ჯერ კიდევ პლეი-აუტის დაწყებამდე, ნაკლებად წარმოგვედგინა, თუ პირველლიგელები გაცილებით იოლად გადაწყვეტდნენ ელიტლიგაში მოხვედრის საკითხს, ვიდრე უმაღლესლიგელები _ პოზიციის შენარჩუნებას. ლანჩხუთის “გურიამ” “ჩიხურასთან” ერთად, ფაქტობრივად, უკვე დაიბევა გაისად ელიტლიგაში თამაშის უფლება. არადა, წელს, ფაქტობრივად, ახალი გუნდი შეკრიბეს ლანჩხუთელებმა _ ძირითად შემადგენლობაში პირველი ეტაპიდან 2 ადგილობრივი მობურთალი ირიცხება მხოლოდ. გურულთა წარმატებაში უდიდესი წვლილი კლუბის კაპიტანსა და მთავარმეგოლეს, პლეი-აუტის ბომბარდირ გიგა კვერენჩხილაძეს მიუძღვის. იგი გუნდის ნამდვილი ლიდერია და ერთ-ერთ საუკეთესო სეზონს ატარებს კარიერაში. შესაბამისად, სულაც არ არის გასაკვირი, რომ მისით რამდენიმე წამყვანი ქართული კლუბია დაინტერესებული, თუმცა, თავად გიგა ჯერ მხოლოდ “გურიის” წარმატებაზე ფიქრობს.
ჩვენ მას რამდენიმე კითხვა დავუსვით:
_ გიგა, უპირველესად, გაეცანი ჩვენს მკითხველებს.
_ ლანჩხუთში დავიბადე, ფეხბურთის თამაში დიმა იმნაიშვილთან დავიწყე. ვთამაშობდი თბილისის “სპარტაკში”, “გურიაში”, “მეშაქრეში”, “კოლხეთში”, “სამტრედიაში”, ისევ ფოთში და მეორე წელია მშობლიურ ლანჩხუთში დავბრუნდი.
_ ყველასათვის მოულოდნელად, “გურიამ”, რომლის ძირითად შემადგენლობაში 9 ახალწვეული ირიცხება და საწვრთნელი ციკლი უამინდობამ ჩაგიგდოთ, თავიდანვე წარმატებულად დაიწყო და დღემდე ასე აგრძელებთ. როგორ ახერხებთ ამას?
_ უპირველესად, მონდომების ხარჯზე. ამასთან, კარგი ფეხბურთელების შეკრება მოვახერხეთ, ერთ გუნდად ვართ შეკრული, რამაც გაგვიიოლა წარმატებისთვის ბრძოლა, თამაშიც წაგვივიდა და მიხარია, რომ ფეხბურთს მონატრებული ლანჩხუთელი ქომაგი ისევ სტადიონზე დავაბრუნეთ _ ჩვენს საშინაო მატჩებს ხომ 2-3 ათასი მაყურებელი ესწრება, თან ლანჩხუთი პატარა ქალაქია. ასეულობით გულშემატკივარი შორეულ გასვლებზეც კი დაგვყვება.
_ რომელი თამაში იყო ყველაზე რთული და საუკეთესო?
_ რთული იყო “ჩიხურასთან”, რომელიც წავაგეთ. საუკეთესო თამაშად ბოლნისში მოგებას მივიჩნევ, რომელსაც უდიდესი მნიშვნელობა ჰქონდა ფსიქოლოგიური კუთხითაც _ გასვლაზე დავამარცხეთ უმაღლესლიგელი, რამაც ჩვენს ძალებში რწმენა გაგვიძლიერა.
_ როგორ ფიქრობ, ვის აქვს შანსი ოთხეულისთვის იბრძოლოს?
_ ჩვენ, “ჩიხურა”, “ვიტ ჯორჯია” და “სიონი”, ვფიქრობ, სხვებზე უკეთეს შანსს ვფლობთ. დანარჩენებიდან, ალბათ, ბათუმის “დინამოს” შეუძლია იბრძოლოს.
_ ბევრი ფიქრობს, რომ კარიერაში გამორჩეულ სეზონს ატარებ.
_ ალბათ, ერთ-ერთ საუკეთესოს, თუმცა, ვისურვებდი, “გურიასთან” ერთად უფრო კარგი და წარმატებული წლები მქონოდეს.
_ გამოკვეთილ თავდამსხმელად თამაშიც წარმატებით გამოგდის და შეტევის უკანა ხაზზეც. შენთვის რომელი პოზიციაა უფრო მისაღები?
_ თავდამსხმელის უკან, თუმცა, გუნდის ინტერესებიდან გამომდინარე, არათუ გამოკვეთილ თავდამსხმელად, ფლანგის ნახევარმცველადაც მითამაშია.
_ ერთხელ უკვე იყავი პირველი ლიგის ბომბარდირი. ახლაც უკვე 7 გოლის გატანა მოახერხე. ალბათ, პლეი-აუტის ბომბარდირობისთვის იბრძოლებ.
_ ვიბრძოლებ, თუმცა მთავარია, ჩემმა გუნდმა მოიგოს _ ბომბარდირობა მეორეხარისხოვანია. რა თქმა უნდა, ვეცდები, რაც შეიძლება მეტი გავიტანო.
_ გიგა, შენ რამდენიმე წამყვანი ქართული კლუბის დაინტერესება გამოიწვიე. “გურიაში” დარჩები თუ კლუბს შეიცვლი?
_ ახლა ამის შესახებ ვერაფერს გიპასუხებთ. მით უფრო, რომ მეც მხოლოდ თქვენსავით მაქვს ინფორმაცია და კონკრეტული წინადადება არ მიმიღია. სეზონის დასრულებას დაველოდოთ. ჯერ მხოლოდ “გურიაზე” ვფიქრობ. ისე, ერთის თქმა ახლავე შემიძლია _ თუ კარგი პირობები იქნა, მირჩევნია აქ დავრჩე. “გურია” ჩემთვის კლუბზე მეტია!
_ უცხოეთში წასვლაზე არასდროს გიფიქრია?
_ მიფიქრია, მაგრამ სიმართლე გითხრა, ამ მხრივ სერიოზული ვარიანტი არც მქონია და მხოლოდ ხელფასის გამო თამაში არ მინდა _ ფეხბურთით უპირველესად უდიდეს სიამოვნებას ვიღებ.
P.S. სამწუხაროდ, “სპარტაკთან” შეხვედრაში გიგამ ტრავმა მიიღო, რომელიც სერიოზული გამოდგა _ კლუბის მთავარი მეგოლე “გურიას” ვერც თბილისში “გაგრასთან” დაეხმარა გუნდს და სავარაუდოდ, ვერც მომდევნო ტურში, სახლში “სიონთან” ითამაშებს.
