სკანდალური საქმის პროკურორი საკადრო გადაადგილებაში მოყვა

საქართველოს მთავარმა პროკურორმა ირაკლი შოთაძემ საქართველოს პროკურატურის მუშაობის ეფექტურობის გაზრდის მიზნით შიდა საკადრო ცვლილებები განახორციელა.

საკადრო გადაადგილებების შედეგად ძირითადად ცვლილებები საოლქო და რაიონული პროკურატურების ხელმძღვანელებს შეეხო.

დასავლეთ საქართველოს საოლქო პროკურორად ავთანდილ კოჭლამაზაშვილი, აჭარის ავტონომიური რესპუბლიკის პროკურორად ლევან პაქსაშვილი, ქვემო ქართლის საოლქო პროკურორად ლევან გეგეჭკორი,  შიდა ქართლისა და მცხეთა-მთიანეთის საოლქო პროკურორად შოთა ტყეშელაშვილი,  სამეგრელო-ზემო სვანეთის საოლქო პროკურორად ილია ჯალაღანია დაინიშნა.

დაწინაურებული პროკურორებიდან რამდენიმე გახმაურებული საქმის ყოფილი პროკურორია. მათ წარმოებაში არსებულ საქმეებთან დაკავშირებით როგორც საზოგადოებას, ასევე პოლიტიკოსებს  კითხვის ნიშნები დღემდე აქვთ.

უკვე დასავლეთ საქართველოს საოლქო პროკურორის ავთანდილ კოჭლამაზაშვილის მოღვაწეობისა და მის მიერ განხილული საქმეების შესახებ "გურია ნიუსის" არქივში საკმაოდ საინტერესო მასალები ინახება.

კერძოდ, კოჭლამაზაშვილის სახელი უკავშირდება სკანდალურ საქმეს, რომლის გარშემოც საზოგადოების ინტერესი 2010 წლის შემდეგ არ შეწყვეტილა.

საქმე, 2010 წლის ივნისში, დასავლეთ საქართველოში, სოფელ ტყაჩირში, სათბურში აღმოჩენილ 1 700 000 ევროს ეხება. ამ, ე.წ. ნარკოტრეფიკის საქმის ზედამხედველი პროკურორი ქუთაისის სააპელაციო სასამართლოში სწორედ ავთანდილ კოჭლამაზაშვილი გახლდათ.

ნარკოტრეფიკის საქმეში ბრალდებული მთავარი მოქმედი პირის, ნუგზარ ბოჭორიშვილის ყოფილი ადვოკატი, ამჟამად, საქართველოს პარლამენტის ვიცე-სპიკერი მანანა კობახიძე სწორედ კოჭლამაზაშვილს ადანაშაულებდა ნივთმტკიცებების გაყალბებაში.

2015 წლის დეკემბერში, გაზეთ "პრაიმ ტაიმისთვის" მიცემულ ინტერვიუში მანანა კობახიძე არ გამორიცხავდა, "შეწყალების საქმის" სკანდალის უკან კონკრეტული თანამდებობის პირები ყოფილიყვნენ. კერძოდ, კობახიძე პროკურორ კოჭლამაზაშვილის გვარს ასახელებდა და ამბობდა, რომ კოჭლამაზაშვილი ე.წ. კოკაინის საქმის რეალური გამოძიებით არ არის დაინტერესებული.

"ამ საქმის გამოძიებით არ არიან დაინტერესებულნი კონკრეტული პირები. ზუსტად ვიცი, რომ ე.წ. კოკაინის საქმის პროკურორი დღესაც მუშაობს პროკურატურაში. ეს გახლავთ ავთანდილ კოჭლამაზაშვილი. შესაძლოა, ის დღეს თავის მოვალეობებს მშვენივრად ასრულებს, მაგრამ მაქვს ეჭვი, რომ ამ საქმეზე ჭეშმარიტების დადგენის ინტერესი არ გააჩნია, ისევე როგორც ქვედა დონეზე მომუშავე რამდენიმე გამომძიებელს, რომელიც იმ პერიოდში კუდ–ში მუშაობდა. მათ ინტერესში არ არის, გამოძიება ობიექტურად წარიმართოს, რადგან ასეთ შემთხვევაში შესაძლოა, მათი სახელები ზედაპირზე ამოვიდეს. ძალიან სერიოზული კითხვებია ამ საქმის ირგვლივ და ერთხელ და სამუდამოდ ყველაფერს თავისი სახელი უნდა დაერქვას.

