“ადგილობრივი თვითმმართველობის შესახებ “საქართველოს ორგანული კანონის 43-ე მუხლის მე-3 პუნქტის ა ქვეპუნქტის და “ჩოხატაურის მუნიციპალიტეტის საკრებულოს დებულების” დამტკიცების შესახებ ჩოხატაურის მუნიციპალიტეტის საკრებულოს 2010 წლის 17 აგვისტოს #3 დადგენილების 117-ე მუხლის შესაბამისად, ჩოხატაურის მუნიციპალიტეტის საკრებულოსა და გამგეობაში მოქალაქეთა მიღების განცხადებების და საჩივრების განხილვის პროცესის სრულყოფისა და მუნიციპალიტეტის შეუფერხებელი ფუნქციონირების უზრუნველყოფის მიზნით, მოქალაქეთა მიღება უნდა მოხდეს მხოლოდ ადმინისტრაციულ შენობაში მდებარე მოქალაქეთა მომსახურეობის ცენტრის მეშვეობით”.
ეს ბრძანება ანტონ ხუნდაძემ 2012 წლის 12 მარტს გამოსცა, თუმცა, საჯარო მას შემდეგ გახდა, რაც “გურია ნიუსი” დაინტერესდა, რატომ არ შეგვიშვეს ადმინისტრაციულ შენობაში 13 მარტს, მაშინ, როცა კონტროლის პალატა ჩოხატაურელებს გამგეობის კუთვნილ ოთახებში კითხავდა _ 13 მარტს, ჩვენ არათუ შენობაში შესვლა, არამედ განცხადების დატოვების საშუალებაც არ მოგვცეს.
ხუნდაძეს არ აქვს პასუხი კითხვაზე, რატომ არ მოგვცეს 13 მარტს განცხადების დატოვების საშუალება და ამბობს, რომ იმ დღეს მოქალაქეთა მისაღებში 5 განცხადება შევიდა. თუმცა, რა მიზეზით ვერ შევძელით ჩვენი კონსტიტუციური უფლების გახორციელება, დღემდე ვერ გავარკვიეთ. მით უმეტეს, რომ ხუნდაძის მიერ გამოცემულ ბრძანება, რომელიც ადგილობრივი თვითმმართველობის შესახებ ორგანული კანონის და საკრებულოს დებულების 117-ე მუხლის შესაბამისად არის გამოცემული, ნათლად განსაზღვრავს იმ წესებს, რომლითაც მოქალაქეთა მიღება უნდა გახორციელდეს.
ადგილობრივი თვითმმართველობის შესახებ კანონის 43-ე მუხლის მე-3 პუნქტის ა ქვეპუნქტში წერია: “ადგილობრივი თვითმმართველობის ორგანოებისა და თანამდებობის პირების ინდივიდუალური სამართლებრივი აქტებია: ა) საკრებულოს თავმჯდომარის ბრძანება”. ამავე კანონის ამავე მუხლში აღნიშნულია, რომ “სამართლებრივი აქტების მომზადების, მიღების, გამოქვეყნების, მოქმედების, აღრიცხვისა და სისტემატიზაციის წესი განისაზღვრება ამ კანონით, ადგილობრივი თვითმმართველობის ორგანოების დებულებებითა და სხვა ნორმატიული აქტებით”.
მოქალაქეთა მიღების წესი, ნათლად არის გაწერილი ჩოხატაურის მუნიციპალიტეტის დებულების 117-ე მუხლში. აი, რა წერია აღნიშნულ მუხლში:
“საკრებულოს თანამდებობის პირებისა და საკრებულოს წევრების მიერ მოქალაქეთა მიღების წესი:
1. საკრებულოს თანამდებობის პირები ვალდებულნი არიან, კვირაში ერთხელ მაინც, საკრებულოს თავმჯდომარის ბრძანებით დამტკიცებული გრაფიკის შესაბამისად, მოაწყონ მოქალაქეთა მიღება.
2. საკრებულოს წევრი ვალდებულია, ამ დებულებით დადგენილი წესით, სამ თვეში ერთხელ მაინც, მოაწყოს შეხვედრა ამომრჩევლებთან ამ დებულების 128-ე მუხლით დადგენილი წესით.
3. საკრებულოს აპარატი უზრუნველყოფს მოქალაქეთა მიღების გრაფიკის გამოქვეყნებას და მოქალაქეთათვის მათ გაცნობას.
