სირიის ქალაქ მადაიაში მოსახლეობა შიმშილით დაღუპვის ზღვარზე დგას. აღნიშნულ ინფორმაციას REUTER ავრცელებს.
მაუწყებლის ინფორმაციით, მადაიაში ორცხობილა 15 დოლარი, ხოლო ლიტრი რძე 313 დოლარი ღირს.
გავრცელებული ინფორმაციით, მადაიაში მერხებსა და დაფებს შეშად იყენებენ, ხოლო ქალები ძალადობის მსხვერპლი ხდებიან.
გაეროს ჰუმანიტარულ პროგრამაში მონაწილე მუშების თქმით, ქალაქის გარეუბანში საკვების ძებნისას ბევრმა მაცხოვრებელმა ნაღმის აფეთქების შედეგად კიდურები დაკარგა.
გაეროს ჰუმანიტარული ანგარიშის მონაცემებით, 11 იანვრის შემდეგ არასრულფასოვანი კვების შედეგად 5 ადამიანი გარდაიცვალა.
როგორც ცნობილია, გაერომ, 2015 წლის ივლისში, სირიის ხელისუფლებას ნებართვის მიღების თხოვნით, მიეწოდებინათ ჰუმანიტარული დახმარება მადაიას მაცხოვრებელთათვის, შვიდჯერ მიმართა.
მაუწყებლის ინფორმაციით, სირიის ხელისუფლებისგან ნებართვის მიღების შემდეგ გაერომ ოქტომბერში 20 ათას ადამიანზე გათვლილი ჰუმანიტარული დახმარების მიწოდება შეძლო.
როგორც ცნობილია, გაერომ სირიის ხელისუფლებას თხოვნით კიდევ რამდენჯერმე მიმართა, რის შედეგადაც, 11 იანვარს, სამედიცინო დახმარების აღმოჩენა, ხოლო 14 იანვარს კიდევ ერთი ჰუმანიტარული ოპერაციის განხორციელება შეძლო.
