(გურია ნიუსი, ლანჩხუთი) _ პარასკევს, ლანჩხუთის საკრებულოს მორიგი სესია გაიმართა, რომელზეც 2011 წლის ბიუჯეტი დაამტკიცეს. 
აღსანიშნავია ის ფაქტიც, რომ ბიუჯეტის დამტკიცებას არ დასწრებია საკრებულოს არც ერთი ოპოზიციონერი წევრი. როგორც სხდომათა დარბაზში განმარტეს, საკრებულოს სესიის შესახებ ოპოზიცია ინფორმირებული ნამდვილად იყო. მოკლედ, წლის მთავარი საფინანსო დოკუმენტი ზედმეტი ხმაურისა და დებატების გარეშე დაამტკიცეს _ უმრავლესობა ერთიანი აღმოჩნდა და გამგეობის მიერ წარმოდგენილი პროექტის განხილვა სულ ორიოდ საათში დაასრულეს.
როგორც სესიაზე ითქვა, ნოემბერში კანონში შევიდა ცვლილება და ამიტომ თითოეულ სათამაშო აპარატზე მოსაკრებელი იზრდება _ ამიერიდან ერთ სათამაშო აპარატზე კვარტალში 1 500 ლარი, ხოლო ტოტალიზატორის, ბინგოს, ლოტოს თითოეულ სალაროზე კვარტალში 3750 ლარი იქნება მოსაკრებლის სახით გადასახდელი.
საკრებულოს თავმჯდომარის რევაზ ჩიტიძის განმარტებით, საკრებულოს და გამგეობის ოფიციალურ ვებგვერდზე ჩატარდა გამოკითხვა, თუ რა პრიორიტეტებს ანიჭებს მოსახლეობა 2011 წლისთვის და აღმოჩნდა, რომ მთავარი სოციალური პროექტებია: _ ჩვენ მაქსიმალურად ვეცადეთ, რომ შესაძლებლობის ფარგლებში მოგვეხდინა სხვადასხვა სოციალური პროექტების დაფინანსების გაგრძელება. რამდენიმე მათგანში მომავალი წლიდან სიახლეები იგეგმება, _თქვა ჩიტიძემ. ახალშობილთა პირველადი საჭიროების ერთჯერადი დახმარება ამიერიდან 200 ლარი იქნება, ოღონდ ის მხოლოდ იმ ოჯახებს გადაეცემათ, რომელთა სარეიტინგო ქულა (სოციალური მომსახურების სააგენტოს მიხედვით) 70 ათასიდან 100 ათასამდეა; გაგრძელდება უფასო სასადილოს პროგრამაც, რომლისთვისაც მომავალ წელს 60 340 ლარს გაითვალისწინებენ; ომის მონაწილეთა დახმარების პროგრამისთვის 2011 წელს 30400 ლარია გათვალისწინებული. აქედან, მეორე მსოფლიო ომის მონაწილეთა ერთჯერადი დახმარებისთვის _ 50-50 ლარი, აფხაზეთსა და სამაჩაბლოში მიმდინარე საომარი მოქმედებების დროს დაღუპულთა ოჯახებისთვის ყოველთვიურად _ 50 ლარი, ხოლო სარიტუალო ხარჯებისთვის _ 250 ლარი; მომავალ წელს დევნილებს კვლავ გადაეცემათ საშეშე მერქნის შესაძენად თანხა. ქალაქის მაცხოვრებლები კი იმ შემთხვევაში მიიღებს ამ თანხას, თუ მათი სარეიტინგო ქულა 57 ათასიდან 100 ათასამდეა; მოხდება ასევე ოპერაციების თანადაფინანსება. თუმცა, აქ ზედა ზღვრად 500 ლარია განსაზღვრული. ამ თანხას ის ადამიანები მიიღებენ, რომელთა სარეიტინგო ქულა 70 ათასიდან 100 ათასს შორისაა; მეწყრისა და სტიქიური უბედურებისთვის 30 ათასი ლარია გათვალისწინებული _ ამ თანხით მოხდება დაზარალებულთათვის საცხოვრებელი ბინის ქირის გადახდა ერთი წლის მანძილზე; გაგრძელდება მრავალშვილიანი ოჯახების დაფინანსება _ თანხას ის ოჯახები მიიღებენ, რომელთა სარეიტინგო ქულა 57 ათასიდან 100 ათასამდეა; სამსახურებრივი მოვალეობის შესრულებისას დაღუპულ პოლიციელთა ოჯახებს მომავალშიც გადაეცემათ ერთჯერადი დახმარება 350 ლარის ოდენობით; საბავშვო ბაღებთან დაკავშირებითაც იქნება შეღავათები _ სოციალურად დაუცველ ბავშვებს, დევნილებს, მრავალშვილიანი ოჯახის და მარტოხელა დედების შვილებს ბაღში არსებული გადასახადის გადახდა არ მოუწევთ. თუ ერთი ოჯახიდან 2 ბავშვი დადის ბაღში, მაშინ გადასახადი მხოლოდ ერთ ბავშვზე იქნება გადასახდელი. ასევე გათვალისწინებულია მაღალმთიან სოფლებში მოსწავლეთა ტრანსპორტირების ხარჯები.