4. მოქალაქეთა მიღების გრაფიკში აღინიშნება საკრებულოს თანამდებობის პირის მიერ მოქალაქეთა მიღების დღე, მიღების საათები (არა ნაკლებ 6 საათი), შესვენების დრო, მიღების ადგილი, თითოეული მოქალაქისთვის გამოყოფილი დროის რეგლამენტი (არა ნაკლებ, 10 წუთი).
5. საკრებულოს თანამდებობის პირის მიერ მოქალაქეთა მიღებას აღრიცხავს და მოქალაქეთა მიღების ოქმს ადგენს საკრებულოს აპარატის თანამშრომელი. მოქალაქეთა მიღების ოქმში აღირიცხება მოქალაქეთა მიერ დასმული საკითხები.
6. მიღების საათების დამთავრების შემდეგ, საკრებულოს თანამდებობის პირი ეცნობა და ხელს აწერს მოქალაქეთა მიღების ოქმს. მოქალაქეთა მიღების ოქმი ინახება საკრებულოს აპარატში.
7. საკრებულოს აპარატი უზრუნველყოფს მოქალაქეთა მიღების ოქმში დაფიქსირებული საკითხების შესრულების კონტროლს და კანონით დადგენილ ვადებში აწვდის ინფორმაციას მოქალაქეს მის მიერ დასმული საკითხის გადაწყვეტის მიმდინარეობის შესახებ.”
ჩოხატაურის ადმინისტრაციული შენობის პირველ სართულზე, სადაც განცხადებების დაფაა, არც 55-ე ბრძანებაა გამოკრული და არც მოქალაქეთა მიღების გრაფიკი.
6 აპრილს, საკრებულოს თავმჯდომარეს, ანტონ ხუნდაძეს ოფიციალურად, წერილობით მივწერეთ და მოვითხოვეთ საჯარო ინფორმაცია: “საკრებულოს წევრების (ყველას) მოქალაქეებთან შეხვედრების გრაფიკის და დღემდე ჩატარებული შეხვედრების ოქმების დედანთან დამოწმებული ასლები; 2012 წლის 12 მარტიდან დღემდე შედგენილი მოქალაქეთა მიღების ოქმების დედანთან დამოწმებული ასლები და თუ რამდენი მოქალაქე მიიღეს საკრებულოს თანამდებობის პირებმა 2012 წლის 12 მარტიდან (#55 ბრძანების გამოცემიდან) დღემდე, კონკრეტულად ვინ და როდის. გარდა ამისა, საქართველოს ზოგადი ადმინისტრაციული კოდექსის 37-ე, 38-ე და მე-40 მუხლების შესაბამისად, ვითხოვდით აღნიშნული ოქმების დედანში გაცნობას.
განცხადების შეტანიდან ერთ საათში, მივიღეთ წერილობითი პასუხი, რომლის თანახმად, “მოქალაქეთა მიღების ოქმების შედგენას ადგილობრივი თვითმმართველობის შესახებ საქართველოს ორგანული კანონი არ ცნობს”. ოფიციალურ პასუხს ხელს საკრებულოს თავმჯდომარე, ანტონ ხუნდაძე აწერს. არადა, ადგილობრივი თვითმმართველობის შესახებ კანონის 43-ე მუხლში წერია, რომ სამართლებრივი აქტების მომზადების წესს დებულება განმარტავს. დებულებაში, კი როგორც ზემოთ აღვნიშნეთ, განმარტებულია, რომ მოქალაქეთა მიღების ოქმები უნდა შედგეს და ის საკრებულოს აპარატში ინახებოდეს.
მოქალაქეთა მიღების გრაფიკი, როგორც აღმოჩნდა, ჩოხატაურის საკრებულოს არ გააჩნია: “რაც შეეხება მოქალაქეების საკრებულოს თანამდებობის პირებთან მიღებას, იგი წარმოებს ყოველდღიურად, არა სამუშაო დღეების გარდა,” _ გვწერს ხუნდაძე და კანონის თანახმად საჯარო ინფორმაციას, რომელიც განცხადებების დაფაზეც უნდა იყოს გამოკრული, არ გვაწვდის. თუმცა, გვპირდება, რომ მიღებული მოქალაქეთა რაოდენობის შესახებ ინფორმაციას 2 სამუშაო დღის ვადაში მოგვაწვდის.
