ლანჩხუთის მუნიციპალიტეტის მიმდინარე წლის მთავარ საფინანსო დოკუმენტში მორიგი ცვლილების განსახორციელებლად დღეს საკრებულოს რიგგარეშე სხდომაზე დეპუტატები შეიკრიბნენ და საკითხთან დაკავშირებით ადმინისტრაციული წარმოების დასაწყებად დადგენილებაც მიიღეს.
გამგეობის საფინანსო-საბიუჯეტო და მუნიციპალური შესყიდვების სამსახურის უფროსის, როლანდ ლაშხიას განმარტებით, მთავრობის განკარგულებით ლანჩხუთის მუნიციპალიტეტს 2016 წელს განსახორციელებელი ინფრასტრუქტურული პროექტების გამო გამოეყო 3419997 ლარი, რომელიც უნდა აისახოს ბიუჯეტის როგორც შემოსავლის, ასევე ხარჯვით ნაწილში.
ამასთან მუნიციპალიტეტის გამგებელმა ზაზა ურუშაძემ განმარტება გააკეთა, რომ ლანჩხუთი იმ ხუთეულშია, რომელსაც აღნიშნული კუთხით ყველაზე მეტი თანხა ერგო.
ლაშხიასვე ინფორმაციით, ყველა მუნიციპალიტეტის ვალდებულებაა რეგიონებში განსახორციელებელი პროექტების ფონდიდან დასაფინანსებელი პროექტების თანადაფინანსება მოახდინოს. აქედან გამომდინარე, ლანჩხუთის ბიუჯეტის საშემოსავლო გადასახადის გეგმა უნდა გაიზარდოს 80 ათასი ლარით.
თუმცა, იქედან გამომდინარე, რომ მიმდინარე წლის ბიუჯეტის საკუთარი შემოსავლების მუხლი ისედაც დაძაბულია და დამატებითი შემოსავლების ფინანსური უზრუნველყოფა სარისკო საქმეა, ამიტომაც, ლაშხიას თქმით, ფინანსთა სამინისტროსთან არსებობს სიტყვიერი შეთანხმება, რომ წლის გარკვეულ პერიოდში ის უზრუნველყოფს აღნიშნული 80 ათასი ლარის ბიუჯეტში ასახვას.
მომხსენებლისვე ცნობით, დიდთოვლობის შედეგად განხორციელებული სტიქიის სალიკვიდაციო რიგი ღონისძიებების გამო, სარეზერვო ფონდის გაზრდაც იგეგმება 5000 ლარით.
აღნიშნული ცვლილებების ასახვა ბიუჯეტში 20 თებერვლამდე უნდა მოესწროს, რისთვისაც ლანჩხუთელ დეპუტატებს კიდევ ერთხელ მოუწევთ რიგგარეშედ შეკრება და ცვლილებისთვის მხარის დაჭერა.
