ლანჩხუთის საკრებულომ კიდევ ერთხელ დაიწყო ადმინისტრაციული წარმოება ბიუჯეტში დამატებით 50 ათასი ლარის ასახვის მიზნით.
როგორც გაირკვა, მუნიციპალიტეტში განსახორციელებელი ინფრასტრუქტურული პროექტების თანადაფინანსებისთვის, რისთვისაც მთლიანობაში 180 ათასი ლარია საჭირო, ზემონახსენებ 50 ათას ლარს ამჯერზე სოფლის მხარდაჭერის პროგრამა გაიღებს, ანუ იმ 806 ათას ლარს, რომლის გახარჯვაც იგეგმებოდა 2016 წელს ლანჩხუთში სოფლის პროგრამიდან, შიდა ასიგნებით 50 ათასი გამოკლდება და ინფრასტრუქტურაზე მიიმართება.
სწორედ ეს გახლდა დეპუატათა ნაწილისთვის მიუღებელი. "სოფლის პროგრამებს ჩვენ მოსახლეობასთან შეთანხმებით ვამტკიცებთ. ახლა ამ 50 ათას ლარს რომ ვაკლებთ, ეს თუ არის მოსახლეობასთან შეთანხმებული, არის მათი მხრიდან თანხმობა ამ ცვლილებებს რომ ვგეგმავთ?!", – ასეთი კითხვები ისმოდა სხდომაზე ოპოზიციის სხვადასხვა წარმომადგენელთაგან.
გამგეობის საფინანსო-საბიუჯეტო სამსახურსი უფროსის, როლანდ ლაშხიას განმარტებით, თანხა, რომელიც კონკრეტულ სოფელს აღნიშნული პროგრამიდან მოაკლდებოდა, იმავე სოფელში ინფრასტრუქტურული სამუშაოების განხორციელებას მოხმარდებოდა.
მოკლედ, ხელმძღვანელი რგოლის ლოგიკით, როგორც წესი შესაკრებთა გადანაცვლებით, ამ შემთხვევაშიც ფაქტობრივად ჯამი უცვლელია. თუმცა, მმართველი რგოლის ეს მარტივი ლოგიკა მიუღებელია საკრებულოს უმცირესობისთვის, მაგრამ ამ აზრთა სხვადასხვაობის მიუხედავად, კენჭისყრაზე დამდგარ საკითხს პოზიცია-ოპოზიციამ მხარი ერთნაირი შემართებით დაუჭირა.
"ამაზე თუ მაჟორიტარებს პროტესტი არ უჩნდებათ, იყოს ნება მათი", – ამბობდა ოპოზიცია.
სხვათაშორის სოფელ ნინოშვილის წარმომადგენლისთვის საკრებულოში, გაუგებარი დარჩა რატომ დაიმსახურა ოპოზიციის კრიტიკა,
"ვნახავ, იქნებ სულ არ მაჭრიან სოფლის პროგრამიდან თანხას, თუ მიუღებელი დარჩა ჩემთვის, თქვენზე არანაკლებ გამავხატავ პროტესტს", – პოსტ-ფაქტუმ ქმედებას ამჯობინებს ნინოშვილელი დეპუტატი.
სხდომაზე გაირკვა, რომ 20 ათასი ლარი, რომლის მატებაც ბიუჯეტში იანვში განხორციელდა მოსალოდნელი სტიქიის სალიკვიდაციო ღონისძიებების აღმოსაფხვრელად (თავის დროზე არასწორად მოხდა ეს მატება), ბიუჯეტში მორიგი ცვლილების ასახვის შემდგომ სპორტული სკოლის საპროექტო სახარჯთაღრიცხვო დოკუმენტაციის შეყიდვისთვის იქნება მიმართული.
