2012 წლის ნოემბრიდან 2016 წლის 01 იანვრამდე პერიოდში, ცალკეულ საჯარო მოხელეთა მიერ 2012 წლის 01 ოქტომბრამდე პერიოდში ჩადენილ ძალადობრივ დანაშაულებთან დაკავშირებით, რომელიც მოიცავს წამების, არაადამიანური მოპყრობის ფაქტებსა და სხვა ძალადობრივ დანაშაულებს, საქართველოს პროკურატურის საგამოძიებო დანაყოფებში სისხლისსამართლებრივი დევნა – 124 ყოფილი საჯარო მოხელის მიმართ არის დაწყებული. ამის შესახებ მთავარი პროკურატურის მიერ, გამოქვეყნებულ განცხადებაშია აღნიშნული.
პროკურატურის ინფორმაციით, გამოძიება დაიწყო ისეთი მაღალი თანამდებობის პირების მიმართ, როგორებიც არიან: შინაგან საქმეთა მინისტრი, იუსტიციის მინისტრი, თავდაცვის მინისტრი, გენერალური შტაბის უფროსი, სამხედრო პოლიციის უფროსის მოადგილე, შს სამინისტროს კონსტიტუციური უსაფრთხოების დეპარტამენტის უფროსი, სპეციალური ოპერატიული დეპარტამენტის უფროსი, კრიმინალური პოლიციის დეპარტამენტის დირექტორი, კონტრდაზვერვის დეპარტამენტის დირექტორის მოადგილე, შს სამინისტროს სპეციალური ოპერაციების ცენტრის უფროსი, სასჯელაღსრულების დეპარტამენტის უფროსი.
როგორც მთავარ პროკურატურაში აცხადებენ, მოცემული საქმეებიდან, სასამართლოში განსახილველად წარიმართა 119 პირის მიმართ 40 სისხლის სამართლის საქმე, საიდანაც სასამართლოს მიერ გამამტყუნებელი განაჩენი 81 პირის მიმართ 23 სისხლის სამართლის საქმეზე გამოიტანეს.
გახმაურებულ დანაშაულებებთან დაკავშირებით კონკრეტული ინფორმაცია, გამოძიების მიმდინარეობისა და შედეგების შესახებ შეგიძლიათ იხილოთ აქ – გახმაურებულ დანაშაულთა გამოძიების სტატისტიკა.
