ლანჩხუთის "გურიამ" ახალი მწვრთნელითა და ახალი გუნდით, საქართველოს საფეხბურთო ჩემპიონატის მეორე წრე ბოლნისში "სიონთან" მატჩით დაიწყო და ერთი ქულა შემატა საკუთარ ქულათა მარაგს.
მატჩი საკმაოდ საინტერესო და დაძაბულ ბრძოლაში წარიმართა. "გურია" არაფრით ჩამოუვარდება ჩემპიონატის ერთ-ერთ ლიდერს და გარკვეულ მომენტებში უკეთესადაც გამოიყურება, განსაკუთრებით ფიზიკური მომზადების მხრივ. თუმცა ურთიერთშეთამაშების თვალსაზრისით დემიდოვის შეგირდებს ჯერ კიდევ ხარვეზები აქვთ.
შეხვედრის პირველ ტაიმში განვითარდა მთავარი მოვლენები. ორივე გოლიც დროის ამ მონაკვეთში იხილა მაყურებელმა. ანგარიში მასპინძლებმა 33 – ე წუთზე გახსნეს, საკმაოდ საეჭვო პენალტით, რომლის რეალიზებისას ვარლამ კილასონია სიზუსტემ არ დააღალატა.
ოთხიოდ წუთში სტუმრებმა ევგენი მოროზენკოს გოლის წყალობით მოახერხეს ანგარიშის გათანაბრება და ტაიმიც ასე მორჩა.
შესვენების შემდგომ ორივე გუნდი ბევრს ეცადა, მაგრამ ეს საკმარისი არ აღმოჩნდა ანგარიშის შესაცვლელად. საბოლოოდ სტუმარ – მასპინძელი ფრეს დასჯერდა და ეს უფრო "გურიასთვის" იყო მისაღები შედეგი.
ამ ქულით ვიქტორ დემიდოვის გუნდი ისევ მეცამეტე ადგილზე დარჩა, ოღონდ სამი ქულით დაშორდა გასავარდნ ზონას. აღსანიშნავია, რომ "გურიას" უშუალო კონკურენტთაგან ყველამ მარცხი იწვნია ამ ტურში. "ზუგდიდმა" და თერჯოლის "საპოვნელამ" შინაურ კედლებში წააგეს შესაბამისად ბათუმისა და თბილისის "დინამოსთან"- 0:1 და 1:2. თბილისის "ლოკომოტივის" შეხვედრა საჩხერის "ჩიხურასთან" კი მოგვიანებით გაიმართება.
ტურის სხვა შეხვედრები ასე დასრულდა:
მერანი – ტორპედო 2:1;
საბურთალო – ცხინვალი 2:2;
შუქურა – სამტრედია 1:1;
კოლხეთი – დილა 0:1.
მომავალი ტური სამშაბათს, 23 თებერვალს გაიმართება და ლანჩხუთს ქობულეთის "შუქურა" ესტუმრება.
"სიონთან" მატჩში "გურიას" სასტარტო შემადგენლობა ასე გამოიყურებოდა: პოლტავცევი, გელაშვილი, ნოზაძე, ჩადუნელი, ნუნიესი, ბენეტი, კილაძე, მოროზენკო, გამყრელიძე, ალავერდაშვილი, ჟუნიორი.
