საკრებულოს რიგგარეშე სხდომაზე ლანჩხუთელმა ოპოზიციონერმა დეპუტატებმა საფეხბურთო კლუბ ლანჩხუთის "გურიაში" ბოლო ხანებში განვითარებული მოვლენების მიმართ ინტერესი გამოხატეს და საკითხთან დაკავშირებით მუნიციპალიტეტის გამგებლისგან განმარტებები მოითხოვეს.
"გაზეთების საშუალებით ვიგებთ, რომ ჩამოსულია ვიღაც სპონსორი. მგონი უნდა ვიცოდეთ ვინაა, რა მიზნები ამოძრავებს და სამომავლოდ რა გეგმები აქვს კლუბთან მიმართებაში. თუ მისაღებია და კარგი საქმის საკეთებლადაა ჩამოსული ის კაცი, ჩვენც ყველა გვერდით დაგიდგებით", -მიმართა მუნიციპალიტეტის პირველ პირს ზაზა ურუშაძეს მისმა წინამორბედმა გია გოგუაძემ.
"გუნდი უკვე შეკრებილია, დღესდღეობით ურეკში, სასტუმროში იმყოფება, თუმცა მალე თბილისში მიემგზავრება, სადაც მზადების ახალ ეტაპს გაივლის. ძალიან მალე გაცხადდება ვინ არის სპონსორი. მინდა ვთქვა, რომ ეს ხალხი ხარჯავს საკუთარ ფულს. მათი მიზანია ახალგაზრდა ფეხბურთელების ჩამოყვანა და შემდეგ ევროპაში გაყიდვა. დღესდღეობით "გურიაში" შვიდი უცხოელი ფეხბურთელი ვარჯიშობს. ერთ-ერთია საფრანგეთის ახალგაზრდული ნაკრების წევრი, ასევე არის კოტდიუარის ნაკრების მოთამაშე, ორი ნიგერიელი და ორიც უკრაინელი ფეხბურთელი. სპონსორი არც ჩვენი ბაზითაა დაინტერესებული და არც სხვა რამით, მათი ერთადერთი მიზანია ახალგაზრდა ფეხბურთელების ჩამოყვანა და შემდგომ ევროპაში გაყიდვა.
რაც შეეხება გრიგოლეთის ბაზას, იქ ახლა მოსამზადებელი სამუშაოები მიმდინარეობს და როცა გუნდი თბილისის შეკრებიდან დაბრუნდება, ბაზაზე დაბინავდება. იანვრის ბოლოსთვის პრესკონფერენციის გამართვას ვგეგმავთ, სადაც დასწრების საშუალება ყველა დაინტერესებულ პირს ექნება," -განაცხადა ურუშაძემ გოგუაძის პასუხად.
გამგებლის ეს განმარტება საკმარისი არ აღმოჩნდა საკრებულოს წევრ ელგუჯა ჩხაიძისთვის.
"საინტერესოა, რატომ არის ასე გასაიდუმლოებული სპონსორის ვინაობა. ეტყობა საქმე რაღაცაშია, თორემ სად გაგონილა სანაცვლოდ არაფერს ითხოვდეს. მოკლედ, ბევრი კითხვის ნიშანი ჩნდება", – განაცხადა ჩხაიძემ.
საკუთარ ფეისბუქგვერდზე საფეხბურთო კლუბი ლანჩხუთის "გურია" ოპონენტი გულშემატკივრების საყურადღებოდ შემდეგი სახის განცხადებას ავრცელებს:
"გვინდა გაცნობოთ, რომ ლანჩხუთის ''გურიაში'' აქტიურად მიმდინარეობს სელექციის პროცესი, რის შემდეგაც, გვინდა დავარწმუნოთ ჩვენი გულშემატკივარი – ჩვენი მწვრთნელები მოახერხებენ ისეთი ფეხბურთელების შეკრებას, რომ გვეყოლება კარგად დაბალანსებული, ბრძოლისუნარიანი გუნდი.
უახლოეს დღეებში, როცა სამწვრთნელო შტაბი შერჩევის პირველ ეტაპს დაასრულებს, ჩვენ ოფიციალურად გაცნობებთ ამ სიახლეების შესახებ. გეტყვით, რომ ამჟამად ''გურიაში'' წვრთნას რამდენიმე ლეგიონერი, მათ შორის თავისი ეროვნული ნაკრების წევრი გადის.
როგორც იცით, ამჟამად გუნდი ურეკშია შეკრებილი. მოგეხსენებათ, გრიგოლეთში კლუბის ბაზაზე საცხოვრებელი კორპუსი მზადაა, ახლა იქ ნომრებში ავეჯის დადგმის პროცესი მიმდინარეობს და ''გურია'' მალე საკუთარ კომპლექსში დაბანაკდება.
ამასთან, ლანჩხუთის ზოგიერთი ''გულშემატკივრის'' გასაგონად გვინდა განვმარტოთ, რომ ამ ეტაპზე ლეგიონერების ჩამოყვანა, მათი წვრთნა და სხვა ხარჯები, მათ შორის ურეკში გუნდის შეკრება მთლიანად ინვესტორის მიერ ფინანსდება და ადგილობრივი ბიუჯეტიდან თანხა არ იხარჯება.
ასევე ინვესტორის მიერ და მისივე ხარჯით, დაგეგმილია ერთკვირიანი შეკრების თბილისში მოწყობა".
