სკოლის დირექტორი, სავარაუდოდ, პოლიტიკური ნიშნით გაათავისუფლეს
ოზურგეთის მუნიციპალიტეტის სოფელ მელექედურის საჯარო სკოლის ყოფილი დირექტორი ნათელა თოხაძე ადგილობრივ ჟურნალისტებთან სკანდალურ ინფორმაციას ავრცელებს _ მისი თქმით, ამავე სკოლის სამეურვეო საბჭომ განათლების და მეცნიერების სამინისტროში სხვა ოქმი გააგზავნა ხუთი ადამიანის ხელმოწერით. არსებობს სხვა ოქმი, სადაც სამეურვეო საბჭოს თავმჯდომარეს დირექტორის გათავისუფლებაზე ხელი არ აქვს მოწერილი. "გურია ნიუსი" წერდა, რომ სამეურვეო საბჭოს სხდომაზე, რომელიც 5 აპრილს გაიმართა, ხუთი წევრიდან ერთმა _ სამეურვეო საბჭოს თავმჯდომარემ მამია თოხაძემ არ მოაწერა ხელი ნათელა თოხაძის განთავისუფლებას.
_ 2012 წლის 19-21 მარტის ჩათვლით, ჩვენს სკოლაში გენერალური ინსპექცია იყო შემოსული. აინტერესებდათ სტრუქტურული ერთეულების მუშაობა, წაიღეს სამეურვეო საბჭოს ოქმები. რასაც ითხოვდნენ, ყველა საბუთი, მივაწოდეთ. ვერ ვნახეთ მხოლოდ ორი დოკუმენტი. დასკვნაში წერია, რომ სამეურვეო საბჭოს სხდომის ოქმებში არ არის დაფიქსირებული კენჭისყრის შედეგები. ასევე, ოთხ მასწავლებელს არასწორი კვალიფიკაციით ეძლევა ხელფასი და ეს ნამდვილად ჩემი დანაშაულია. ასევე წერია ის, რომ სამი ბავშვის პირადობის დამადასტურებელი მოწმობა არ იყო პირად საქმეში, _ ამბობდა "გურია ნიუსთან" საუბრის დროს ნათელა თოხაძე.
რას ამბობს ახლა ჟურნალისტებთან ნათელა თოხაძე და რა კავშირში არის მისი განთავისუფლება პოლიტიკასთან.
_ გენერალური ინსპექტირების ჩატარებიდან ათი დღის შემდეგ მოვიდა დასკვნა, რომელიც მიეწოდა სამეურვეო საბჭოს და მიეცა მიმართულება, რომ შეწყვეტილიყო ჩემი უფლებამოსილება. სამეურვეო საბჭოს სხდომა გაიმართა 4 აპრილს, იმსჯელეს ამ საკითხზე და გამოიტანეს დასკვნა. შვიდი წევრიდან ესწრებოდა ხუთი. ერთმა, თავმჯდომარემ არ მისცა დასტური ჩემს გათავისუფლებას. არსებობს ამ ოქმის ასლი, რომელიც "გურია ნიუსის" ჟურნალისტებმა წაიღეს. ამისთვის მინდა, მადლობა ვუთხრა მათ. რომ არა ეს, ჩემთვის გაუგებარი იქნებოდა ბევრი რამ. ამის შემდეგ, ნახევარ საათში, როდესაც ჩაიტანეს ეს ოქმი ოზურგეთის მუნიციპალიტეტის საგანმანათლებლო რესურსცენტრში, მე, უკვე გათავისუფლებულს, მირეკავს რესურსცენტრის დირექტორი ირინა ინარიძე და მეუბნება, ეს რა ოქმი გამოაგზავნეო. არანაირი ოქმი მე არ გამომიგზავნია,-მეთქი. მან მითხრა, რომ აქ თავმჯდომარე არ აწერს ხელს და ეს როგორ შეიძლებაო. შემდეგ ქალბატონმა უფროსმა ირინა ინარიძემ გამოაგზავნა იურისტი, მოიყვანეს სამეურვეო საბჭოს თავმჯდომარე, მათ ადგილზე დახვდა ოთხი წევრი, სხდომა არ ჩატარებულა, შევიდნენ ერთ-ერთ ოთახში, დაბეჭდეს რაღაცა და ამ კაცს მოაწერინეს ხელი. ვაპირებ, ეს ამბავი გავასაჩივრო და დახმარებისთვის მივმართე ახალგაზრდა იურისტთა ასოციაციას. რესურსცენტრის უფროსმა განახორციელა ჩემი დევნა, ერთ ადამიანსაც არ დაუტოვა უფლება, გამოეხატა საკუთარი აზრი. ამით რა დაშავდებოდა _ მე მაინც გათავისუფლებული ვიყავი სამეურვეო საბჭოს წევრებისგან, _ ამბობს ყოფილი დირექტორი.
