თინათინ ხიდაშელი შეხვედრებს მართავდა აშშ კონგრესისა და სენატის წარმომადგენლებთან, _ ამის შესახებ “გურია ნიუსს” რესპუბლიკური პარტიის პრესსამსახურმა განუცხადა.
ხიდაშელისა და სენატორ რიჩარდ ლუგარის შეხვედრაზე დეტალურად განიხილეს საქართველოში მიმდინარე წინასაარჩევნო პროცესი.
თინათინ ხიდაშელმა სენატორ ლუგარს დეტალურად გააცნო ვითარება, რომელიც კონტროლის პალატის მიერ მოქალაქეების დატერორებისა და დაშინების კამპანიის შედეგად გახორციელდა.
შეხვედრაზე საუბარი შეეხო კანონმდებლობით შექმნილ ბარიერებს, ბიძინა ივანიშვილისთვის მოქალაქეობის უკანონოდ ჩამორთმევისა და მოქალაქეობის გარშემო არსებულ დღევანდელ მდგომარეობას.
თინათინ ხიდაშელის განცხადებით, სენატორმა განსაკუთრებული ინტერესი გამოხატა მედიის მდგომარეობს მიმართ და იმ შესაძლებლობის შესახებ, რომელიც საქართველოს მეგობარ ქვეყნებს გააჩნიათ საქართველოში თავისუფალი და კონკურენტული საარჩევნო გარემოს ხელშესაწყობად.
შეხვედრის დროს სენატორმა ლუგარმა გამოთქვა სრული მზადყოფნა, პირადად ჩაერთოს წინასაარჩევნოდ ქვეყანაში დემოკრატიული პროცესის მხარდაჭერის პროცესში.
პარალელურ რეჟიმში, დავით უსუფაშვილი ევროსტრუქტურებში ვიზიტს განაგრძობს _ იგი ევროპარლამენტარებს: კრისტიან ვიგენენს, ულრიკე ლუნოჩეკს და კრისტოფ ლიზეკს შეხვდა. სამივე ევროდეპუტატი საქართველოს საკითხებზე აქტიურად მუშაობს ევროპის პარლამენტში.
შეხვედრები გაიმართა ევროსაბჭოს უმაღლესი კომისრის ადამიანის უფლებების საკითხებში ნილ მუჟენექსის ადმინისტრაციის ხელმძღვანელობასთან, ასევე ვენეციის კომისიის წარმომადგენლებთან. შეხვედრა შედგა პოლონელ ევროდეპუტატ თადეუშ ზვიფსკასთანაც.
დავით უსუფაშვილმა ევროპარლამენტარებს, ევროსაბჭოსა და ვენეციის კომისიის წარმომადგენლებს დეტალური ინფორმაცია მიაწოდა საქართველოში არსებულ ბოლოდროინდელ ვითარებაზე, საუბარი შეეხო ბიძინა ივანიშვილის მოქალაქეობის საკითხსაც.
