მას შემდეგ რაც ფეხბურთის განვითარების ფონდში ლანჩხუთის მუნიციპალიტეტის ბიუჯეტიდან ნახევარი მილიონი ლარი გადაირიცხა, საფეხბურთო კლუბ "გურიას" ფინანსური ვალდებულების გასასტუმრებლად უკვე ფონდთან ექნება ურთიერთობა. სანამ ეს მოხდება, კლუბს ახალი პრობლემა გამოუჩნდა და ეს ყველაფერი შარშანდელი სეზონის გაუცემელი ხელფას – პრემიების გამო ხდება. ვინაიდან მარტის დასაწყისისთვის გასაცემი გარკვეული ვალდებულებების გადახდა დაგვიანდა, ჩვენი ინფორმაციით "გურიის" ყოფილი ფეხბურთელები (მათ შორის რამდენიმე მოქმედიც) ორშაბათისთვის ფეხბურთის ფედერაციაში ჩივილს აპირებენ. თანაც სიტუაციას ისიც ართულებს, რომ მათ თითქოს განუცხადეს, გასული წლის ხელფასები დაივიწყეთო. არადა, კლუბი ლიცენზიის მოპოვების გზაზეა დამდგარი და ეს საჩივარი უდავოდ დაბრკოლება იქნება სასურველი მიზნის მიღწევაში.
ფეხბურთელთა განზრახვის საქმის კურსშია "გურიის" ფინანსური დირექტორი თენგიზ კიკვაძე, რომელიც პრობლემას კი ხედავს, მაგრამ სიტუაციას საგანგაშოდ არ თვლის.
"ვიცით რომ ფეხბურთელები ჩივილს აპირებენ, მაგრამ ყველაფერი კარგად იქნება. მართალია დანაპირები კი დაგვიგვიანდა, მაგრამ ორშაბათს თბილისში პირადად ჩავდივარ, ფონდთან სამომავლო ურთიერთობები რომ დავალაგოთ. სწორედ ფეხბურთის განვითარების ფონდი გადაუხდის ფეხბურთელებს ამ დავალიანებას და ამით პრობლემაც არ იარსებებს," – გვითხრა კიკვაძემ.
კლუბის ლიცენზირების საკითხი კი მარტის ბოლოსთვის უნდა გაირკვეს და სწორედ ლიცენზიის მიღების შემდეგ დარეგულირდება სპონსორთან ურთიერთობაც, რომელიც ამ ეტაპზე თანხებს კი ხარჯავს, მაგრამ ამას ვერსად აფიქსირებს.
"მას შემდეგ რაც ლიცენზირებას წარმატებით გავივლით, მხოლოდ ამის შემდეგ მოხდება სპონსორთან ურთიერთობების დალაგება და მისი მხრიდან თანხების ხარჯვაც უკვე ოფიციალურ სახეს მიიღებს. სწორედ ამ შემთხვევაში მოხდება ფონდის მხრიდან კლუბისთვის პროგრამით გათვალისწინებული სტიმულირების თანხების მიცემა" – დასძინა კლუბის ფინანსურმა დირექტორმა.
როგორც პროგრამაში უკვე გაწერილია, "გურია" ამ შემთხვევაში მიმდინარე სეზონშივე მიიღებს 400 ათას ლარს სამოტივაციოდ, ხოლო 300 ათას ლარს საბაზისოდ( რადგან დაგეგმილი 800 ათასი ლარიდან 500 ათასი უკვე ჩაირიცხა ფონდში).
რაც შეეხება კლუბის დავალიანებას, დაახლოებით 400 ათასი ლარი უკვე გასტუმრებულია, თითქმის ამდენივე თანხა კი უახლოეს პერიოდშია გასასტუმრებელი. შეგახსენებთ, რომ ამ თანხაში შედის როგორც ფეხბურთელთა, ასევე კლუბში მომუშავე პერსონალის ხელფასები და სხვა თანხები.
