დღეს, საქართველოს მოსახლეობის ერთმა ნაწილმა ელექტრონულ ფოსტაზე “საქართველოს დემოგრაფიული განვითარების ფონდის“ მიერ მომზადებული წერილი მიიღო.
წერილში ნათქვამია, რომ საქართველოს დემოგრაფიული განვითარების ფონდი უპრეცენდენტო და ყველაზე ეროვნულ საქმეს აკეთებს.
“მხოლოდ ჩვენი ორგანიზაცია, საქართველოს დემოგრაფიული განვითარებისთვის და ერის გამრავლების ხელშეწყობის მიზნით, უკვე 16 წელია რაც მთელს ქვეყანაში ვეხმარებით, ადამიანებს ოჯახის შექმნაში…
2014 წლის 5 ნოემბრიდან 19 ნოემბრის ჩათვლით, საქართველოს მოსახლეობის საყოველთაო აღწერით – გავიგოთ რამდენი ვართ, მოქალაქეთა რაოდენობამ 3 729 635 კაცი შეადგინა, რაც წინა 2002 წელის აღწერის (4 371 535 კაცი) შედეგთან შედარებით 14,7 პროცენტით (641 900 კაცი) ნაკლებია.
საქართველოს დემოგრაფიული კატასტროფა უახლოვდება, ქვეყანა საფრთხის წინაშე დგას და მოსახლეობის კლების მაჩვენებლით მსოფლიოში მესამე ადგილზე ვართ.
ამიტომაც, საქართველოს დემოგრაფიული განვითარების ფონდს ფუნქციონირებისთვის ესაჭიროება საზოგადოების, ბიზნესმენთა მხარდაჭერა და ფინანსური დახმარება, რომ ჩვენ შევძლოთ ეფექტური მუშაობის გაგრძელება, მთელი ქვეყნის მასშტაბით და ერთგულად ვემსახუროთ ხალხს,“ _ წერია ფონდის მიერ გავრცელებულ ინფორმაციაში, სადაც ასევე საბანკო რეკვიზიტებია მითითებული.
“გურია ნიუსი“ ფონდის პრეზიდენტს, დავით ხიზანიშვილს დაუკავშირდა და ინტერვიუ ჩაწერა.
დავით ხიზანიშვილის თქმით, ეს ფონდი 2012 წლიდან არსებობს.
_ ალბათ გსმენიათ ერთადერთი გაცნობა-დაოჯახების ცენტრი, რომ არის ქვეყანაში და ამ ორგანიზაციასთან ვართ დაკავშირებული. თავად დემოგრაფიული განვითარების ფონდი დაარსდა 2012 წელს, იქამდე იყო მოქალაქეთა დახმარების კავშირი, რომელიც მუშაობდა ახალი ოჯახების შექმნაზე.
ჩვენს ორგანიზაციას ჰქონდა საკმაოდ კარგი გეგმა, რომელიც შევიტანეთ მთავრობის კანცელარიაში და ასევე ქალაქ თბილისის მერიაშიც შევიტანეთ. ჩვენი მიზანი არის გავაკეთოთ საქართველოს ყველა რაიონში მოსახლეობის აღწერა. ახლა აგიხსნით რაში მდგომარეობს ეს აღწერა, ვნახოთ რამდენი დასაოჯახებელია, რამდენი ქვრივია, რამდენი გაცილებულია და ეს ყველაფერი მონაცემთა ბაზაში განვათავსოთ.
_ ბატონო დავით ეს გასაგებია, საინტერესოა, თქვენი ორგანიზაცია როგორ ეხმარებოდა ადამიანებს ოჯახის შექმნაში?
_ ანუ მოდიან ადამიანები, ვატარებთ რეგისტრაციაში, ივსება სპეციალური სარეგისტრაციო ბლანკი. ბლანკში იწერება: სახელი, გვარი, ასაკი, წონა, ზოდიაქოს ნიშანი, პროფესია. ასევე იწერება იყო თუ ქორწინებაში ნამყოფი, ჰყავდა თუ არა შვილები და ა.შ. შემდეგ გვაქვს მისთვის 12-თვიანი მომსახურება. როგორც კი გამოჩნდება ისეთი ადამიანი, რომელიც ჩვენს ბენეფიციარს სურს, ვუკავშირდებით და ვაცნობთ ერთმანეთს.
_ 12-თვიან მომსახურებაში რა შედის? ეს მომსახურება ფასიანია?
_ ვთქვათ, ბენეფიციარს გავაცანით ერთი ადამიანი და შეიძლება არ მოეწონოს და ეს ურთიერთობა ჩაიშალოს ანუ იმ დღესვე ხომ არ დაოჯახდებიან?! და მეორე გაცნობას ვაკეთებთ. თუ მეორე არ გამოვიდა, მაშინ მესამე გაცნობას ვაკეთებთ.
_ ბატონო დავით, საიდან ხდება თქვენი ფონდის დაფინანსება?
_ მხოლოდ შემოწირულობებით ვარსებობთ… არსებობს საწევრო გადასახადი, რომელიც შეადგენს 70 ლარს. 70 ლარით ხდება წლიური მომსახურება. არსებობენ ადამიანები, რომლებიც ვერ იხდიან ამ თანხას. მივმართე პრემიერ-მინისტრს, თბილისის მერს, რომ მოხდეს ჩვენი ორგანიზაციის დახმარება, მაგრამ ჯერჯერობით წინ ვერ წავიწიეთ.
ვაპირებთ საერთაშორისო ორგანიზაციებს და საპატრიარქოს მივმართოთ, რომ ამ საქმეში დახმარება გაგვიწიონ, რათა ეს მომსახურება უსასყიდლო იყოს და მთელი ქვეყანაში შევაგროვოთ მონაცემთა ერთიანი ბაზა.