ის მიიჩნევს, რომ ამ ამბავს ნამდვილად აქვს პოლიტიკური სარჩული და ერთ მეტად საინტერესო ფაქტს იხსენებს, რის დამადასტურებელი დოკუმენტები არ აქვს:
_ 4 მარტს, სანამ გენერალური ინსპექცია შემოვიდოდა მელექედურის საჯარო სკოლაში, ირინა ინარიძემ მთხოვა, მივსულიყავი მასთან. მივედი და მკითხა, შენ სადმე აფიქსირებ თუ არა შენს პოლიტიკურ შეხედულებასო. მე ვუთხარი, არა,-მეთქი, რადგან არსად არ მილაპარაკია პოლიტიკაზე. ინარიძემ მითხრა, მაშინ რატომ არ წახვედი მუნიციპალიტეტის გამგებლის შეხვედრაზეო _ ნიშნისმოგებით ნამდვილად არ უთქვამს. ეს შეხვედრა მელექედურში გაიმართა. ჯერ ერთი, სხვა სოფლებშიც იყო გამგებელი მიბრძანებული და იქაც არ მისულა იმავე სოფლის სკოლის დირექტორი, მაგრამ ამის გამო რესურსცენტრში მისთვის დაკითხვა არ მოუწყვიათ. იმ შეხვედრაზე ვიღაცის ინიციატივით ჩამოიწერა სია, ვინ ესწრებოდა და მოაწერინეს ხელი ადამიანებს, რომ ნამდვილად ესწრებოდნენ. მერე გაჟღერდა ასეთი ინფორმაცია: აი, სკოლა და ბაღი არის ოპოზიცია და შეხვედრაზეც არ მოვიდნენო. აქედან 20 დღეში სკოლის დირექტორი გათავისუფლებული იყო, ბაღის გამგე კი ქალაქის ერთ-ერთ ბაღში ფსიქოლოგად გადაიყვანეს.
ოზურგეთის საგანმანათლებლო რესურსცენტრის უფროსმა ირინა ინარიძემ "გურია ნიუსთან" სატელეფონო საუბრის დროს გვირჩია, რომ ამის შესახებ სამეურვეო საბჭოსთვის გვეკითხა და თვითონ კომენტარს ვერ გააკეთებდა:
_ ქალბატონი ნათელა ამბობს, რომ თქვენი ბრძანებით ავიდა მელექედურში რესურსცენტრის იურისტი, რის შემდეგაც სამეურვეო საბჭოს თავმჯდომარემ ოქმზე ხელი მოაწერა.
_ მე ამაზე კომენტარს არ ვაკეთებ. ჩემზე რას ამბობს ნათელა, ნაკლებად მაინტერესებს.
_ მან ასევე თქვა, რომ თქვენ ის გენერალური ინსპექციის ჩამოსვლამდე დაიბარეთ და მისი პოლიტიკური ორიენტაციის შესახებ ჰკითხეთ.
_მე არ ვადასტურებ ამ ინფორმაციას და არც კომენტარს ვაკეთებ, _ გვითხრა ირინა ინარიძემ.
თავად სამეურვეო საბჭოს თავმჯდომარე მამია თოხაძე ჩვენთან სატელეფონო საუბრისას ამბობს, რომ მან ხელი მეორე ოქმს მოაწერა:
_ ბატონო მამია, ქალბატონმა ნათელამ გამართა პრესკონფერენცია და აღნიშნა, რომ თქვენ მეორე ოქმზე მოაწერეთ ხელი.
_ კი, ასე იყო. მეორეჯერ დამიბარეს, სკოლაში მივედი.
_ ვინ დაგიბარათ და გითხრათ, რომ ხელი უნდა მოგეწერათ?
_ უბრალოდ, მითხრეს, თუ აწერ ხელსო და არა,-მეთქი, რომ ვუთხარი, მერე მითხრეს, აზრი არ აქვსო. ვიფიქრე, თუ არ აქვს აზრი, დამჭირდება ახსნა-განმარტება, აქეთ-იქეთ სირბილი,-მეთქი და ამიტომ მოვაწერე ხელი.
