“ლატვიელი ექსპერტების ვიზიტი
ხვალ, 3 აპრილს, საქართველოს კონტროლის პალატა ლატვიის რესპუბლიკის კორუფციის წინააღმდეგ ბრძოლისა და პრევენციის ბიუროს (KNAB) წარმომადგენლებს უმასპინძლებს.
10.00 სთ. დელეგაციის წევრებს საქართველოს კონტროლის პალატის თავმჯდომარე ლევან ბეჟაშვილი შეხვდება (მისამართი: საქართველოს კონტროლის პალატის ოფისი, ქეთევან წამებულის 96),
11:00 სთ. ლატვიელი ექსპერტები ქართველ კოლეგებს გაუზიარებენ გამოცდილებას და ჩაატარებენ პრეზენტაციებს პოლიტიკური დაფინანსების საკითხებზე (სასტუმრო „ქორთიარდ მერიოტი“)
გთხოვთ, მობრძანდეთ!
პატივისცემით,
ფატი მამიაშვილი, საქართველოს კონტროლის პალატის პრესსამსახური
მის: ქ. თბილისი, 0144, წმ. ქეთევან დედოფლის გამზ. 96; ტელ:+995/32/2438114; მობ:+995577202098″
ზუსტად ამ სახით მოგვივიდა ანონსი საქართველოს კონტროლის პალატის პრესსამსახურის უფროსისგან, ფატი მამიაშვილისგან.
როგორც ხედავთ, ჩვენი ხილვის სურვილი თავად გამოთქვეს და თავად მიგვიწვიეს. ყოველ შემთხვევაში, “გთხოვთ მობრძანდეთ” _ ქართულ ენაზე მიწვევას გულისხმობს.
მიწვევა ერთი საქმე იყო და დახვედრა მეორე.
პრეზენტაცია კონტროლის პალატის თავმჯდომარის პირველმა მოადგილემ, შოთა თარხნიშვილმა გახსნა.
ამ პრეზენტაციის რამდენიმეწუთიანი ჩანაწერის გაკეთება მანამ მოვახერხეთ, სანამ კონტროლის პალატის პრესსამსახურის უფროსი, ფატი მამიაშვილი ჩვენი დარბაზიდან გამოძევების განკარგულებას გასცემდა. “გურია ნიუსმა” რამდენიმე წამიანი საუბრის ჩაწერა მოახერხა.
შოთა თარხნიშვილი: “მოგესალმებით ყველას, დიდი მადლობა მობრძანებისთვის. მინდა ყველას გადაგიხადოთ დიდი მადლობა, როგორც საზოგადოებრივი ორგანიზაციის წარმომადგენლებს, ასევე პოლიტიკური ორგანიზაციის წარმომადგენლებს. ჩვენთვის ძალიან მნიშვნელოვანია ეს შეხვედრა. ჩვენ მიგვაჩნია, რომ ეს საკითხები უნდა განვიხილოთ არა როგორც ორი დაპირისპირებული ბანაკის საკითხები, არამედ ერთობლივად უნდა გადავწყვიტოთ ყველაფერი და ერთობლივად უნდა უზრუნველყოთ ის, რომ მოვიპოვოთ საზოგადოების წინაშე ნდობა არა მარტო კონტროლის პალატის ქმედებებმა, არამედ უშუალოდ პოლიტიკურმა პარტიებმა თავის ფინანსური გამჭვირვალობის საკითხი. ამიტომ ანგარიშვალდებული ვართ და გამჭვირვალობა ამ საკითხში ძალიან მნიშვნელოვნად მიგვაჩნია.
“გურია ნიუსი” დეტალურად გთავაზობთ “გამჭვირვალე” კონტროლის პალატის დახურული შეხვედრის დეტალებს, სადაც კონტროლის პალატის პრესსამსახურის უფროსმა “გურია ნიუსის” ჟურნალისტს ჯერ ჩართული დიქტოფონის გამო უსაყვედურა, შემდეგ კი საკმაოდ უხეში ტონით განუცხადა: _ “ძალიან ბევრს ლაპარაკობთ!”
“ქორთრიად მერიოტში” შეხვედრის გასაშუქებლად თითქმის ყველა მედიასაშუალება მივიდა. დარბაზში პოლიტიკური პარტიებისა და არასამთავრობო ორგანიზაციების წარმომადგენლები იყვნენ, იყო აშშ “ეროვნულ-დემოკრატიული ინსტიტუტის” (NDI) საქართველოს ოფისის დირექტორი, ცნობილი ლუის ნავარო, რომელმაც ამ შეხვედრის შესახებ კომენტარის გაკეთება არ ისურვა. შეხვედრაზე იმყოფებოდა კონტროლის პალატის პოლიტიკური პარტიების ფინანსური საქმიანობის მონიტორინგის სამსახურის უფროსი, ნათია მოგელაძე, რომელმაც ასევე უარი განაცხადა კომენტარის გაკეთებაზე.
დარბაზში, სადაც დაწყებული იყო მუშა შეხვედრა, ერთ-ერთი ორგანიზატორი შემოვიდა, რომელიც ტელეფონით ჩვენთვის უცნობ ქალბატონს ესაუბრებოდა. ტელეფონიდან გაიცა განკარგულება “ჰოდა, უთხარი გადაიღონ 5 წუთი და ორ წუთში დატოვონ დარბაზი!”
