ჟურნალისტი, რომელსაც მომღერალმა გიორგი გაჩეჩილაძემ („უცნობი“), კომენტარის მიცემის დროს, უსაყვედურა „სოფლური“ გამოხტომებისთვის, შემდეგ კი ეს არაკორექტული გამონათქვამი GDS-ის გადაცემა „2030“-ის ეთერშიც გაიმეორა, თიკო ოსმანოვა აღმოჩნდა. "ინტერვიუს ჩაწერა მინდოდა "მაესტროს" ამბებზე. მითხრა (გიორგი გაჩეჩილაძემ) განცხადება უკვე გავავრცელეო. მე ვუთხარი ვიცი, თუმცა მაინტერესებს რა გეგმები გაქვთ "მაესტროს" გაკოტრებასთან დაკავშირებით და შეხვდებით თუ არა პრემიერს-თქო. მან მითხრა, რასაც შენ აკეთებ ეს არ არის ჟურნალისტიკაო, ნუ გაქვს სოფლური გამოხტომებიო", – იხსენებს გაჩეჩილაძის სიტყვებს, თიკო ოსმანოვა, etanews.ge-სთან საუბრის დროს.
ამასთან დაკავშირებით, გთავაზობთ „რეზონანსის“ რედაქტორის მალხაზ გაგუას შეფასებას, რომელიც მან Media.Ge-სთან კომენტარის დროს გამოთქვა:
„ჟურნალისტი, რომელზეც გუშინ „უცნობმა“ 2030-ის ეთერში არაკორექტული განცხადება გააკეთა, „რეზონანსის“ თანამშრომელია, რომელიც „მაესტროს“ გარშემო მიმდინარე პროცესებს აშუქებს. იგივე, რაც ეთერში თქვა, გია გაჩეჩილაძემ ჟურნალისტსაც უთხრა საკმაოდ არაკორექტული ტონალობით, გეყოფათ ახლა „სოფლური გამოხტომებიო“ და შემდეგ ტელეფონი გათიშა.
„ეს ჩანაწერი არსებობს და იქ კარგად ჩანს, კონკრეტულად რამ გამოიწვია „უცნობის“ გაღიზიანება. კერძოდ კითხვამ, რომელიც კვირიკაშვილთან მის „მეგობრობას“ უკავშირდებოდა. ჟურნალისტმა ჰკითხა, აპირებდა თუ არა „მეგობართან“ შეხვედრას, რადგან მანამდე პრემიერის მისამართით მწვავე განცხადება გააკეთა, საჯარო რეესტრის ჩვენს საწინააღმდეგო გადაწყვეტილებას არ მიიღებდა ზემდგომი ორგანოების ჩარევის გარეშე – ყველაზე ცოტა ქალბატონი იუსტიციის მინისტრის და ჩემი „მეგობრის”, პრემიერისო. სწორედ ამაზე ჰკითხა ჟურნალისტმა, აპირებდა თუ არა კვირიკაშვილთან შეხვედრას და საერთოდ რა გეგმები ჰქონდა, როგორ გააგრძელებდა დავას „მაესტროზე“.
„მაესტროს“ ირგვლილ რაც დავა მიმდინარეობს, ამაზე კომენტარს ვერ გავაკეთებ, მაგრამ ერთ რამეს ვიტყვი, რომ კარგად მესმის, და სავსებით ლოგიკურია, რატომ არ უნდათ არხის ჟურნალისტებს გაჩეჩილაძესთან მუშაობა.
„და ბოლოს, მართალია, არავითარი მნიშვნელობა არა აქვს იმას, ვინ საიდან და როდის ჩამოვიდა, და საერთოდ ამაზე მსჯელობა ცოტა უხერხულადაც მიმაჩნია, მაგრამ უმცროსმა გაჩეჩილაძემ მინდა იცოდეს, რომ ეს ჟურნალისტი არის ეთნიკურად იეზიდი, დაბადებული თბილისში, რომლის წინაპრები ამ ქალაქში მასზე 100 წლით ადრე მაინც არიან ჩამოსულები.“
გიორგი გაჩეჩილაძის ცნობილი ფრაზა ტელეარხ „GDS”-ის ეთერში სტუმრობისას გაჟღერდა.
გადაცემა "2030"-ში გია გაჩეჩილაძემ "მაესტროში" მიმდინარე მოვლენებთან დაკავშირებით ისაუბრა და განაცხადა, რომ უნდა გამოაშკარავდეს ყველა ის მეშანტაჟე, ვინც პროცესებშია ჩართული.
"ახლა მირეკავს ჟურნალისტი და ვეუბნები, ხომ გავაკეთე ამაზე განცხადება, მეტი რაღა უნდა ვთქვა-მეთქი?! არა, მაინც აგრძელებს… ჟურნალისტი, რომელსაც არანაირი განათლება არ აქვს ჟურნალისტურ სფეროში, პირდაპირ არის ერთი თვის ჩამოსული რაიონიდან და მიკროფონი აქვს ხელში დაჭერილი.
არ შეიძლება ასე, არა!… მე არ ვიცი, რა დავარქვა ამას, მაგრამ შეურაცხყოფილი ვარ იმიტომ, რომ ასე მგონია, გადაბაძე ეთერი მართავს ქვეყანას და გვარამია ნიკოლოზი. აშანტაჟებენ ხალხს, აშანტაჟებენ ხელისუფლებას და გააქვთ თავისი" – განაცხადა გაჩეჩილაძემ.