ამ საქმიდან ამოღებულია საკმაოდ დიდი თანხა, დაახლოებით, 1 მილიონ 700 ათასი ევრო, საიდანაც დაახლოებით ნახევარ მილიონ ევრომდე მიითვისეს ყოფილმა მაღალჩინოსნებმა. სახელმწიფო ბიუჯეტში ამ თანხის მხოლოდ ნაწილი იქნა შეტანილი, ისიც მას შემდეგ, რაც არჩევნებში დამარცხდნენ და პირველივე დღეებში გადარიცხეს ხაზინაში დარჩენილი თანხა. სად წავიდა და ვინ გაფლანგა ნახევარი მილიონი ევრო, ეს სწორედ პროკურატურამ უნდა გაარკვიოს და სწორედ ამიტომ, არ გამოვრიცხავ, რომ ამ საქმის ირგვლივ ხელოვნურად აგორებული სკანდალი კონკრეტული პირების ინტერესებს ემსახურება და შესაძლოა, პროკურატურაში ჩემ მიერ გადაგზავნილი განცხადებების რეაგირების გარეშე დატოვებაც სწორედ ამას უკავშირდებოდეს. აშკარაა, რომ ამ საქმის ობიექტური გამოძიება ვიღაცას უხერხულობას უქმნიდა და შიგნიდანვე შეთხზა ბინძური, შეგნებულად დამახინჯებული ინფორმაცია, შემდეგ მიიტანა ელისაშვილამდე, რომელთანაც შეწყალების კომისიაში მე განცხადებები უკვე გადაგზავნილი მქონდა, რაც თითქოს უფრო მეტ დამაჯერებლობას სძენდა ჩემი დისკრედიტაციის მიზნით წინასწარ დაგეგმილ კამპანიას", – აცხადებდა მანანა კობახიძე.

მანამდე კი, 2014 წელს, "გურია ნიუსისთვის" მიცემულ ინტერვიუში , იგივეს ამბობდა, ე.წ. ნარკოკარტელის საქმეში ბრალდებული ნუგზარ ბოჭორიშვილიც.

"ტყაჩირიდან მილიონ შვიდასი ათასი ევრო იყო წაღებული, აქედან  კი ბიუჯეტში, როგორც ვიცი, მილიონ ასი ათასი შეიტანეს  2012 წლის არჩევნების შემდეგ. დანარჩენი  600 ათასი სად არის არ ვიცი. პროკურატურა ამ ფაქტსაც ასაიდუმლოებს და იმ მიმოწერასაც, რაც საქართველოს ინტერპოლს პანამის და ეკვადორის ინტერპოლთან აქვს. იქედანაც მოგვივიდა პასუხი, რომ მიმოწერა გასაიდუმლოებულია. საქმე კი ადგილიდან არ იძვრის. გვეუბნებიან, რომ სახსრები არ გვყოფნის საქმე გამოვიძიოთ, დაგველოდეთო.

დანამდვილებით ვიცი, რომ საქმის გამოძიებას პროკურატურიდან ხელს უშლიან. მაგალითად, ავთანდილ  კოჭლამაზაშვილი, რომელიც ჩვენი საქმის პროკურორი იყო, თანამდებობიდან კი არ გაათავისუფლეს, კიდევ უფრო მაღალ თანამდებობაზე დაინიშნა. ასეთი კადრების ყოლას, სულ რომ არ ჰყავდეთ ის ჯობია. მათი გამოძიებული რა უნდა იყოს", _ აღნიშნავდა ბოჭორიშვილი.

თუმცა, ნუგზარ ბოჭორიშვილის ადვოკატი ლალი აფციაური ახლა "გურია ნიუსთან" საუბრისას აღნიშნავს, რომ ავთანდილ კოჭლამაზაშვილი მხოლოდ პროკურატურის მაღალჩინოსნების დაკვეთის შემსრულებელი იყო.

"კოჭლამაზაშვილი იყო რიგითი პროკურორი, არანაირი გადაწყვეტილების მიმღები  არ ყოფილა. მას არავინ არაფერს ეკითხებოდა. პირადულ  საუბრებში ყოველთვის მხრებს – იჩეჩავდა მე რა ვქნაო?! პროცესიდან გამომდინარე, კოჭლამაზაშვილის მიმართ ცუდი განწყობა არ დამრჩენია. მუდმივად ვგრძნობდი რომ თავს იქეთ ძალა არ ჰქონდა. დავალების შემსრულებელი იყო. მან თავისი თვალით ნახა ყველაფერი პროცესებზე, მაგრამ როგორც კი ხმას ამოიღებდა, დარწმუნებული ვარ, ბოჭორიშვილის გააცილებდნენ. შეიძლება სამუდამოც კი მიესაჯათ მაგისთვის, ხმის ამოღების შემთხვევაში.

