„ნუ მოკლავ ჯაფარას“ ავტორი ჰარპერ ლი გარდაიცვალა

მსოფლიო ლიტერატურის ბესტსელერის „To Kill a Mockingbird“-ის (ქართულ ენოვანი გამოცემის სახელწოდება – „ნუ მოკლავ ჯაფარას“) ავტორი, პულიტცერის პრემიის ლაურეატი ჰარპერ ლი – 89 წლის ასაკში გარდაიცვალა.
ცნობილი ამერიკელი მწერლის გარდაცვალების ფაქტი მშობლიური ქალაქი მონროვილის მერმა დაადასტურა, სადაც ლი უკანასკნელი წლების განმავლობაში ცხოვრობდა.
ჰარპერ ლი 1926 წელს დაიბადა. 1950-იან წლებში ის ლიტერატურულ ასპარეზზე გამოვიდა და რამდენიმე მოთხრობა გამოაქვეყნა. 1959 წელს ჰარპერ ლიმ დაასრულა რომანი „ნუ მოკლავ ჯაფარას“, რომელმაც მწერალს უდიდესი აღიარება მოუპოვა.
რომანი 1960 წელს გამოქვეყნდა და დღემდე მსოფლიო ბესტსელერად რჩება. 2008 წელს ინტერნეტ-მაღაზია „Play.com“-ის გამოკითხვის თანახმად ის „ყველა დროის საუკეთესო წიგნად“ დასახელდა. 2003 წელს გამოქვეყნებულ რეიტინგში – „BBC-ის ვერსიით 200 საუკეთესო წიგნი“, რომანმა  მეექვსე ადგილი დაიკავა.
1962 წელს რეჟისორმა რობერტ მალიგანმა ნაწარმოების მიხედვით იმავე სახელწოდების ფილმი გადაიღო, რომელშიც მთავარი როლი გრეგორი პეკმა შეასრულა. ფილმი 3 ოსკარით, მათ შორის საუკეთესო ფილმისთვის დაწესებული პრემიით დაჯილდოვდა.
რომანის დიდი წარმატების მიუხედავად, ჰარპერ ლის არცერთი დასრულებული ნაწარმოები აღარ შეუქმნია (ჯერომ სელინჯერის მსგავსად) და საჯაროდ გამოჩენას ერიდებოდა.

წყარო: