დეკემბერში მოსულმა თოვლმა ოზურგეთის მუნიციპალიტეტის დაბა ურეკში მესხის ქუჩაზე მცხოვრები ხაჩიძეების 10 სულიანი ოჯახი ღია ცის ქვეშ დატოვა. ოჯახის დიასახლისის მაია ხაჩიძის თქმით, თოვლის საფარი იმდენად დიდი იყო, რომ სახლის სახურავზე თოვლის გადასაყრელად ასულ ბიჭებს ჭერმა ვეღარ გაუძლო და ჩამოინგრა.
ოჯახის წევრების თქმით, ერთ-ერთი ვაჟი მეუღლესთან და მცირეწლოვან ბავშვთან ერთად ქირით ცხოვრობს. მას ადგილობრივი ხელისუფლება ერთ ოთახში 100 ლარს უხდის, თუმცა, რძლის თამარ ოროველაშვილის განმარტებით, ესეც დროებითია. მეორე შვილი თავის მეუღლესთან ერთად მეზობლებს ჰყავს შეფარებული ღამის გასათევად. ოჯახის დანარჩენი წევრები კი ერთ პატარა სამზად სახლში ცხოვრობენ.
სტიქიის შემდეგ ორი თვე გავიდა. 10 სულიანი ოჯახი ადგილობრივ ხელისუფლებას დახმარებას სთხოვს. როგორც ოჯახის დიასახლისი მაია ხაჩიძე "გურია ნიუსთან" ამბობს, ხელისუფლების დაპირებიდან უკვე ორი თვე გავიდა, ამასობაში კი წვიმებისგან სახლს, ჭერთან ერთად, ყველა კედელი ჩამოენგრა.
დაზარალებულებმა დახმარებისთვის "გურია ნიუსს" მიმართეს.
მაია ხაჩიძე: "ერთი შვილი და მისი მეუღლე ქირით ცხოვრობენ სანატორიუმ "მეგობრობაში". მასში ადგილობრვი ხელისუფლება ყოველთვიურად 100 ლარს იხდის. მეორე რძალი და შვილი მეზობელთან ათევენ ღამეს, მეზობლებმა შეიფარეს, დანარჩენები კი ერთ ოთახში-"კუხნაში"ვცხოვრობთ. ბიჭები ზღვის სეზონზე მაშველებად მუშაობენ, სეზონი კი იცით 3 თვეა, დანაჩენ 9 თვეს უმუშევრები არიან, ფიზიკური სამუშაოც არ არის, რომ იმუშაო და თავი გაიტანო. არც ყოველდღიური სამუშაო არ არის, რომ პურის ფული იშოვო. ორი შვილი სკოლის მოსწავლე მყავს. ქვეყანაში საყოველთაო უმუშევრობაა, სექტემბრიდან უკვე თავის გატანაზე ფიქრი გვკლავს. არანაირი შემოსავალი არ არის ურეკში.
დიდთოვლობის დროს ჭერი ჩამოგვენგრა. უვე მეორე თვეა, ტყუილში გვამყოფებენ, სახლის დათოვლაც ვერ მოვახერხეთ. თოვლის საფარი იმდენად დიდი იყო, რომ საშიში გახდა სახლის სახურავზე ასვლა, მეზობლის ბიჭები კიდეც ჩავარდნენ, მაგრამ გადარჩნენ. უკვე რამდენი ხანია გაუსაძლის მდგომარეობაში ვიმყოფებით."
თამარ ოროველაშვილი: "აღარ ვიცით, როგორ მოვიქცეთ. დაფარული ზარითაც კი დაგვირეკეს ამას წინათ, ჩვენი მოსაზრებით ზარი სავარაუდოდ თბილისიდან იყო. უარი მივიღეთ დახმარებაზე, არ არის ინფრასტრუქტურაში ფინანსები იმდენი, რომ თქვენ სახლი გადაგიხუროთო. ადგილობრივი ხელისუფლება თქვენი არჩეულია და იმათ მოგხედონო. ჩვენ აქედან ვერ დაგეხმარებით, იმის სახსრები არ გაგვაჩნია, რომ თანხები გადმოვრიცხოთო. ხელისუფლება იხდის ქირას, იმდენად მცირეა ეს 100 ლარი თვეში, რომ ერთ ოთახში ვართ. ახლა სეზონი იწყება და მეპატრონე უკვე აღარ გაგვაჩერებს ამ 100 ლარად, რადგან შესაძლოა, მან ერთ დღეში აიღოს 100 ლარი. ჩვენც მოგვიწევს ამ ბინის დატოვება. ერთი კვირის წინ მოვიდნენ ხელისუფლების წარმომადგენლები და გვითხრეს, ერთ კვირაში გვეცოდინება გადაჭრით პასუხი, გადაგიხურავთ სახლს თუ არაო, გავარკვევთ შესყიდვების სააგენტოში და ამის შემდეგ გეტყვით, პასუხი დადებითი იქნება თუ უარყოფითიო. ეს ზამთარი ასე აწოწიალებულებმა გავატარეთ. პატარა "კუხნაშიც" ამდენი ადამიანი ვერ ეტევა. სტიქიის მეორე დღეს მოვიდნენ ინფრასტრუქტურის სამსახურის უფროსი გოჩა აბაშმაძე და სამსახურის წარმომადგენლები, შეაფასეს და დაგვპირდნენ რომ გადახურავდნენ. ამის შემდეგ კი ნელ -ნელა უკან წაიღეს დაპირებები. ისიც კი გვითხრეს, ჟურნალისტებს