დღეს ჩოხატაურში “ქართული ოცნების” ოფისი გაიხსნა, რომლის ხელმძღვანელად ოფიციალურად წარადგინეს გოჩა ჯიქია. ოფისის გახსნას დავით ბერძენიშვილი და ბიძინა გუჯაბიძე დაესწრნენ.
ბერძენიშვილის თქმით, ის პოლიტიკურ კოალიციაში გურიის რეგიონის კოორდინატორად დანიშნეს და ამიერიდან, გურიას ხშირად ესტუმრება:
_ ივანიშვილი არის იმედის მომცემი პიროვნება. მომავალი ხელისუფლება მას უკავშირდება და მან კოალიციური, პოლიტიკური გუნდი შემოიკრიბა. დღეს “ქართული ოცნება” ძალიან ტევადი, ძლიერი პოლიტიკური გაერთიანებაა. ნათელია, რომ ხელისუფლება სრულიად შეშფოთებულია. ჩვენ ძალიან ავამუშავეთ სააკაშვილი _ როდის იყო არჩევნებამდე ერთი წლით ადრე იწყებდა ასეთ შეხვედრებს? მაგრამ ძალიან გაცვეთილია ის ქმედებები, რასაც ჩადის დღევანდელი ხელისუფალი, _ აღნიშნა ბერძენიშვილმა.
რესპუბლიკელების ერთ-ერთმა ლიდერმა კოალიციის სამოქმედო პროგრამაზეც ისაუბრა და აღნიშნა, რომ ბიძინა ივანიშვილისთვის და კოალიციისთვის პრიორიტეტს ჯანდაცვა, განათლება და სოფლის მეურნეობა წარმოადგენს.
დავით ბერძენიშვილმა განსაკუთრებული მადლობა მედიას გადაუხადა იმ მუშაობისთვის, რომლებიც ჟურნალისტებმა კონტროლის პალატის ეგზეკუციის დროს გასწიეს:
_ სწორედ ჟურნალისტების დახმარებით შევძელით, რომ ყველას დაენახა, რა ხდებოდა, როგორ ზეწოლას ახორციელებდნენ ჩვენს აქტივისტებზე, უბრალო მოქალაქეებზე. ოზურგეთში საყვედური მითხრა გაზეთმა “ალიონმა” და სავსებით სამართლიანად. ამიტომ, მინდა კიდევ ერთხელ ვთქვა, რომ მარტო “გურია ნიუსს” კი არ ვუხდით მადლობას _ მადლობა ყველას, “ალიონს”, “ლანჩხუთი პლიუსს”, _ განაცხადა ბერძენიშვილმა
ბერძენიშვილი ბიძინა ივანიშვილისთვის მოქალაქეობის არმინიჭების საკითხს შეეხო და აღნიშნა, რომ ამით ხელისუფლებამ თავისი სახე აჩვენა: _ დასავლეთი 2008 წლის მსგავსად, სააკაშვილის ტყუილებზე თვალს აღარ ხუჭავს, _ დასძინა ბერძენიშვილმა.
ოფისის შეხვედრას 100-მდე ადამიანი ესწრებოდა. მათ შორის, სოფელ სამების ტაძრის მოძღვარი, მამა გიორგი (ჟღენტი), რომელმაც დამსწრე საზოგადოება დალოცა და აღნიშნა, რომ ბიძინა ივანიშვილს ის პარაკლისებს უხდის:
_ ღვთისთვის ყველა ერთია, ყველა უფლის შვილია. წირვა-ლოცვის დროს, პატრიარქის შემდეგ, მთავრობაზე და მხედრობაზე ვლოცულობთ, მაგრამ უფალს უნდა, რომ მისი მიმდევარი იყოს ყველა. ყველას ერთმანეთი უნდა უყვარდეს, არ უნდა გვძულდეს. მე ამას თქვენზე არ ვამბობ, მეორე მხრიდან ვამბობ. შენს შვილს რომ ავტომატით სცემ, არ შეიძლება _ ასე არ ხდება. მთელი სულით და გულით უფალს ვევედრები, რომ ყველაფერი კარგად იყოს. ერთმანეთის ტვირთი უნდა ვზიდოთ. ბიძინა ივანიშვილი მე მისი ქველმოქმედებით მიყვარს, მანამდე მიყვარდა, ვიდრე პოლიტიკაში მოვიდოდა. ჯიხეთში, საჩხერელი დედა საბიანა ყვებოდა, რომ მისი ნაშოვნი პირველი მანეთი გაჭირვებულს მოახმარა. როგორ შეიძლება არ დაიჯერო ადამიანის, რომელსაც არც ქველმოქმედება აკლია, არც სახელი _ ასეთ პიროვნებას ყველა ჩაიხუტებს და ხელში აიყვანს. ეს კაცი მოდის და თავს დებს საქართველოსთვის _ მე მას პარაკლისებს ვუხდი, _ აღნიშნა მამა გიორგიმ.
