ბაღის შენობაზე მხოლოდ მმართველი პარტიის პლაკატების გაკვრას მარტივად ხსნიდა: “ბაღს ყველაფერი “ნაციონალებმა” გაუკეთეს და ახლაც ისინი ამარაგებენ სხვადასხვა პროდუქტით”. ბაღის გამგე მის კაბინეტსა და ბაღის შესასვლელში მიმდინარე სარემონტო სამუშაოებსაც მმართველი პარტიის დამსახურებად მიიჩნევდა: “დიახ, ნაციონალური მოძრაობა, გამგეობა და ჩვენ ყველა ერთად ვართ შეკრული,” _ ასეთი განმარტებებს აკეთებდა ორი წლის წინ, ბაღის უკვე გათავისუფლებული გამგე.
ძველი მეთოდები წელსაც განახლდა, თუმცა არჩევნებამდე, რამდენიმე თვით ადრე.
_ მოვიდნენ და მკითხეს, რამდენი ვცხოვრობდით ოჯახში, მონაცემების ჩანიშვნის შემდეგ, დაინტერესდნენ, ვის ვუჭერდით მხარს, _ გვითხრა 27 მარტს ოზურგეთის მუნიციპალიტეტის გრიშაშვილის #14-ში მცხოვრებმა.
ამ ფაქტს, ამავე საერთო საცხოვრებლის მკვიდრი კიდევ ერთი მოქალაქე ადასტურებს: “ჩემთანაც იყვნენ მოსულები. მკითხეს, რამდენი ვცხოვრობდით სახლში. პირადობის მოწმობა ჩემთვის არ მოუთხოვიათ. ზუსტად რისთვის სჭირდებოდათ, ვერ გეტყვით. მე მიშას გარდა, ხმას არავის მივცემ და არც ჩემს პირადობას ვაჩვენებ ვინმეს. მე მგონი, ამ მთავრობის მომხრე ვინც არის, იმის მონაცემებს აგროვებდა. კიდევ ერთხელ ვამბობ, ჩვენი პრეზიდენტის გარდა, ხმას არავის მივცემ და ეს მასაც ვუთხარი”, _ გვითხრა აღნიშნულ უბანში მცხოვრებმა.
სახელმწიფო რწმუნებულ-გუბერნატორის გურიის რეგიონის საგანგებო სიტუაციების მართვის თანამშრომელი “გურია ნიუსთან” სატელეფონო საუბარში ამბობს, რომ ეს მისი პირადი საქმეა და არ აკონკრეტებს, რა მიზნით შეაგროვა მეზობლების პირადი მონაცემები.
_ როგორც გვითხრეს, თქვენს უბანში აგროვებდით მეზობლების პირად მონაცემებს.
_ კი, ბატონო.
_ რისთვის გჭირდებოდათ მონაცემთა შეგროვება?
_ არაფრისთვის. ისე მჭირდებოდა რაღაცისთვის, რა მნიშვნელობა აქვს?
_ აქვს მნიშვნელობა, რადგან თქვენ საჯარო სამსახურში ხართ დასაქმებული.
_ ჩვეულებრივად ვაგროვებდი. რამდენი სული იყო, ის უნდა აღმეწერა.
_ დაგავალეს, თუ თქვენი ინიციატივით შეითავსეთ დამატებითი საქმე?
_ არავის არ დაუვალებია, მე თავად გავაკეთე, ჩემი ინიციატივით. თქვენ ვინ გითხრათ ამის შესახებ?
_ თქვენმა რამდენიმე მეზობელმა.
_ მერე რა?
_ ასევე, ისიც გვითხრეს, რომ მონაცემების შეგროვების შემდეგ, ეკითხებოდით, თუ ვის უჭერენ მხარს.
_ არანაირი ეგეთი რამ არ ყოფილა, მასეთი კითხვა არ დამისვამს.
_ ვის გადაეცით მონაცემები შეგროვების შემდეგ?
_ ტელეფონში რას მესაუბრებით? მობრძანდით სამსახურში ან მე მოვალ თქვენთან.
_ სატელეფონო საუბარიც საკმარისია, თუმცა, თუ სურვილი გაქვთ, შეგიძლიათ, მობრძანდეთ.
_ ჩემთვის აქვს მნიშვნელობა. ტელეფონში რომ მესაუბრებით, რა გაინტერესებთ თქვენ?
_ მაინტერესებს, ვისი დავალებით შეაგროვეთ მონაცემები, რა მიზნით და ვის გადაეცით?
_ მე თვითონ მჭირდებოდა და ამიტომაც ვაგროვებდი. არავის დავალება არ ყოფილა, ეს ჩემი პირადი საქმეა, _ გვითხრა გურიის გუბერნიის თანამშრომელმა.
