საგაზაფხულო სესია ბიუროს დღევანდელ სხდომაზე გაიხსნა. როგორც პარლამენტის თავმჯდომარემ, დავით უსუფაშვილმა აღნიშნა, "საქართველოს კონსტიტუციისა და პარლამენტის რეგლამენტის შესაბამისად, თებერვლის პირველ სამშაბათს პარლამენტი იწყებს მუშაობას საგაზაფხულო სესიის რეჟიმში."
ბიუროს წევრებმა მიმდინარე კვირის პლენარული სხდომების დღის წესრიგით გათვალისწინებულისაკითხები განიხილეს. დავით უსუფაშვილის განცხადებით, 3 თებერვალს დაგეგმილია საქართველოს პრეზიდენტის ყოველწლიური მოხსენება ქვეყნის მდგომარეობის უმნიშვნელოვანეს საკითხებზე. "რეგლამენტი აზუსტებს ამ საკითხის გამართვის პროცედურებს, მათ შორის იმას, რომ საკითხი იხილება საგაზაფხულო სესიის პირველ სხდომაზე, როგორც წესი. წინა შემთხვევებში, სამწუხაროდ, ეს არ იყო ხოლმე დაცული. ამჯერად კი მოხერხდა პარლამენტის, პრეზიდენტის, საქმეში ჩართული სხვა პირებისა და ორგანოების მონდომებით", – აღნიშნა დავით უსუფაშვილმა.
ბიუროს სხდომაზე იმსჯელეს პრეზიდენტის მოხსენების შემდეგ დეპუტატების გამოსვლების ფორმატზე. ფრაქცია „ერთიანი ნაციონალური მოძრაობის" და ფრაქცია „თავისუფალი დემოკრატების" მოსაზრებით, ფორმატი პოლიტიკური დებატების ფორმატით უნდა გაგრძელდეს.გიორგი გაბაშვილს მიაჩნია, რომ იმ დეპუტატებსაც უნდა მიეცეთ გამოსვლის საშუალება, რომლებიც გაერთიანებული არ არიან არცერთ ფრაქციაში.
უმრავლესობის წევრების მოსაზრებით, პრეზიდენტის მოხსენების შემდეგ სხდომა ფრაქციების ხელმძღვანელების გამოსვლის ფორმატით უნდა გაგრძელდეს. "შარშან და შარშანწინ ფრაქციების გამოსვლის რეჟიმში მოვუსმინეთ ჩვენ პრეზიდენტის მოხსენებას. გთავაზობთ, ისევ იმავე რეჟიმში მოვუსმინოთ პრეზიდენტს", – განაცხადა პარლამენტის თავმჯდომარის მოადგილემ, ზვიად ძიძიგურმა.
ბიუროს წევრებმა კენჭი უყარეს გამოსვლების ფორმატის თაობაზე უმრავლესობისა და უმცირესობის მიერ დასმულ ორი წინადადებას. ბიუროს გადაწყვეტილებით, პრეზიდენტის მოხსენების შემდეგ, საპარლამენტო განხილვა ფრაქციების ხელმძღვანელების გამოსვლის რეჟიმში გაგრძელდება. ასევე გადაწყდა, რომ თითოეული ფრაქციის გამოსვლის ხანგრძლივობა იქნება 15 წუთი.
პარლამენტის სხდომა ხვალ, 3 თებერვალს, 14 სთ-ზე დაიწყება.
დღესვე ბიუროს სხდომაზე იმსჯელეს ოთხშაბათის ტრადიციული განცხადებების ნაწილის გამართვის თაობაზე. იქიდან გამომდინარე, რომ პარლამენტი 1 თვის განმავლობაში არ შეკრებილა და განცხადებების გასაკეთებლად საკითხები დაგროვდა, დავით უსუფაშვილმა ბიუროს წევრებს შესთავაზა, ნაცვლად ოთხშაბათისა, განცხადებების ნაწილი პარასკევს, 5 თებერვლის პლენარულ სხდომაზე ნახევარსაათიან რეჟიმში გაიმართოს.
ბიუროს დღევანდელ სხდომაზე ახალი ფრაქცია "ნაციონალური მოძრაობა – ერთიანი საქართველოსთვის" დარეგისტრირდა.
პარლამენტის თავმჯდომარის ინფორმაციით, ოთხშაბათს, 3 თებერვალს პარლამენტი მუშაობას პლენარული სხდომით დაიწყებს, ხუთშაბათს, 4 თებერვალს საკომიტეტო მოსმენები გაიმართება, ხოლო პარასკევს 5 თებერვალს, დილით ჩატარდება ბიურო, რომელზეც დაზუსტდება პარასკევის პლენარული სხდომის დღის წესრიგი.