_ საქმე გვაქვს არაპროფესიონალიზმთან, რთულია ამას სხვა სახელი შეურჩიო. მე ვთქვი, რომ ჩოხატაურის ხელისუფლება არარაობაა და ეს კონკრეტული შემთხვევა ამის ნათელი დადასტურებაა. სახეზეა მაღალი რანგის საჯარო მოხელის, გადაწყვეტილების მიმღები პირის მორიგი უკანონო ქმედება. ჩვენ აბსურდის ქვეყანაში ვცხოვრობთ. სისულელესაც ხომ აქვს საზღვარი? _ ამბობს ჩვენთან საუბრისას სახელმწიფო მმართველობის მაგისტრი, ვლადიმერ სიხარულიძე.
_ მედიის მოვალეობაა მოსახლეობას ინფორმირება მიმდინარე აქტუალურ მოვლენებზე. შესაბამისად, მედიას ხელი არ უნდა შეეშალოს საჯარო ინფორმაციის მოპოვებასა და შეძლებისდაგვარად ადგილზე ინფორმაციის გაცნობაში. ჩვენ ვფიქრობთ, რომ ადგილობრივი მედიისთვის დიდი მნიშვნელობა აქვს იმ მოვლენებს, რომელიც თავად ადგილზე, რეგიონებში ხდება და შესაბამისად, მედიისთვის, ინფორმაციის მოძიებაში მაქსიმალური ხელშეწყობა უნდა მოხდეს, _ აღნიშნავს “გურია ნიუსთან” საუბრისას საერთაშორისო გამჭირვალობა-საქართველო-ს მედიის ანალიტიკოსი მამუკა ანდღულაძე.
ახალგაზრდა იურისტთა ასოციაციის ოზურგეთის ფილიალის ხელმძღვანელი, თამაზ ტრაპაიძე ამბობს, რომ საკრებულოს წევრებს კარგად უნდა ახსოვდეთ მათი ფუნქციები და იყვნენ ხალხის სამსახურში: _ საკრებულოს დებულების 117-ე მუხლი სწორედ ის ნორმაა, რომლის საფუძველზეც ჩოხატაურის და ოზურგეთის საკრებულოს თავმჯდომარეებმა გამოსცეს ბრძანება მუნიციპალიტეტის ადმინისტრაციულ შენობებში საშვთა სისტემის შემოღებასთან დაკავშირებით. აღსანიშნავია, რომ ზემოხსენებული მუხლი საკრებულოს თანამდებობის პირთა და საკრებულოს წევრთა მოქალაქეთა მიღების წესს შეეხება და იგი არ არის თანხვედრაში ბრძანების შინაარსთან. შეიძლება ითქვას, რომ მიღებული ადმინისტრაციული აქტი _ საკრებულოს თავმჯდომარის ბრძანება, არ მოდის კანონთან შესაბამისობაში, ეს კი, ზოგადი ადმინისტრაციული კოდექსიდან გამომდინარე, აქტის ბათილობის საფუძველს წარმოადგენს.
დებულების 117-ე მუხლი, განსხვავებით საშვთა სისტემის შემოღებისა, სულ სხვა ვალდებულებებს უწესებს საკრებულოს წარმომადგენლებს, მაგრამ, როგორც ჩანს, ამ ვალდებულებებს საკრებულო არ ახორციელებს. მოქალაქეთა მიღების გრაფიკი და შესაბამისი ოქმი, სადაც მოქალაქეთა მიერ დასმული საკითხები იქნება რეგისტრირებული, საკრებულოს მომავალ სამოქმედო გეგმად უნდა იქცეს.
და ბოლოს, უნდა აღვნიშნო, რომ ძნელია არსებული კანონმდებლობის ფონზე რეალური თვითმმართველობა გახორციელდეს, მაგრამ რის უფლებასაც კანონმდებლობა იძლევა, იგი მაქსიმალურად უნდა იქნას ადგილობრივი ხელისუფლების მიერ გამოყენებული, რათა დაიცვას საკუთარი ამომრჩევლის ინტერესი. ხელისუფლების თითოეულ წარმომადგენელს, განსაკუთრებით კი საკრებულოს წევრს, ყოველთვის უნდა ახსოვდეს, რომ იგი ხალხის სამსახურშია და არა ხალხი მის სამსახურში. ადგილობრივი ხელისუფლება არ უნდა გაურბოდეს ხალხს და ხელოვნურ ბარიერებს (მაგალითად, საშვთა სისტემის შემოღება) არ უნდა უქმნიდეს ამომრჩეველს. მოქალაქეებს ყოველთვის უპრობლემოდ უნდა შეეძლოთ მათი გასაჭირის ხელისუფლებამდე მიტანა, _ ამბობს ტრაპაიძე “გურია ნიუსთან” საუბრისას.
