გაერო-ს ადამიანის უფლებათა უმაღლესი კომისარი ზედ რაად ალ ჰუსეინი უკიდურესად შეშფოთებულია ცენტრალური აფრიკის რესპუბლიკაში საერთაშორისო სამხედრო ძალების მხრიდან არასრულწლოვნებზე სექსუალური ძალადობის შესახებ მორიგ ბრალდებებთან დაკავშირებით.
როგორც კომისარი აცხადებს, დანაშაული 2014 წელს არის ჩადენილი, თუმცა ინფორმაცია ამის შესახებ მხოლოდ რამდენიმე კვირის წინ გავრცელდა.
გაერო-ს განცხადებიდან ირკვევა, რომ გაერო-ს წარმომადგენლებთან საუბრისას რამდენიმე გოგონამ უცხოელი სამხედროების მხრიდან სექსუალური ძალადობის ფაქტები დაადასტურა.
როგორც გოგონები ამბობენ, „დამნაშავეები ცენტრალური აფრიკის რესპუბლიკაში ევროკავშირის ოპერაციის ფარგლებში მსახურობდნენ“.
გაერო-ს უმაღლესი კომისრის განცახდებაში ნათქვამია, რომ ორი გოგონა სამხედროების მიერ გაუპატიურების მსხვერპლი გახდა, ხოლო სამი არასრულწლოვანს ჯარისკაცებმა სექსუალური კავშირისათვის ფული გადაუხადეს. სამხედროების ნაწილის ეროვნება დაუზუსტებელია, თუმცა სექსუალური ძალადობის სამი მსხვერპლი აცხადებს, რომ დამანშავეები ქართული კონტინგენტის წევრები იყვნენ. დანაშაულის ჩადენის დროს ოთხი გოგონა 14-დან 16 წლის ასაკის იყო.
ზედ რაად ალ ჰუსეინის განცხადებაში ასევე ნათქვამია, რომ 7 და 9 წლის ასაკის ბიჭი და გოგო ფრანგი სამხედროების მხრიდან სექსუალურ ძალადობაზე საუბრობენ.
ბავშვები ჰყვებიან, რომ ფრანგი სამხედროები ორალურ სექსს მათ წყლისა და ორცხობილების სანაცვლოდ სთავაზობდნენ. ყველა ინციდენტი ცენტრალური აფრიკის რესპუბლიკის დედაქალაქის აეროპორტთან მდებარე იძულებით გადაადგილებულ პირთა ბანაკში ან მის მახლობლად მოხდა.
ადამიანის უფლებათა გაერო-ს უმაღლესმა კომისარმა გასულ კვირას აღნიშნული საქმეები ევროკავშირის, საქართველოსა და საფრანგეთის ოფიციალურ წარმომადგენლებთან განიხილა. ზედ რაად ალ ჰუსეინის განცახდებაში ნათქვამია, რომ საქართველომ და საფრანგეთმა საქმის გამოძიება უკვე დაიწყეს.
სკანდალში ასევე ფიგურირებენ კიდევე ერთი ქვეყნის სამხედროები, თუმცა გაერო-ში არ ასაჯაროებენ, თუ რომელი სახელმწიფოს ჯარისკაცებზეა საუბარი.
