გაზეთ „ქრონიკა პლუსის“ რედაქტორმა, ელისო კილაძემ, „TVპირველზე“, ჟურნალისტ ინგა გრიგოლიას ეთერში განაცხადა, რომ ბიძინა ივანიშვილი „მაესტროში“ განვითარებულ მოვლენებში ორი სანდო ადამიანის მეშვეობით ჩართული იყო.
ასეთ „ორ სანდო ადამიანად“ ივანიშვილის დეიდაშვილი უჩა მამაცაშვილი და გადაცემა 2030-ის ჟურნალისტი დაასახელა, რომლის ვინაობა "გარკვეული ეთიკური მოსაზრებების გამო" არ დაასახელა.
2030-ის რედაქციამ ელისო კილაძეს მოუწოდა, რომ ჟურნალისტის ვინაობა დაესახელებინა, თუმცა კილაძემ აღნიშნა, რომ ის ჟურნალისტის ვინაობას მაშინ დაასახელებს, როცა საჭიროდ ჩათვლის.
საკითხზე კომენტარი გააკეთა ბაია გადაბაძემ გადაცემა 2030-ში გააკეთა და აღნიშნა რომ გადაცემის ჟურნალისტებთან „მაესტროს“ თემაზე არასდროს უსაუბრია.
„2030-ის ჟურნალისტებთან “მაესტროზე” საუბარი არასოდეს მქონია. უჩა მამაცაშვილს პირადად არასოდეს შევხვედრივარ, პირდაპირ კონტაქტზე არც მამაცაშვილი გამოსულა და არც ბიძინა ივანიშვილი" _ აღნიშნა გადაბაძემ.
ამ თემაზე კომენტარი „გურია ნიუსთან“ გააკეთა 2030-ის მთავარმა პროდიუსერმა ვასილ მაღლაფერიძემ.
„ქალბატონ ელისოს, ალბათ, ძალიან დაწყდება გული, როდესაც შეიტყობს, რომ მისთვის, თურმე, არასწორი ინფორმაცია მიუწოდებით გასავრცელებლად.
ასევე, ალბათ, გული დაწყდებათ იმ ჟურნალისტებსაც და ექსპერტებსაც, რომელთაც ამ მცდარი ინფორმაციის საფუძველზე, მცდარი ვარაუდები გამოთქვეს და შესაბამისი დასკვნებიც გააკეთეს, მაგრამ, მიუხედავად ამისა, მაინც უნდა ვთქვა, რომ ამ ინფორმაციას სიმართლესთან არავითარი კავშირი არა აქვს.
რას ვიზამთ, ხდება ხოლმე, ვის არ შეშლია. თუმცა, ეს ტრაგედია ნამდვილად არ გახლავთ, საქართველოში ყოველდღე იმდენი დეზინფორმაცია ვრცელდება, რომ ერთი და ორი ტყუილით მეტი საერთო სურათს ძალიან ვერ დაამძიმებს“ _ აღნიშნა ჩვენთან საუბრისას მაღლაფერიძემ.
„გურია ნიუსი“ ორშაბათს ვასილ მაღლაფერიძესთან ჩაწერილ ექსკლუზიურ ინტერვიუს შემოგთავაზებთ, რომლიდანაც გაიგებთ რა ურთიერთობა აქვს ბიძინა ივანიშვილთან, როგორი პარლამენტი სჭირდება საქართველოს, რამდენად ადეკვატურები არიან დღევანდელი პარლამენტარები და შეძლებს თუ არა „ქართული ოცნება“ არჩევნების მოგებას.