განკარგულების გამცემი კონტროლის პალატის საზოგადოებასთან ურთიერთობის სამსახურის უფროსი, ფატი მამიაშვილი აღმოჩნდა.
ამის შემდეგ, კონტროლის პალატის წარმომადგენელმა მიგვითითა, დარბაზი დაგვეტოვებინა.
“გურია ნიუსის” კითხვაზე: _ უკაცრავად, თქვენ კონტროლის პალატის წარმომადგენელი ხართ? _ გოგონამ მხრები აიჩეჩა. გადავწყვიტეთ, მაინც გვეკითხა მისთვის:
_ ერთი წუთის წინ კონტროლის პალატის თავმჯდომარის მოადგილემ განაცხადა, რომ თქვენი უწყებისთვის მთავარია გამჭვირვალობა. თუ ეს გამჭვირვალე შეხვედრაა, რატომ გამოგვიყვანეთ მედია?
_ მე ვერაფერს გეტყვით. მოვა პრესსამსახურის უფროსი, რომელიც ყველა კითხვაზე გიპასუხებთ.
ამ პასუხის შემდეგ, მედია საშუალებებმა დარბაზი დატოვა. ფოიეში ველოდებით ადამიანს, რომელიც გაგვარკვევდა, რატომ გაგვაძევეს დარბაზიდან.
ცოტა ხანში “ქორთრიარდ მარიოტში” ფატი მამიაშვილი მოვიდა, რომელიც საკმაოდ აღელვებული ჩანდა და შემოსვლისთანავე განაცხადა, _ რომელი ხართ “გურია ნიუსიდან?”
მას შემდეგ, რაც ჩვენი არსებობა დავუდასტურეთ, დიალოგი ასე გაგრძელდა.
ფატი მამიაშვილი _ მიიღეთ თუ არა ანონსი?
_ მივიღე. წუხელაც მივიღე თქვენი ანონსი.
_ და რა ეწერა მაგაში, რომ 10 საათზე იყო შეხვედრა და კომენტარებს აკეთებდნენ იქ. თუ გინდოდათ ლევან ბეჟაშვილის კომენტარი, უნდა მოსულიყავით კონტროლის პალატაში!
_ ქალბატონო, დახურულია ეს შეხვედრა?
_ ჰოდა, ამიტომ, რატომ ლაპარაკობდით ვიყვირებო?
_ ქალბატონო, საერთოდ სიტყვა _ ვიყვირებ, არ მითქვამს. როდის გითხარით?
_ კარგი ეხლა!
_ ქალბატონო, შეხვედრა დახურულია? ეს პრესრელიზი თქვენი დაწერილი არ არის? აქ გიწერიათ, რომ 11 საათზეცაა შეხვედრა. მე მოვედი 11 საათზე…
_ თქვენ, დაამთავრეთ?!
_ დახურულია ეს შეხვედრა?
_ დახურულია!
_ რატომ?
_ იმიტომ, რომ კომენტარებს…
_ კომენტარზე არ მაქვს საუბარი…
_ ჩართულ დიქტოფონზე ვილაპარაკოთ?!
_ აბა, რა ვქნათ! თქვენ მეუბნებით არ შეხვიდეთო და კომენტარის გაკეთებაც არ გინდათ?
_ არა! ჯერ არ უნდა შეხვიდეთ! ოპერატორები შევლენ, თუ უკვე შესულები არ არიან. გამოვლენ და დაელოდებით.
_ ჩაწერაზე არ მაქვს საუბარი. სამუშაო შეხვედრაზე დასწრებაზეა გეკითხებით.
_ არ არის დასწრებაზე საუბარი. აქ არის კომენტარებზე ლაპარაკი და ერთი წუთით დამელოდეთ.
_ დახურული რომ იყო, ეს სად ეწერა?
_ ერთი წუთით, რა!
_ კომენტარის ჩაწერაზე არც ყოფილა საუბარი!
_ ერთი წუთით რა, ძალიან ბევრს ლაპარაკობთ!
ამის შემდეგ ფატი მამიაშვილი დარბაზში შევიდა და რამდენიმე წუთში შეგვატყობინა, რომ შეხვედრას ვერ დავესწრებოდით…
მართალია, დიდი სურვილისა და მონდომების მიუხედავად ვერ გავიგეთ, როგორია ლატვიის საკანონმდებლო ბაზა და როგორ ახორციელებენ ისინი პარტიების ფინანსურ მონიტორინგს, მაგრამ სამაგიეროდ “გურია ნიუსის” არქივს კონტროლის პალატის თავმჯდომარის პირველი მოადგილის, შოთა თარხნიშვილის სიტყვები შემორჩა:
“ჩვენ მიგვაჩნია რომ ეს საკითხები უნდა განვიხილოთ არა როგორც ორი დაპირისპირებული ბანაკის საკითხები, არამედ ერთობლივად უნდა გადავწყვიტოთ ყველაფერი და ერთობლივად უნდა უზრუნველყოთ ის, რომ მოვიპოვოთ საზოგადოების წინაშე ნდობა”(?!).
