2012 წლის 5 აპრილს “გურია ნიუსში” გამოქვეყნდა სტატია სათაურით _ “კონტროლის პალატა მოგელაძის თანამშრომლების ვინაობას და ხელფასებს ასაიდუმლოებს”.
8 აპრილს, ადვოკატ მანანა კობახიძისგან, რომელიც ამავდროულად კოალიცია “ქართული ოცნების” საინიციატივო ჯგუფის წევრია, რედაქციაში მოვიდა საპასუხო წერილი, რომელიც ჩვენს მიერ გამოქვეყნებულ სტატიას ეხმაურება.
წერილის შინაარსს უცვლელად გთავაზობთ:
მანანა კობახიძე: “კონტროლის პალატის მიერ გაცხადებული უარი მონიტორინგის სამსახურის თანამშრომელთა ვინაობის, მათი ხელფასებისა თუ პრემიების შესახებ ინფორმაციის გაცემის შესახებ, წარმოადგენს უკანონო გადაწყვეტილებას და უხეშად არღვევს ზოგადი ადმინისტრაციული კოდექსის მოთხოვნებს, რომლის თანახმადაც, საჯარო სამსახურში დასაქმებულ მოხელეთა ვინაობა არის საჯარო, ისევე, როგორც საჯაროა მათი თანამდებობრივი სარგოს შესახებ ინფორმაცია, ვინაიდან მათი ანაზღაურება გაიცემა ბიუჯეტის სახსრებიდან და არ განეკუთვნება არც სახელმწიფო, არც კომერციულ და არც პირად საიდუმლოს.
მართალია, ეს ინფორმაცია შეიცავს პირად მონაცემებს, თუმცა, ის განეკუთვნება გასაჯაროებულ პირად ინფორმაციას, რომლის მიმართაც საზოგადოებას შეიძლება გააჩნდეს განსაკუთრებული ინტერესი და რისი გაცემის ვალდებულებაც საჯარო დაწესებულებას აკისრია, როგორც საქართველოს კონსტიტუციით, ისე ზოგადი ადმინისტრაციული კოდექსის მე-3 თავით.
კონტროლის პალატის ქმედება მაშინაც იყო უკანონო, როდესაც საჯარო გახადა ბატონი ბიძინა ივანიშვილისა და მისი პირადი ადვოკატების კერძოსამართლებრივი ხელშეკრულების შინაარსი, რაც გულისხმობს ამ ხელშეკრულების საფუძველზე კერძო პირის მიერ პირადი სახსრებიდან ადვოკატისთვის გადახდილი ჰონორარების შესახებ ინფორმაციის საჯაროდ გამოქვეყნებას. სწორედ ეს ინფორმაცია წარმოადგენს როგორც პირად, ისე კომერციულ საიდუმლოს. სახელმწიფოს არ აქვს უფლება, თავად პირის თანხმობის გარეშე ან სასამართლოს გადაწყვეტილების გარეშე, გაასაჯაროვოს პირადი მონაცემების შემცველი ინფორმაცია, როცა ეს ეხება კერძო პირთა შემოსავალს, რასაც არავითარი კავშირი არ აქვს ბიუჯეტის სახსრებთან.
რაც ყველაზე მნიშვნელოვანია, კონტროლის პალატას მოქმედი კონსტიტუციით საერთოდ არ ჰქონდა უფლებამოსილება, განეხორციელებინა კერძო პირების ფინანსური კონტროლი, მას მხოლოდ სახელმწიფო დაწესებულებების და ბიუჯეტის სახსრების კონტროლის ფუნქცია აქვს დაკისრებული. შესაბამისად, ყველა ის ქმედება რაც “ქართული იცნების”, ბიძინა ივანიშვილისა და მთელი რიგი კერძო პირების მიმართ იქნა გახორციელებული კონტროლის პალატისა და უშუალოდ მოგელაძის სამსახურის მიერ, არის არაკონსტიტუციური და შესაბამისად, არასამართლიანი.
თუ “გურია ნიუსი” სარჩელს შეიტანს სასამართლოში, ამ საქმის მოგების სრული სამართლებრივი საფუძველი არსებობს, ხოლო შიდა საშუალებების არაეფექტურობის შემთხვევაში, საქმე უდავოდ წარმატებული იქნება ევროსასამართლოში.”
შეგახსენებთ, რომ საქართველოს კონტროლის პალატის პოლიტიკური პარტიების ფინანსური მონიტორინგის სამსახურის საშტატო ნუსხა, რომელსაც საზოგადოებაში ნათია მოგელაძის სამსახურის სახელითაა ცნობილი, 19 საშტატო ერთეულითაა დაკომპლექტებული: სამსახურის უფროსი – 1 საშტატო ერთეული; სამსახურის უფროსის მოადგილე – 1 საშტატო ერთეული; მთავარი კონსულტანტი – 4 საშტატო ერთეული; ექსპერტ-ანალიტიკოსი – 12 საშტატო ერთეული; სპეციალისტი – 1 საშტატო ერთეული.
ეს ჩამონათვალი “გურია ნიუსმა” საქართველოს კონტროლის პალატისგან 4 აპრილს მიიღო 20 მარტს გაგზავნილი წერილის პასუხად.
კონტროლის პალატისთვის გაგზავნილ წერილში, გარდა პოლიტიკური პარტიების ფინანსური მონიტორინგის სამსახურის საშტატო ნუსხისა, ვითხოვდით შესაბამის საშტატო ერთეულზე მომუშავე საჯარო მოსამსახურისა და მათი შრომითი ანაზღაურების მითითებას.
როგორც აღმოჩნდა, ამ ადამიანთა ვინაობას უწყება საგულდაგულოდ ასაიდუმლოებს: “გაცნობებთ, რომ კონტროლის პალატა მოკლებულია შესაძლებლობას, გადმოგცეთ ინფორმაცია ზემოთ აღნიშნულ საშტატო ერთეულებზე მომუშავე საჯარო მოსამსახურეთა ვინაობის შესახებ, მათი თანამდებობრივი სარგოების მითითებით, ვინაიდან ხსენებული ინფორმაცია შეიცავს პერსონალურ მონაცემებს”, _ ასეთი პასუხი მიიღო “გურია ნიუსმა” ადმინისტრაციული დეპარტამენტის უფროსის მოვალეობის შემსრულებლის დავით კაპანაძის ხელმოწერით.
შეგახსენებთ, რომ ეს ის 19 ადამიანია, რომელმაც საქართველოს 295 მოქალაქე დაკითხა. აქედან გამომდინარე, საზოგადოებას სრული უფლება აქვს, იცოდეს მათი ვინაობა. გარდა ამისა, იმ ადამიანებს, რომლებიც მიმდინარე დაკითხვების დროს გახდნენ შეურაცხოფისა და ზეწოლის მსხვერპლნი, აქვთ სრული უფლება, იცოდნენ ვინ ახორციელებდა მათზე ამგვარი სახის ქმედებებს.
ნათია მოგელაძის უწყების თანამშრომლებს უშუალოდ ჰქონდათ ურთიერთობა მოქალაქეებთან და ინფორმაცია მათ შესახებ, არავითარ შემთხვევაში არ შეიძლება, პერსონალურ მონაცემთა სიას მიეკუთვნებოდეს.