_ ვინ გითხრათ, ხელი მოაწერეთო?
_ ვინც იყო ამოსული მელექედურში.
_ როგორც ქალბატონი ნათელა ამბობს, რესურსცენტრიდან იყვნენ ამოსულები.
_ კი.
_ კონკრეტულად ვინ იყო?
_ არ ვიცი სახელი და გვარი.
_ მამაკაცი იყო თუ ქალი?
_ კაცი. წაკითხვით არაფერი წამიკითხავს, ისე მოვაწერე ხელი, რადგან აზრი არ ჰქონდა.
აი, რა წერია ახალ ოქმში: "სსიპ ოზურგეთის მუნიციპალიტეტის სოფელ მელექედურის საჯარო სკოლის დირექტორისთვის _ ნათელა თოხაძისთვის ვადამდე ადრე უფლებამოსილების შეწყვეტის შესახებ. მომხსენებელი სამეურვეო საბჭოს თავმჯდომარე მამია თოხაძე.
მოისმინეს: _ სამეურვეო საბჭოს თავმჯდომარემ მამია თოხაძემ განმარტა, რომ სხდომას ესწრება სამეურვეო საბჭოს ხუთი წევრი და იგი უფლებამოსილია დღის წესრიგით გათვალისწინებული საკითხის გადასაწყვეტად. ასევე განმარტა, რომ სსიპ ოზურგეთის მუნიციპალიტეტის სოფელ მელექედურის საჯარო სკოლაში, 2012 წლის 3 აპრილს, საქართველოს განათლებისა და მეცნიერების სამინისტროს შიდა აუდიტის დეპარტამენტიდან შემოსულია #07-2-20/21334 30/30/2012 წ. წერილი, რომელსაც თან ერთვის საქართველოს განათლების და მეცნიერების სამინისტროს შიდა აუდიტის დეპარტამენტის მიერ სსიპ ოზურგეთის მუნიციპალიტეტის სოფელ მელექედურის საჯარო სკოლის შესახებ შედგენილი დასკვნა და დასკვნის საფუძველზე გამოცემული მინისტრის ბრძანება, რომელიც შეეხება სსიპ ოზურგეთის მუნიციპალიტეტის სოფელ მელექედურის საჯარო სკოლის დირექტორის ნათელა თოხაძისთვის ვადამდე ადრე უფლებამოსილების შეწყვეტის საკითხს.
სამეურვეო საბჭოს წევრებმა იმსჯელეს დღის წესრიგით გათვალისწინებული სსიპ ოზურგეთის მუნიციპალიტეტის სოფელ მელექედურის საჯარო სკოლის დირექტორისთვის, ნათელა თოხაძისთვის უფლებამოსილების ვადამდე ადრე შეწყვეტის საკითხზე და ერთხმად (მომხრე _ 5, წინააღმდეგი _ 0, შეიკავა _ 0) დაადგინეს: სსიპ ოზურგეთის მუნიციპალიტეტის სოფელ მელექედურის საჯარო სკოლის დირექტორს ქალბატონ ნათელა თოხაძეს ვადამდე ადრე შეუწყდეს უფლებამოსილება".
ოქმში, რომელიც "გურია ნიუსს" სხდომის გამართვის დამთავრების შემდეგ მიაწოდეს, წერია: "სამეურვეო საბჭოს თავმჯდომარემ მამია თოხაძემ განმარტა, რომ სხდომას ესწრება სამეურვეო საბჭოს ხუთი წევრი და იგი უფლებამოსილია დღის წესრიგით გათვალისწინებული საკითხის გადასაწყვეტად.
სამეურვეო საბჭოს წევრებმა იმსჯელეს დღის წესრიგით გათვალისწინებული სსიპ ოზურგეთის მუნიციპალიტეტის სოფელ მელექედურის საჯარო სკოლის დირექტორისთვის უფლებამოსილების ვადამდე ადრე შეწყვეტის საკითხზე და დაადგინეს, რომ მელექედურის საჯარო სკოლის დირექტორს ქალბატონ ნათელა თოხაძეს ვადამდე ადრე შეუწყდეს უფლებამოსილება".
გადაწყვეტილებას სამეურვეო საბჭოს ოთხი წევრი აწერს ხელს _ ამ ოთხეულში მამია თოხაძის სახელი და გვარი არ ფიგურირებს.
