საფეხბურთო კლუბმა ლანჩხუთის "გურიამ" რამდენიმე დღეა, რაც საქართველოს ჩემპიონატის მეორე წრისთვის მზადება დაიწყო. მართალია, ჯერ გუნდის სრულ დაკომპლექტებაზე საუბარი ზედმეტია, მაგრამ იკვეთება რამდენიმე დეტალი, რომელიც გარკვეულ სამომავლო კონტურებს აქედანვე წარმოაჩენს.
დავიწყოთ მწვრთნელით, რომელიც ჩვენი ინფორმაციით ქალაქ დუშანბეში დაბადებული და სანკტ პეტერბურგში მცხოვრები ვიქტორ დემიდოვი იქნება. ის უკვე გუნდთან ერთად არის და საწვრთნელი პროცესიც დაწყებული აქვს.
დემიდოვი პროლიცენზიის მქონე მწვრთნელია და ბოლოს სანკტ პეტერბურგის "დინამოს" ედგა სათავეში, რომელმაც რუსეთის მეორე დივიზიონის დასავლეთ ზონაში თამაშობს. ვრცელდება ინფორმაცია, რომ მან ბოლო ერთ წელიწადში ოთხი კლუბი გამოიცვალა.
მართალია ოფიციალურად კლუბის მესვეურები ჯერ დუმილს ამჯობინებენ, მაგრამ ცნობილი ხდება, რომ დემიდოვის ასისტენტი მალხაზ არზიანი იქნება, რომლის ვაჟი, ზურა არზიანი გუნდში ითამაშებს. მასთან ერთად გადაწყვეტილი საქმეა, რომ გიორგი კახელიშვილიც "გურიას" ფეხბურთელი გახდა და მენისკის ოპერაციაგადატანილს ამ ეტაპზე ვარჯიში არ შეუძლია.
სხვა მხრივ ძველი შემადგენლობიდან რამდენიმე ფეხბურთელი კვლავაც გუნდში რჩება. საუბარია რატი იმერლიშვილზე, ერეკლე კილაძეზე, სანდრო ბახიაზე, გია ჩადუნელზე, ლაშა ნოზაძეზე, ზურა გელაშვილზე და დიმიტრი ზაზულიაზე, რომელიც ამ დღეებში ჩამოვა უკრაინიდან და გუნდს შეუერთდება.
გუნდს ახალი ლეგიონერები ყავს, ნაწილი უკვე ვარჯიშობს, ნაწილს დღედღეზე ელიან. კლუბის ფეისბუკგვერდზე აღნიშნულია, რომ ისინი მაღალი კლასის ფეხბურთელები არიან და წარმოშობით ევროპიდან, აფრიკიდან და სამხრეთ ამერიკიდან არიან. რადგან ჯერ კიდევ სელექციის პერიოდია, ადრეა საუბარი თუ ვინ დარჩება გუნდში და ვინ არა.
უახლოეს დღეებში კლუბის ხელმძღვანელობა პრესკონფერენციის მოწყობას და ყველა სიახლის საჯაროდ გახმაურებას გვპირდება. თანაინვესტორის ოფიციალური ვინაობაც მაშინ გაჟღერდება. კლუბის დირექტორატში დაანონსებული ცვლილებების შესახებაც მოგვეცემა ინფორმაცია. მანამდე კი ურეკში, სასტუმრო "ბერმუხაში" დაბანაკებული გუნდი თანდათან ივსება და უახლოეს მომავალში ყველა ინფორმაცია დაზუსტებულიც იქნება.