ამ საკითხების განხილვის შემდეგ, ლანჩხუთის საფინანსო სამსახურის უფროსმა როლანდ ლაშხიამ საკრებულოს 2011 წლის ბიუჯეტში ხარჯვითი ნაწილი გააცნო: _ ლანჩხუთის მუნიციპალიტეტის 2011 წლის ბიუჯეტის პროექტით შემოსავლების ნაწილი 4 720.4 ათასი ლარით განისაზღვრა, მათ შორის სახელმწიფო ბიუჯეტიდან გადმოსაცემი გათანაბრებითი ტრანსფერი 3 583.3 ათასი ლარია. ხარჯები კი ასე გადანაწილდება: მუნიციპალიტეტის საკრებულოს დაფინანსებაზე მიმართულია 362.41 ათასი ლარი (ხარჯების 7.7%); მუნიციპალიტეტის გამგეობის (სამსახურების ჩათვლით) ფუნქციონირებისათვის მიმართულია 1 002,11 ათასი ლარი (ხარჯების 21.2%); მუნიციპალიტეტის სახანძრო დაცვის სამსახურის შენახვაზე _ 155.88 ათასი ლარი; შსს ადგილობრივი ორგანოების დაფინანსება 62.0 ათას ლარს შეადგენს; თავდაცვის ღონისძიებებზე მიმართულია 114.4 ათასი ლარი; ინფრასტრუქტურის მშენებლობის, რეაბილიტაციისა და ექსპლოატაციის ღონისძიებებზე გამოიყო 718.0 ათასი ლარი; ა(ა)იპ “სკოლამდელ საგანამანათლებლო სააღმზრდელო ცენტრის” დაფინანსება შეადგენს 529.83 ათას ლარს; სპორტული და კულტურული ღონისძიებების დაფინანსებისათვის გამოიყო 1 147.8 ათასი ლარი; რელიგიის მხარდაჭერისათვის გამოიყო 10.0 ათასი ლარი; სახელოვნებო სკოლების დასაფინანსებლად მიიმართა 189.4 ათასი ლარი; ბიბლიოთეკების დაფინანსებისათვის გამოიყო 120.8 ათასი ლარი; ა(ა)იპ ლანჩხუთის მუნიციპალიტეტის “კულტურის ცენტრის” დაფინანსებისათვის _ 232.9 ათასი ლარი; ა(ა)იპ ლანჩხუთის მუნიციპალიტეტის კულტურული მემკვიდრეობის დაცვისა და განვითარების დასაფინანსებლად გამოიყო 111.4 ათასი ლარი; ა(ა)იპ “ტურიზმის განვითარების ცენტრის” დაფინანსებაზე _ 28.3 ათასი ლარი; სოციალური და ჯანდაცვის პროგრამების დასაფინანსებლად _ 535.47 ათასი ლარი, მათ შორის მუნიციპალური სოციალური პროგრამების დაფინანსებაზე გამოიყო 381.12 ათასი ლარი.
_ დიდი დრო დაეთმო ბიუჯეტის პროექტის განხილვას. ის ყველასთვის ხელმისაწვდომი იყო. საკრებულოს კომისიების მინიმუმ 15 სხდომა მაინც მიეძღვნა პროექტის განხილვას. მინდა მითხრათ, რომ 2011 წლის ბიუჯეტი მაქსიმალურად არის მიახლოებული იდეალურ ვარიანტთან. იანვრის თვიდან ან თებერვლის დასაწყისში კიდევ იქნება ასახული თანხების მატება ბიუჯეტში. მინდა მადლობა გადავუხადო საკრებულოს წევრებს, შესაბამის სამსახურებს, მუნიციპალიტეტის გამგებელს გიორგი გოგუაძეს, _ აღნიშნა რევაზ ჩიტიძემ.