სატელეფონო საუბრიდან რამდენიმე წუთში, “გურია ნიუსი” შეეცადა, გურიის გუბერნატორს ვალერი ჩიტაიშვილს დაკავშირებოდა, თუმცა, მან ჩვენს სატელეფონო ზარებს არ უპასუხა, მის სამუშაო კაბინეტამდე რომ მიაღწიო კი, შესაძლოა საათობით რიგში დგომა მოგიხდეს და ვერც პასუხი მიიღო, როგორც ჩვევიათ, მხოლოდ მოუცლელობის საბაბით. აღსანიშნავია, რომ ადგილობრივი საჯარო მოხელეებისგან კომენტარების მოპოვება, ოზურგეთის ადმინისტრაციულ შენობაში შესვლაზე აკრძალვების დაწესების შემდეგ, კიდევ უფრო გართულდა.
გურიის საგანგებო სიტუაციების სამსახურის უფროსი შალვა ბოლქვაძე ამბობს, რომ მსგავსი დავალება არავისთვის მიუცია.
_ ბატონო შალვა, თქვენი თანამშრომელი მეზობლების პირად მონაცემებს აგროვებს. თუ გაქვთ ამის შესახებ ინფორმაცია? როგორც ამბობენ, ხელქვეითები სამსახურის უფროსებისგან იღებენ მსგავსი ტიპის სამუშაოს შესრულების დავალებას.
_ არანაირი მსგავსი დავალება არ მიმიცია არც ერთი თანამშრომლისთვის და არც საქმის კურსში ვარ. არ იქნება ეს მართალი. სამსახურებრივად მსგავსი რამ არავისთვის დამივალებია.
“საერთაშორისო გამჭვირვალობა საქართველოს” პროგრამების დირექტორი, ნინა ხატისკაცი ამბობს, რომ დაუშვებელია შეაგროვო მონაცემები, თუ კონკრეტული მიზანი წინასწარ მკაფიოდ არ იქნება გაცხადებული: _ მთავარია, უნდა თქვან, რისთვის აგროვებენ. მეორე, აუცილებელია, არავითარი კავშირი არ უნდა ჰქონდეთ პარტიის მიერ შეგროვებულ მონაცემებთან, მით უფრო, პოლიტიკურ სიმპათიებზე საუბარი ხომ ზედმეტია. ეს არის სამსახურებრივი აღრევა. ერთის მხრივ, ასრულებ სამსახურებრივ მოვალეობას და მეორეს მხრივ, იმავე დროს ეწევი პარტიულ საქმიანობას. მახსოვს, გასულ არჩევნებზე სოფელ ყარაჯალაში შეაგროვეს მონაცემები, თითქოს ჰუმანიტარული დახმარება ჩაჰქონდათ. ეს ინფორმაცია მივაწოდეთ უწყებათაშორის ჯგუფს, მათ კი თქვეს, რომ პირადი მონაცემების შეგროვება ამ ადამიანებს არ შეეძლოთ.
_ ჩინოვნიკმა გვითხრა, რომ ეს მონაცემები მისთვის სჭირდება და შეგროვებაც მისი პირადი საქმეა.
_ მისთვის სჭირდება, რას ნიშნავს? მაშინ სამსახურებრივ უფლებამოსილებას იყენებს ბოროტად. შეიძლება რაღაცისთვის მეზობლის პირადობის მოწმობის მონაცემები დასჭირდეს, მაგრამ ეს უნდა იყოს დასაბუთებული. როცა ამბობს, ჩემთვის მჭირდებაო, პირველ რიგში, უფლებამოსილების გადამეტებაა. თანაც თუ ეკითხება, ვისი მომხრე ხარო, ეს კიდევ აღრევაა და აკრძალულია. სამსახურებრივი მოვალეობის შესრულების დროს, ჩინოვნიკს ეს საერთოდ არ შეუძლია. ზოგადად, როცა ადასტურებს, რომ აგროვებს პირადობის მოწმობის მონაცემებს და არ ხსნის, რისთვის უნდა, ეგეც, რა თქმა უნდა, არაკანონიერია. თუ აგროვებენ მონაცემებს რომელიმე პარტიის ეგიდით, ეს არ არის პრობლემა, მაგრამ თუ აგროვებს, როგორც საჯარო მოხელე პარტიის ეგიდით, ეგ უკვე პრობლემაა.
2010 წლის თვითმმართველობის არჩევნებზე “გურია ნიუსის” კორესპონდენტებმა ე.წ. მომხრე-მოწინააღმდეგეების სახელობითი სიები სხვადასხვა სოფლის რწმუნებულების სამუშაო მაგიდაზე დააფიქსირეს, რის გამოც ერთ-ერთი სოფლის რწმუნებული 1 000 ლარით დაჯარიმდა, ხოლო სოფელ მერიის და სოფელ ოზურგეთის რწმუნებულებმა საოლქო საარჩევნო კომისიის წინაშე თავი იმართლეს, უფრო სწორად, ამართლებინეს, რომ ეს საგაზაფხულო სამუშაოების ჩატარების მსურველთა და მოწინააღმდეგეთა მონაცემები იყო.
