უშგულში, "დედეს" გადამღები ჯგუფი დახმარებას ითხოვს. მათ მიერ გავრცელებული ინფორმაციით, გაუწმენდავი გზების გამო ისინი ვერ ბრუნდებიან თბილისში.
მესტიის გამგებელი, კაპიტონ ჟორჟოლიანი "გურია ნიუსთან" საუბრის დროს ამბობს, რომ "დედეს" გადამღებ ჯგუფს ყურადღება ექცევა და თოვლისგან გზაც იწმინდება. "ტრაქტორი მიდის ახლა უშგულისკენ და იწმინდება გზა. დიდთოვლობის გამო რამდენჯერმე ჩამოწვა ზვავი და აქედან გამომდინარე, იქმნება პრობლემა, მაგრამ ყველას ვაქცევთ ყურადღებას და გზაც იწმინდება."
მისივე თქმით, "დედეს" გადამღები ჯგუფის მხოლოდ ერთ წევრს აქვს სიცხე. "არაფერი ჭირს "დედეს" გადამღებ ჯგუფს, ერთ მათგანს აქვს სიცხე. სახლში უნდათ წასვლა და ამისთვის ყველაფერი არ უნდა მოიგონონ. გვშია, გვწყურიაო, წამლები არ გვაქვსო. მე პირადად გავაგზავნე მათთან მედიკამენტები, ასევე მათ წამლები მესაზღვრეებმაც მიუტანეს. გადამღებ ჯგუფს არც წამლის, არც საკვების და არც სითბოს პრობლემა არ აქვს, ისინი უშგულში ყველაზე კარგ სასტუმროში არიან დაბინავებულები. სასტუმროს მეპატრონესთან პერმანენტული კავშირი გვაქვს" – გვითხრა კაპიტონ ჟორჟოლიანმა.
ჟორჟოლიანის თქმით, პრობლემა შეიქმნა ე.წ. დევისნაშენის მონაკვეთზე, სადაც ყველაზე ვიწრო და რთული გზაა, რის გამოც ტექნიკას გადაადგილება და გაწმენდითი სამუშაოების განხორციელება უჭირს. "გარდა ამისა, 9 ადგილზე იყო ზვავი ჩამოწოლილი და სამუშაოები ამანაც გაართულა. ამ დროისთვის გასაწმენდია 4 კილომეტრიანი მონაკვეთი და თუ დამატებით ზვავი არსად ჩამოწვა, გზის გახსნა და შესაბამისად, გადამღები ჯგუფის ჩამოყვანა დღის ბოლომდე მოხდება. ნუ დაგვავიწყდება, რომ საუბარია ევროპის ყველაზე მაღალმთიან სოფელზე, სადაც საქართველოში ყველა დასახლებულ პუნქტზე მეტი თოვლია, თუმცა მიუხედავად იმისა, რომ ზვავსაშიში მონაკვეთებია, ჩვენ ერთი წუთით არ გავჩერებულვართ. ახლაც აქ ვიმყოფები და გზას ინტენსიურად ვწმენდთ ," – აცხადებს მესტიის გამგებელი.
