"ნაციონალურ მოძრაობას" პარლამენტში მიწის რეგისტრაციასთან დაკავშირებული ალტერნატიული კანონპროექტი შეაქვს, – აღნიშნულის შესახებ, დღეს, პარტიის წარმომადგენლებმა გიგი წერეთელმა და გიორგი ღვინიაშვილმა პრესკონფერენციაზე განაცხადეს.
მათი თქმით, მთავრობამ მიწის რეგისტრაციის პროცესი მოსახლეობის ინტერესების დაცვით უნდა წარმართოს.
"მთავრობამ პარლამენტში კანონპროექტი წარმოადგინა, რომლის განხილვაც დაწყებულია და რომელიც ითვალისწინებს შემდეგს – თუ პიროვნებას მიწაზე მართლზომიერი მფლობელობის დამადასტურებელი დოკუმენტი არ აქვს, ასეთი მიწები სახელმწიფო საკუთრებაში მოექცევა. ვინაიდან ეს საკითხი თითოეული გლეხისთვის ძალიან რთული და მძიმე იყო, 2012 წელს "ნაციონალურმა მოძრაობამ" ამ საკითხზე მუშაობა დაიწყო, ასეთი მიწების აღრიცხვა/აღწერა მოხდა და დოკუმენტაცია ეკონომიკის სამინისტროს გადაეგზავნა.
ვინაიდან გლეხი იდგა საშიშროების წინაშე, რომ მას შესაძლოა მამაპაპისეული მიწა დაეკარგა, სწორედ ამიტომ ჩატარდა ასეთი სამუშაოები და დღეს კიდევ ასეთ მდგომარეობაში აღმოჩნდა გლეხი. მთავრობის მიერ წარმოდგენილი კანონპროექტით დადგა საშიშროება, რომ გლეხმა მიწა დაკარგოს. კახეთის მაგალითზე გეტყვით, რომ ასეთი შემთხვევები ძალიან ბევრია. შესაძლოა, ისედაც გაუსაძლის მდგომარეობაში მყოფი გლეხი, საერთოდ ულუკმაპუროდ დარჩეს.
მიწების რეგისტრაციასთან დაკავშირებული საკითხი, ყველას აღელვებს, ყველა რეგიონს. ჩვენ ვხვდებით მოსახლეობას და ეს კითხვები ისმება. სწორედ ამიტომ, ჩვენ შეგვაქვს ალტერნატიული კანონპროექტი. გვსურს, რომ საქართველოს მთავრობამ ეს პროცესი მოსახლეობის ინტერესებიდან გამომდინარე წარმართოს და იმ შემთხვევებში, როდესაც არსებობს მტკიცებულებები, რომლითაც შესაძლებელია საჯარო რეესტრში დარეგისტრირება, ეს უსასყიდლოდ გააკეთოს და გლეხს მიწა საკუთრებაში გადასცეს", _ აცხადებენ "ნაციონალურ მოძრაობაში".
პარლამენტის ოპოზიციონერი დეპუტატი ვიქტორ დოლიძე კი აცხადებს, რომ მთავრობის მიერ ინიცირებული მიწის რეგისტრაციასთან დაკავშირებული კანონპროექტი ფაქტობრივად მიწის ექსპოპრიაციას ითვალისწინებს.
დოლიძის აზრით, საჯარო რეესტრის შესახებ კანონში ცვლილებების თაობაზე ინიცირებული პროექტი, რომელიც მიწის რეგისტრაციას ეხება, მანკიერი პროექტია.
"პარლამენტში შემოვიდა აბსოლუტურად მანკიერი პროექტი, რომელიც ფაქტობრივად გაკულაკებას ითვალისწინებს. მთავრობას სურს, რომ დაუკანონებელი მიწები სახელმწიფოს გადასცეს და საერთოდ არ ფიქრობს იმ ადამიანებზე, რომლებიც მამაპაპისეული დროიდან მოყოლებული ფლობენ ამ მიწებს. ეს არის კაბალური, არასწორი გადაწყვეტილება და ჩვენ ამის მაქსიმალური პრევენცია უნდა გავაკეთოთ", _აცხადებს დოლიძე.
ცნობისთვის, "თავისუფალი დემოკრატები" არასამთავრობო სექტორთან შეთანხმებით ალტერნატიული კანონპროექტის შემუშავებას აპირებენ, რომელიც, მათივე თქმით, მიწის ნაკვეთებზე უფლებათა რეგისტრაციისა და საკადასტრო მონაცემების სრულყოფის შესახებ იქნება.
"აქ კონკრეტული მედიაციის მექანიზმია მოცემული, რომელიც მიმართული იქნება იქით, რომ მოსახლეობის უფლებები იქნას დაცული. ასევე ყველას კარგად უნდა გვესმოდეს, რომ სახელმწიფომ ამ ყველაფერთან დაკავშირებული ხარჯები თავის თავზე აიღოს", _ ამბობენ "თავისუფალი დემოკრატები".
არასამთავრობო ორგანიზაციები კი აცხადებენ, რომ მთავრობის მიერ წარმოდგენილი ინიციატივა მნიშვნელოვან საფრთხეებს შეიცავს კერძო საკუთრების ხელყოფის, მიწის ბაზრის განვითარებისა და საინვესტიციო გარემოს გაუარესების თვალსაზრისით.
შეგახსენებთ, რომ 2015 წლის 21 დეკემბერს საქართველოს პარლამენტის ბიურომ განსახილველად მიიღო მთავრობის ინიცირებული კანონპროექტი "საჯარო რეესტრის შესახებ" საქართველოს კანონში ცვლილებების შეტანის შესახებ. აღნიშნული კანონპროექტის განმარტებითი ბარათის შესაბამისად, საკანონმდებლო ცვლილების მიზანია სახელმწიფო საკუთრებაში არსებული უძრავი ქონების შესახებ სრულყოფილი უფლებრივი და საკადასტრო მონაცემების შექმნის უზრუნველყოფა და ამ გზით უძრავი ქონების ბაზრის განვითარების ხელშეწყობა. საერთაშორისო გამჭვირვალობა- საქართველოს მიაჩნია, რომ მიწის რეგისრტაციასთან დაკავშირებით მართლაც მნიშვნელოვანი რეფორმებია გასატარებელი.
