"თავისუფალი დემოკრატების" ერთ-ერთი ლიდერი, თემურ სალუქვაძე ამბობს, რომ რეგიონის (რაიონის) სოციალურ-ეკონომიკური საკითხების განხილვაში აქტიური მონაწილეობა უნდა მიიღონ ოპოზიციური პოლიტიკური პარტიების იმ წარმომადგენლებმა, რომლებსაც სხვადასხვა მიმართულებით გააჩნიათ შესაბამისი მაღალკვალიფიციური კომპეტენცია, დაგროვილი გამოცდილება და პროფესიონალიზმი.
"თითქმის, ყოველდღიურ რეჟიმში თვალყურს ვადევნებთ, თუ როგორ უშვებს შეცდომებს ხელისუფლება. ამ შეცდომების ერთ-ერთი მიზეზი, სწორედ, ვიწრო წრეში, ან ერთპიროვნულად მიღებული არაკომპეტენტური გადაწყვეტილებებია. საბოლოოდ კი, ეს მძიმედ ისახება მოსახლეობის კეთილდღეობაზე. შეგახსენებთ, ყველა ცივილურ, დემოკრატიულ, პლურალისტურ სისტემაში ოპოზიციური ძალები განხილულია, როგორც პოლიტიკური ცხოვრების შემადგენელი ნაწილი და მათი აქტიური მონაწილეობა, ეკონომიკურ თუ პოლიტიკურ ცხოვრებაში, ხშირ შემთხვევაში, უზრუნველყოფს სწორი გადაწყვეტილებების მიღებას", _ ამბობს თემურ სალუქვაძე.
მისივე თქმით, ასევე, აუცილებელია, ოპოზიციური პოლიტიკური ძალების შესაბამისი ინფორმაციებით სრულფასოვანი უზრუნველყოფა. დემოკრატიული სამყარო ურთიერთობის, პოლიტიკური თანაცხოვრების, მართვისა და ორგანიზების სხვა ფორმებს არ იცნობს. ამ პრინციპების უგულებელყოფას ხელისუფლება მიჰყავს მხოლოდ და მხოლოდ თვითიზოლაციასა და ერთპიროვნული მართველობისკენ. ასეთი სისტემა კი, დღევანდელ რეალობაში განწირულია და მას მომავალი არ გააჩნია.
გურიის გუბერნატორი გია სალუქვაძე თემურ სალუქვაძის განცხადების პასუხად ამბობს:
"გავეცანი "თავისუფალი დემოკრატების" ერთ-ერთი ლიდერის, თემურ სალუქვაძის განცხადებას, რომელშიც ამბობს, რომ გურიის რეგიონის სოციალურ-ეკონომიკური საკითხების განხილვაში აქტიური მონაწილეობა ოპოზიციური პოლიტიკური პარტიების წარმომადგენლებმა უნდა მიიღონ. ის, ასევე, საუბრობს ხელისუფლების შეცდომაზე, რომლის მიზეზადაც ვიწრო წრეში, ან ერთპიროვნულად მიღებულ არაკომპეტენტურ გადაწყვეტილებებს ასახელებს. ამასთან დაკავშირებით, ვაცხადებთ, რომ დღეს არანაირი ერთპიროვნული გადაწყვეტილებების მიღება არ ხდება, უფრო მეტიც, როდესაც გურიის გუბერნატორად დავინიშნე, შევხვდი როგორც ქალაქ ოზურგეთის მუნიციპალიტეტის, ისე თემის საკრებულოს წევრებს, მათთან თანამშრომლობისთვის სრული მზადყოფნა გამოვთქვი და აღვნიშნე, რომ ნებისმიერ გადაწყვეტილებაში, რომელიც რეგიონის განვითარებისთვის არის საჭირო, მათ გვერდით ვიქნებოდი. უნდა აღვინიშნო ისიც, რომ ჩემი არაერთგზის შეთავაზებისა მათი მხრიდან, გამოხმაურება ამ დრომდე არ ყოფილა. თემურ სალუქვაძე აღნიშნულ სხდომებს არ ესწრებოდა და იქნებ, გაგვახსენოს, მისი ხელისუფლებაში ყოფნის დროს, როგორ თანამშრომლობდა ის ოპოზიციასთან?
აღსანიშნავია ისიც, რომ საკრებულოს ოპოზიციურ წევრებს სრული წვდომა აქვთ მუნიციპალიტეტების მიერ მისაღებ გადაწყვეტილებების საჯარო განხილვებზე. მიუხედავად ამ ყველაფრისა, ჩვენ სრულ მზადყოფნაში ვართ რეგიონისთვის საჭირბოროტო საკითხებთან დაკავშირებით ოპოზიციისგან მოვისმინოთ ნებისმიერი სახის შემოთავაზებები", _ თქვა გია სალუქვაძემ.
