„გურია ნიუსის“ ინფორმაციით, ბიძინა ივანიშვილი განმუხურში დენდროლოგიურ პარკს აკეთებს. პარკში იშვიათი ჯიშის ხეები და მცენარეები დაირგვება, მოეწყობა დასასვენებელი ადგილები და იქ შესვლა უფასო იქნება.
როგორც გვითხრეს, გალის მონაპირე სოფელში უნიკალური პარკის მშენებლობას ფონდი „ქართუ“ აფინანსებს და მისი ღირებულება რამდენიმე მილიონია.
აღნიშნულ ინფორმაციას „ქართუს“ პრესსამსახურის ხელმძღვანელი გიორგი უძილაური ჩვენთან საუბრისას არც უარყოფს და არც ადასტურებს.
ამ თემაზე არც ზუგდიდის მუნიციპალიტეტის ხელმძღვანელი პირები საუბრობენ.
განმუხური 13კმ სიგრძეზე გაშლილი სოფელია, რომელსაც მას ჩრდილოეთით ესაზღვრება გალის რაიონის სოფლები _ – ფიჩორი და ოტობაია, სამხრეთით სოფელი დარჩელი და ანაკლია, რომელთაგან გამოყოფილია მდინარე ენგურით.
აღსანიშნავია, რომ ზუგდიდის მუნიციპალიტეტის ტერიტორია ტყის რესურსით საკმაოდ ღარიბია.
„მუნიციპალიტეტის ტერიტორიაზე აქა-იქაა შემორჩენილი კოლხური ტიპის ტყეები. ოდიშის დაბლობის დაბალი ნაწილი (20-25მ-დე) დაჭაობებულია. ტყის ფართობი შეადგენს 9 200 ჰა-ს, საკოლმეურნეო ტყეები დეგრადირებულია. მუნიციპალიტეტში არის ძირითადად ჭალისპირა ტყეები _ ნარაზენში, ჯიხაშკარში; ტყეები სანაპირო ზოლში _ განმუხურში, ანაკლიაში; და ტყეები დაცულ ტერიტორიებში _კოლხეთის ეროვნული პარკში 1 098ჰა,“ _ ვკითხულობთ ნალ-ას მიერ მომზადებულ ანგარიშში, რომელიც საქართველოს რეგიონებში კლიმატის ცვლილებისა და ზემოქმედების შერბილების ზომების ინსტიტუციონალიზაციას ეხება.
ამავე ანგარიშის მიხედვით, „მუნიციპალიტეტის ტერიტორიაზე ისტორიულად არსებობდა ქარსაცავი ზოლები, მაგრამ დღეს საერთოდ არაფერი არაა დარჩენილი. ქარსაცავი ზოლების ბოლო ინვენტარიზაცია ჩატარდა 1983 წელს. მუნიციპალიტეტში ამ ინვენტარიზაციის შედეგების შესახებ ინფორმაცია არ აქვთ.
ქარსაცავი ზოლების აღდგენა-გაშენება მუნიციპალიტეტში არ ხორციელდება და მსგავსი ღონისძიებები არ არის დაგეგმილი.
მუნიციპალიტეტში არ ხდება ტყის ბუნებრივი აღდგენის მონიტორინგი. ბოლო 10 წლისა მანძილზე მუნიციპალიტეტში არ ჩატარებულა ტყეების მოვლისა და აღდგენის ღონისძიებები. ასევე არ განხორციელებულა ტყეების გაშენების პროექტები“.
როგორც გვითხრეს ივანიშვილი, განმუხურში, გარდა პარკისა, სანერგე მეურნეობასაც აკეთებს, სადაც უნიკალური ჯიშის მცენარეებს და ხეებს გაახარებენ.
შეგახსენებთ, რომ „ქართუს“ დაფინანსებით, დენდროლოგიური პარკი ოზურგეთის მუნიციპალიტეტში ნატანებსა და შეკვეთილშიც კეთდება.
საზოგადოების ნაწილი მიიჩნევს, რომ ამ პროექტებისთვის ზრდასრული ხეების გადარგვა დაუშვებელია და პროცესში კანონმდებლობით მოთხოვნილი ნორმებია დარღვეული.
ამავე თემაზე: ექსკლუზიური ფოტორეპორტაჟი _ რას აშენებს ივანიშვილი შეკვეთილში; რატომ "შემორაგვა“ ბიძინა ივანიშვილმა კიპარისები _ ვიდეოკადრები წვერმაღალიდან
