ბიუჯეტის ზრდა სტიქიის გამო

სხდომაზე გამგეობის ქონების მართვის, ეკონომიკისა და სოფლის მეურნეობის სამსახურის უფროსმა გიორგი ფაცურიამ "ლანჩხუთის მუნიციპალიტეტის ქონების საპრივატიზაციო ობიექტის ნუსხისა და ლანჩხუთის მუნიციპალიტეტის ქონების პრივატიზაციის გეგმის დამტკიცების შესახებ" ისაუბრა. 

ფაცურიას ინფორმაციით, მუნიციპალიტეტის 2016 წლის საპრივატიზაციო ნუსხაში სულ 41 ობიექტია წარმოდგენილი, რომელთა საერთო ღირებულება 750 000 ლარის ფარგლებშია. მისი თქმით, წარმოდგენილ ნუსხასა და გეგმაში ოთხი ახალი ობიექტია შესული. რაც შეეხება ყოფილ სასტუმროს შენობას, ფაცურიას მიერ წარმოდგენილი საპრივატიზაციო ნუსხის თანახმად, იგი ოც ლოტადაა დაყოფილი და შენობა-ნაგებობის ღირებულება 150 ლარია, ხოლო მიწის _ 619 ათასი ლარი.

საკრებულოს წევრებმა იმსჯელეს და საბოლოოდ, მხარიც დაუჭირეს 2015 წლის #47 დადგენილებაში ცვლილების შეტანას, რომელიც განსახილველად მუნიციპალიტეტის გამგებელმა ზაზა ურუშაძემ წარმოადგინა.

ურუშაძის ინფორმაციით, 2016 წლის სახელმწიფო ბიუჯეტის შესახებ საქართველოს კანონის მე-8 მუხლის მე-4 პუნქტის თანახმად, მუნიციპალიტეტები ვალდებულები არიან განახორციელონ 2016 წელს რეგიონებში გასახორციელებელი პროექტების ფონდიდან დასაფინანსებელი პროექტების თანადაფინანსება, რომლისთვისაც ბიუჯეტიდან გამოიყოფა 50 000 ლარი. გარდა ამისა, მუნიციპალიტეტის გამგეობისა და სამხედრო აღრიცხვისა და გაწვევის სამსახურის შრომის ანაზღაურების ფონდის მოწესრიგებისთვის დამატებით უნდა გამოიყოს 102 500 ლარი. 

მისივე თქმით, მოსალოდნელი სტიქიის სალიკვიდაციო ღონისძიებების აღმოსაფხვრელად ბიუჯეტი უნდა გაიზარდოს 20 000 ლარით, ხოლო 15 000 ლარი ბიუჯეტიდან უნდა მოხმარდეს ინფრასტრუქტურული სამუშაოების პროექტების ექსპერტიზის ჩატარებას. როგორც გაირკვა, აღნიშნული ღონისძიებების დაფინანსება უნდა მოხდეს 2016 წლის 1 იანვრისთვის არსებული თავისუფალი ნაშთის ხარჯზე.

საკრებულოსვე გადაწყვეტილებით ადმინისტრაციული წარმოება დაიწყო "ლანჩხუთის მუნიციპალიტეტის ბიუჯეტიდან, ლანჩხუთის მუნიციპალიტეტის არასამეწარმეო (არაკომერციული) იურიდიული პირის "სპორტული ცენტრისთვის" გამოყოფილი ასიგნებების ფარგლებში, სპორტსმენების, ნაკრები გუნდების, მწვრთნელებისა და წარმომადგენლების სპორტულ ღონისძიებებზე მივლინებისას, კვებით უზრუნველყოფისათვის საჭირო თანხის ოდენობისა და ანაზღაურების წესის დამტკიცების შესახებ", რაც ითვალისწინებს სხვადასხვა სპორტულ ღონისძიებებზე აღნიშნული ცენტრის სპორტსმენების მივლინებისას დღიური ხარჯის ოდენობის განსაზღვრას.