ხელოვნების დამსახურებული მოღვაწის ჯუმბერ დუნდუას ვარსკვლავი 17 აპრილს, ოზურგეთში, პომპეზურად გაიხსნა. ვარსკვლავის გახსნამდე ალექსანდრე წუწუნავას სახელობის დრამატულ თეატრში ანსამბლ “გურიას” კონცერტი გაიმართა, რომლის ხელმძღვანელი თავად დუნდუაა _ ანსამბლმა კონცერტზე 17 ქართული ცეკვა წარმოადგინა. ერთ-ერთი ცეკვის დროს, იარუსიდან ჩუქურთმის ნატეხი ჩამოვარდა, რის გამოც, როგორც შემდეგ გაირკვა, რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა და კულტურისა და ძეგლთა დაცვის მინისტრმა ნიკოლოზ რურუამ გადაწყვეტილება მიიღეს თეატრის გარემონტების შესახებ.
ჯუმბერ დუნდუა: _ სამი დღის გაკეთებული მქონდა ოპერაცია, როცა დამირეკა ბატონმა რამაზ ნიკოლაიშვილმა და მომილოცა ეს ფაქტი და მამცნო ჩემი ვარსკვლავის გახსნის შესახებ.
ყველას მინდა გითხრათ დიდი მადლობა, რომ მობრძანდით და დამაფასეთ, რომ ნახეთ ჩვენი ნამუშევარი, მინდა ჩვენ ხელმძღვანელობას მადლობა გადავუხადო ამ სიურპრიზისთვის. მე, გაძლევთ პირობას, არ დავიშურებ ჩემს ძალას და ღონეს, თუ კი ბევრს ვიცოცხლებ, ვიშრომებ, ვიმუშავებ და უკეთეს კოლექტივს შევქმნი. ამ ანსამბლში აღზრდილმა 24-მა ბიჭმა იცეკვა სუხიშვილის ანსამბლში, დაახლოებით 14-15 ბიჭმა _ “ერისიონში”. მინდა ფრიდონ სულაბერიძის ანსამბლი დაამშვენოს ჩემმა აღზრდილებმა, იმიტომ, რომ ბატონი ფრიდონი ძალიან მიყვარს.
ვალერი ჩიტაიშვილი, გურიის გუბერნატორი: _ ალბათ, ცეკვის დროს თქვენი ოვაციები, განსაკუთრებული შეძახილები არის ყველაფერი მანიშნებელი იმისა თუ რა დაუღალავი შრომის შედეგად შედგა ეს ყველაფერი, როგორ მიაღწია ბატონმა ჯუმბერმა ყველაფერს და მიხარია, დღეს აქ ვარ და მისი ვარსკვლავის გახსნას ვესწრები.
ნიკოლოზ რურუა, კულტურის და ძეგლთა დაცვის მინისტრი: _ შეიძლება ითქვას, დაგვიანებულ, მაგრამ ძალიან, ძალიან სასიხარულო ცერემონიალში ვიღებ მონაწილეობას. ბატონი ჯუმბერი 55 წელზე მეტია, ემსახურება ქორეოგრაფიას, ისე კარგად, როგორც ამას აკეთებდნენ ჩვენი ქორეოგრაფიის ისტორიაში. ბატონი ჯუმბერი თვითონ არის ვარსკვლავი ქართული ცეკვისა და დღეს რაც აქ ვიხილე, ყველანაირ მოლოდინს გადააჭარბა. ცეცხლი დაანთეს ჯუმბერ დუნდუას აღზრდილებმა. ასევე, მინდა გითხრათ, ახლა მივიღეთ თეატრის რეაბილიტაციის გადაწყვეტილება, რაც უახლოეს მომავალში გახორციელდება.
რამაზ ნიკოლაიშვილი, რეგიონული განვითარებისა და ინფრასტრუქტურის მინისტრი: _ რაღაცა ჩამოვარდა ზევიდან და ამის მერე მივიღეთ გადაწყვეტილება, რომ თეატრი შეკეთდეს. მინდა ყველას მოგესალმოთ და ორიოდე სიტყვა გითხრათ. ოზურგეთში დღეს ქართული ცეკვის მეტრები არიან ჩამოსულები, შეაფასებენ, რომ ეს ხდება ოზურგეთში. სერიოზული სპექტაკლი დადგეს. ყველაფერი გაკეთდა ბატონი დუნდუას საპატივცემულოდ. სამწუხაროდ, ასეთი დღეები ზოგადად ბევრი არ არის. დარწმუნებული ვარ, ჩვენ ყველამ ერთად ვიხარეთ და გავახარეთ ჩვენი უსაყვარლესი ადამიანი. რაც შეეხება ვარსკვლავის გახსნას, დარწმუნებული ვარ დუნდუაზე ღირსეული ადამიანებიც იყვნენ გურიაში, შემდეგაც იქნებიან და ეს არ გათავდება. დღეს თუ ვინმე გურიაში ქართულ და გურულ საქმეს აკეთებს, ეს არის დუნდუა. ეს ბავშვები გვინდა წავიყვანოთ საფრანგეთში, სადაც საახალწლოდ იმართება ქართული დღეები. ბატონმა ჯუმბერმა დიდხანს უნდა იცოცხლოს და ასეთი დღესასწაულები მოგვიწყოს. ნიკას მადლობა მინდა გადავუხადო _ ეს გადაწყვეტილება თავისთავად მინისტრმა მიიღო, თუმცა მე ვიმეტიჩრე და დავურეკე ჯუმბერის _ ვიცოდი, არ იყო კარგად და გავახარე.
თეატრიდან ყველანი შენობის წინ გამოვიდნენ, სადაც ჯუმბერ დუნდუას ვარსკვლავი გაიხსნა.
აღსანიშნავია, რომ საჯარო მოხელეების გარდა, ვარსკვლავის გახსნაზე არავინ მიუპატიჟებიათ. მათ შორის, არც ოპოზიციური პარტიის ლიდერები.