ვერ გეტყვით, რას უნდა ნიშნავდეს მისი დაწინაურება. თუ არ ვცდები, ბოლოს ქვემო ქართლის  პროკურორი იყო. იგივე პოზიციაზე გადაიყვანეს დასავლეთ საქართველოში. ეს  დაწინაურებაა? მგონი, ცხრა მთას იქეთ გადააგდეს", _აღნიშნავს აფციაური.

მისივე ინფორმაციით, ე.წ. ნარკოკარტელის საქმეზე ორი გამოძიება მიმდინარეობს. ერთი ბრალდებული პირების მიმართვების საფუძველზე და მეორე ე.წ. შეწყალების საქმეზე.

"დაახლებით, 6-7 თვის უკან შეიტანა ანასტასია ზაუტაშვილის ადვოკატმა, მირიან ნიკოლაძემ საქმე პროკურატურაში. ცნობილი ფირი, სადაც ზაუტაშვილია აღბეჭდილი, მისი თქმით გაყალბებულია. ბოჭორიშვილი, ზაუტაშვილი და დანარჩენი პირები მუდმივ რეჟიმში ჩივიან. ეს ადამიანები მტკიცებულებების გარეშე არიან პატიმრობაში. ბუნებაში არ არსებობს მათ წინააღმდეგ არანაირი მტკიცებულება. უსაშინლესი საქმეა, გაყალბებული. ზოგი ჭირი მარგებელიაო, ისე გამოვიდა; ალეკო ელისაშვილის განცხადების მერე მაინც წაიკითხონ ეს საქმე და მიხვდებიან რომ ეს ადამიანები უდანაშაულოები არიან. რაც შეეხება თვითონ შეწყალების საქმის სკანდალს, მე ვიცი ბოჭორიშვილის და სხვა პირების ფინანსური მდგომარეობა. წარმოუდგენელია ფული გადაეხადათ", _ ამბობს აფციაური.

გარდა "ნარკოტრეფიკის" საქმისა, ავთანდილ კოჭლამაზაშვილი იყო ერთ-ერთი პროკურორი, რომელიც მონაწილეობდა 2012 წელს, გენერალ თამაზ თამაზაშვილისთვის, ციხის კადრებთან დაკავშირებით წაყენებული ბრალის საქმეში;

ასევე, ავთანდილ კოჭლამაზაშვილი მონაწილეობდა კომპანია "გლობალ ტვ"-ის დაყადაღების საქმეში და  "გლობალ ტვ"-ის უცხოელი მეწილის ალექსანდრე რონჟესის დაკითხვებში.

"გურია ნიუსი" ეცადა დაკავშირებოდა მთავარი პროკურატურის პრესსამსახურს და გაერკვია, რა დამსახურების მიხედვით გადაიყვანეს კოჭლამაზაშვილი დასავლეთ საქართველოს საოლქო პროკურორად, თუმცა, პროკურატურაში ჩვენს სატელეფონო ზარებისა და შეტყობინებებისთვის ამ დრომდე არ უპასუხიათ.

კოჭლამაზაშვილის ბიოგრაფიული მონაცემები მთავარი პროკურატურის ვებ-გვერდზე ჯერჯერობით არ იძებნება. თუმცა, საჯარო სამსახურის ბიუროს ვებ-გვერდზე განთავსებული ქონებრივი დეკლარაციის მიხედვით, ის 2014 წლიდან ქვემო ქართლის საოლქო პროკურორი იყო.

მანამდე კი, მთავარი პროკურატურის უმსხვილეს დეპარტამენტს ხელმძღვანელობდა, რომელიც შინაგან საქმეთა სამინისტროს საზოგადოებრივი უსაფრთხოების სამსახურებში, სახელმწიფო დაცვის სპეციალურ სამსახურში, დაზვერვის სამსახურში, თავდაცვისა და სასჯელაღსრულების, პრობაციისა და იურიდიული დახმარების საკითხთა სამინისტროებში გამოძიების საპროცესო ხელმძღვანელობასა და ოპერატიულ-სამძებრო საქმიანობას უწევდა  ზედამხედველობას.