“ეს არის ძალიან ძვირადღირებული ხელისუფლება”

გასული კვირის ოთხშაბათს, “თავისუფალი დემოკრატების” ოზურგეთელთა ლიდერმა და ოზურგეთის მუნიციპალიტეტის საკრებულოს ოპოზიციონერმა წევრმა თემურ სალუქვაძემ მორიგი პრესკონფერენცია ჩაატარა. პირველი თემა იყო იაფი კრედიტი დასაქმების ხელშეწყობისთვის. სალუქვაძის თქმით, ინიცირებულ პროექტთან დაკავშირებით, საკრებულოს სოფლის მეურნეობის კომისიაში მოეწყო განხილვა. გაიმართა სერიოზული დისკუსია. პროექტმა დადებითი და მაღალი შეფასებები მიიღო.
_ არსებობს ერთი საკითხი, რომელიც საჩქარო გადაწყვეტას საჭიროებს: პროექტის ფინანსური უზრუნველყოფა. ვფიქრობ, რომ 2011 წელის ბიუჯეტში ასახული თუ არ იქნა გარკვეული ოდენობის თუნდაც მცირე რესურსი აღნიშნული პროექტის დაფინანსებისთვის, ბიუჯეტის დამტკიცების შემდეგ გაცილებით გართულდება ფინანსური რესურსების მოძიება, _ თქვა სალუქვაძემ.
მეორე საკითხი 2011 წლის ოზურგეთის მუნიციპალიტეტის ბიუჯეტის პროექტის შეფასებას დაეთმო. “თავისუფალი დემოკრატები” ბიუჯეტის პროექტს უარყოფითად აფასებს და მხარს არ დაუჭერს:
_ ჩვენ შევეცადეთ დიალოგის რეჟიმში აზრები, იდეები, პროექტები წარგვედგინა მუნიციპალიტეტის საკრებულოსთვის, რომელიც საერთო ჯამში იქნა მოწონებული, მაგრამ რეალურად, 2011 წლის ბიუჯეტის პროექტში ასახვა ვერ ჰპოვა. არის დაპირებები ხელისუფლების მხრიდან, რომ ჩვენი წინადადებები იქნება გათვალისწინებული, _ ამბობს სალუქვაძე.
მანვე პრესკონფერენციაზე წარმოადგინა ბიუჯეტის ფორმირების პრინციპი:
_ უნდა ჩატარდეს კვლევა, გამოკითხვა ქალაქისა და სოფლების მიხედვით. გაკეთდეს არსებული მდგომარეობის ანალიზი და ამის საფუძველზე გამოიკვეთოდ პრიორიტეტები. ის პრიორიტეტები, რაც ბიუჯეტის პროექტში წარმოადგინა ხელისუფლებამ, რეალურად არ ასახავენ მდგომარეობას. ეს ბიუჯეტი არის წინა წლების ბიუჯეტების ტრადიციული გაგრძელება მცირეოდენი ცვლილებებით. იგი არ არის ადამიანის სოციალურ მდგომარეობაზე ორიენტირებული. ისეთი სექტორი, როგორიც სოფლის მეურნეობაა, იგნორირებულია, სოციალური და ჯანდაცვის სფეროს დაფინანსება _ შემცირებული, გაურკვეველია ქალაქის განაშენიანების საკითხი, გაზრდილია აიპ-ების სუბსიდირება, მთავრობის მიერ საქონლის შესყიდვებისა და მომსახურების ხარჯები, წყლის რეალიბიტაციის საკითხი გაურკვეველია. ბიუჯეტში გაწერილია თანხები, რომელიც მუნიციპალურ ვალდებულებას არ წარმოადგენს.
2011 წლის ბიუჯეტი განსაზღვრულია 7 835 000 ლარით, საიდანაც 31 %, ანუ 2 418 400 ლარი ხელისუფლების სახელფასო ფონდს ხმარდება. აქედან გამომდინარე, ჩვენ გვყავს ძალიან ძვირადღირებული ხელისუფლება, _ თქვა სალუქვაძემ.