არაფერი არ უთხრათ, ჩვენ მოვაგვარებთ ამ პრობლემასო. ერთი თვე გავიდა, ახლა უკვე უხეშად და ცივად დაიწყეს პასუხის გაცემა. გვეუბნებოდნენ, რომ თბილისიდან ელოდნენ პასუხს , ექნებოდათ თუ არა შესაბამისი სახსრები. შემდეგ გაირკვა, რომ ეს ტყუილი იყო. რადგან ადგილობრივ ხელისუფლებას გააჩნია ამისთვის სახსრები და თბილისზე არ არიან დამოკიდებული. გავარკვიეთ, რომ არსებობს სპეციალური სარეზერვო ფონდი ასეთი შემთხვევებისთვის. ამას თავად გვეუბნებოდნენ ოზურგეთის მუნიციპალიტეტის გამგეობის წარმომადგენლები, ვისაც უშუალოდ ეხება ეს საკითხი. ამ ტყუილებში, ერთმენთის გადაბრალებაში სახლის პირველი სართულიც გაფუჭდა, სულ ჩამოინგრა კედლები წვიმებისგან, იატაკი დალპა, აწი რომ გადახურონ, სახლს არც კედლები უვარგა და არც პირველი სართულის იატაკი, სულ გაფუჭდა და განიავდა ყველაფერი. უმძიმესს მდგომარეობაში ვიმყოფებით, სველდება კედლები, პირველი სართულის ჭერიც ჩამოინგრა, აღარ ვიცით რა გვეშლება. უკვე ორი თვე გავიდა. ჩვენც მარტის ბოლოს ბინა უნდა დავცალოთ."_ამბობს თამარ ოროველაშვილი.
როგორც დაზარალებული ოჯახის წევრები ამბობენ, ასეთი გაუსაძლისი პირობები დაბა ურეკში არცერთ ოჯახს არ აქვს:
"ასეთი ოჯახი ერთადერთია ურეკში. ბევრი რომ იყოს, შესაძლოა მთავრობა ვეღარ აუდიოდეს დაფინანსებას, მაგრამ ერთი ოჯახია და ისიც 10 სულიანი, სადაც მცირეწლოვანი პატარაა. ასე უყურადღებობა შეიძლება? სამ ოჯახს უდრის ჩვენი ოჯახი. რაც ეს მთავრობა მოვიდა სათავეში, ბევრი რამ გვიჭირდა, მაგრამ არასოდეს არ მიგვიმართავს, წელებზე ვიდგამდით ფებეხს და ლუკმა – პური ყოველთვის გვქონდა. ვიტანდით გაჭირვებას, ჩემს მამამთილს თვალი აქვს დაკარგული, მეორე ჯგუფის ინვალიადია, ჩემს პატარას კანის ქრონიკული დავადება აქვს, მუდმივად წამლები სჭირდება. ასე შეიძლება? არაფერი გვითხოვია ხელისუფლებისთვის აქამდე, ერთადერთი სათხოვარი გვაქვს 10 სულიანი ოჯახი უჭეროდ დავრჩით, ფაქტიურად უსახლკაროდ ვართ, რა ვქნათ აბა, ვის მივმართოთ? ასე გულცივად მოპყრობა სახელმწიფოსგან შეიძლება? აბა როდის უნდა მოგვეხმარონ, ამაზე მეტი გასაჭირი ვინმეს ექნება?"_ ამბობს ერთ-ერთი რძალი.
ლია ნათენაძე: "წუთით წარმოიდგინონ, რომ თავად არიან ასე, რომ მეზობლებთან სძინავთ. წარმოიდგინონ, რომ მათი პირადი ნივთები მეზობლებში აქვთ გადატანილი. მათ გამოსცადონ ერთი დღე თავიანთ თავზე და მერე მივხვდებიან ადამიანების გასაჭირს. ისე მტკვინეულად ვერ გაიგებენ, თუ თავიანთ თავზე არ გამოცდიან. ეს უყურადღებობაა! მოუყრუეს ამ საკითხს. რამდენჯერაც გაწვიმდება, ვზივართ და ვტირივართ. სულ ჩამოგვენგრა თავზე მთელი სახლი. საარსებო მინიმუმი გვაქვს, საჭმელს, პურის ფულს ხომ არ ვითხოვთ? ჩვენ ვცოცხლობთ, სულ ესაა. მოვა არჩევნები, მხოლოდ ჩვენი ოჯახიდან 7 ამომრჩეველი ვართ, ნახონ რა ძნელი იქნება".
გაეწევა თუ არა ხაჩიძეების ოჯახს დახმარება, რა სახით და როდის, "გურია ნიუსმა" კომენტარისთვის ოზურგეთის მუნიციპალიტეტის გამგებლის მოადგილეს ბადრი გობრონიძეს მიმართა, მან კომენტარისგან თავი შეიკავა და ინფრასტრუქტურის სამსახურის უფროსთან გოჩა აბაშმაძესთან გადაგვამისმართა.
ოზურგეთის მუნიციპალიტეტის გამგეობის ინფრასტრუქტურის სამსახურის უფროსი გოჩა აბაშმაძე პირობას დებს, რომ აღნიშნულ ოჯახს სათანადო დახმარებას უმოკლესს ვადაში გაუწევენ.
"აუცილებლად დავეხმარებით, ეს საკითხი გადაწყვეტილია. ეს ოჯახი სამშენებლო მასალებს, სახურავს, ბლოკს, ცემენტს ამ დღეებში მიიღებს."_ გვითხრა აბაშმაძემ.
