“შანტაჟი და თვალთვალი ამ მთავრობის მეთოდად იქცა” – რას აცხადებენ “ნაციონალურ მოძრაობაში”

"ნაციონალური მოძრაობა" დღეს პრკურატურის მიერ გავრცელებულ ინფორმაციას ეხმაურება, რომელიც პირადი ცხოვრების ამსახველი ფარული ვიდეომასალის გავრცელებისთვის  დაკავებულ პირებს ეხება. პარტიის წევრები უარყოფენ პროკურატურის მიერ გავრცელებულ ინფორმაციას, რომლის მიხედვით დაკავებული ზურაბ ჯამალაშვილი კუდ-ის ყოფილი მაღალჩინოსანი იყო.

 დეპუტატმა ლევან ბეჟაშვილმა განაცხადა, რომ დაკავებული ჯამალაშვილი, რომელზეც პროკურატურა აცხადებს, რომ კუდის ყოფილი მაღალჩინოსანი იყო, 2012 წლამდე საერთოდ არ მუშაობდა ძალოვან სტრუქტურაში.

"ჩვენ ვითხოვთ, რომ გამოძიება უსწრაფესად ჩატარდეს და დამნაშავეები დაისაჯონ, მაგრამ დღევანდელი დაკავების ფაქტი ბევრ კითხვის ნიშანს აჩენს. დაკავებული პირი საერთოდ არ მუშაობდა ძალოვან სტრუქტურაში,  შვილი ბრალდებული იყო  და პროკურატურასთან გარიგებითაა გამოშვებული, აქაც პროკურატურას აქვს ბერკეტები რომ გარკვეული ზეწოლა მოახდინონ.  ასევე მნიშვნელოვანია ის, რომ სხვა წინარე შემთხვევებში, როცა მეტი მტკიცებულებები იყო, ხელისუფლებამ არცერთი ღონისძიება ბოლომე არ მიიყვანა და პირები არ დასაჯა. შანტაჟი, თვათვალი ამ მთავრობის მეთოდად იქცა, ამიტომ ამ საქმესთან დაკავშირებით დიდი მოლოდინები არ გვაქვს."

გამოძიებასთან დაკავშირებულ კითხვებზე ამახვილებს ყურადღებას პარტიის საერთაშორისო მდივანი გიგა ბოკერია და დასძენს  რომ ამ საქმის შემოქმედი ბიძინა ივანიშვილი და მისი გუნდია.

"ერთიანი ნაციონალური მოძრაობის" პოლიტიკური მდივანი აკაკი მინაშვილი კი მიიჩნევს, რომ მას შემდეგ, რაც ბიძინა ივანიშვილი და მისი გუნდი არიან მთავრობაში, ტრადიციად ჩამოყალიბდა, რომ ყველა ასეთ გამოძიებას  ძალიან ბევრი კითხვები ახლავს.