ოზურგეთის ალ. წუწუნავას სახელობის სახელმწიფო დრამატულ თეატრში ერთ-ერთ წამყვანი მსახიობის, ვერიკო ხუხუნაშვილის ბენეფისი გაიმართა. ქალბატონ ვერიკოს დაბადებიდან 50, ხოლო სასცენო მოღვაწეობიდან 30 წელი შეუსრულდა.
თეატრით ბავშვობიდან იყო გატაცებული, აქტიურად მონაწილეობდა მოსწავლე-ახლგაზრდობისა და სკოლის დრამატულ წრეებში. ნიჭმა და შრომამ გაამართლა და 1985 წელს, ვერიკო ხუხუნაშვილი, საქართველოს შოთა რუსთაველის სახელობის სახელმწიფო თეატრალური ინსტიტუტის კინოსა და დრამის ფაკულტეტის სტუდენტი გახდა. მის სამსახიობო დაოსტატებაში მნიშვნელოვანი წვლილი შეიტანეს ზინა კვერენჩხილაძემ და დავით კობახიძემ.
ინსტიტუტის დამთავრების შემდეგ, მშობლიურ თეატრში დაბრუნდა, სადაც რეჟისორმა, ვასილ ჩიგოგიძემ სპექტაკლში “მე ვხედავ მზეს” ხატიას როლზე დაამტკიცა. ამას მოჰყვა საინტერესო როლები. ვერიკო ხუხუნაშვილმა დასამახსოვრებელი სახეები შექმნა სპექტაკლებში: ანასტასია _ რ. ერისთავის “იჭვიანი” (რეჟ. შ. ურუშაძე), ინგა _ ბ. ჯანიკაშვილის “მშვიდობით, თემურ!” (რეჟ. ო. კუტალაძე), ირინკა _ ლ. თაბუკაშვილის “შენკენ სავალი გზები” (რეჟ. ო. კუტალაძე), ლირსა _ პ. კაკაბაძის “ყვარყვარე” _ (რეჟ. შ. ბაბილოძე), ნუნუ _ ლ. ბუღაძის “ნაფტალინი” (რეჟ. შ. ბაბილოძე) და სხვები. მსახიობმა 50 მთავარი და ამდენივე ეპიზოდური როლი განასახიერა.
1988 წელს ვერიკო ხუხუნაშვილი დაჯილდოვდა საქართველოს თეატრის მოღვაწეთა კავშირის საპატიო სიგელით. იგი ოთხმოცამდე ღონისძიების შეუდარებელი წამყვანი და ორგანიზატორია. ქალბატონი ვერიკო აქტიურ პედაგოგიურ საქმიანობას ეწევა. 15 წელია, საბავშვო თეატრალური სტუდია “ჩარლის” ხელმძღვანელია. დადგმული აქვს 35 საბავშვო სპექტაკლი.
2011 წელს ვერიკო ხუხუნაშვილს, სამხატვრო საბჭოს გადაწყვეტილებით, მიენიჭა პრემია წლის საუკეთესო როლის შესრულებისთვის (ლ. ბუღაძის “ნაფტალინი” _ ნუნუ დეიდას როლის შესრულებისათვის). ბენეფისზე მაყურებელმა სწორედ “ნაფტალინი” ნახა, ხოლო სტუდია “ჩარლის” პატარა მსახიობებმა დიდი სიყვარულით მიულოცეს საიუბილეო თარიღი თავიანთ მასწავლებელს. ოზურგეთის თეატრის მმართველი, ზაზა ჯინჭარაძე მაყურებელს ვრცლად ესაუბრა ვერიკო ხუხუნაშვილის სასცენო მოღვაწეობის შესახებ.
