ტსპრესს.გე-ს რედაქცია პრეზიდენტის გარემოცვის მიერ, გამოცემის ჟურნალისტ იზა სალაყაიასთვის წართმეული ვიდეოკამერის მეხსიერების ბარათის დაბრუნებას დაუყოვნებლივ ითხოვს და მომხდარ დანაშაულზე რეაგირებისთვის პირადად პრეზიდენტს მიმართავს. ტსპრესს.გე-ს რედაქტორი, ელისო ჯანაშია “გურია ნიუსთან” საუბრისას აცხადებს, რომ ის ყველა კანონიერ გზას მიმართავს, რათა ეს საქმე ბოლომდე მიიყვანოს და რეაგირება მოხდეს იმ ქმედებებზე, რაც მისი ჟურნალისტის მიმართ განხორციელდა.
ტსპრესს.გე-ს წერილები დღეს ერთდროულად შევა ყველა საელჩოში, სახალხო დამცველის აპარატში, საერთაშორისო ორგანიზაციებსა და პრეზიდენტის ადმინისტრაციაში. სახალხო დამცველი და პრეზიდენტი იმედია, ამ წერილებით მაინც შეიტყობენ ამ ორ დღეში რიგით მესამე ჟურნალისტის შეურაცხყოფის ფაქტის შესახებ. იზა სალაყაია მეორე ჟურნალისტია, ვისაც პრეზიდენტის დაცვამ ძალის გამოყენებით სამუშაო მასალა გაუნადგურა. ანალოგიურ ფაქტს გუშინ ადგილი ჰქონდა ქუთაისში, ჟურნალისტ ირაკლი ვაჩიბერაძის მიმართ. როგორც ინტერნეტგამოცემა ტსპრესს.გე-ს კორესპონდენტი იზა სალაყაია ამბობს, ფოთში პრეზიდენტის დაცვის წევრებმა ვიდეოგადამღები და ჩანთა წაართვეს და შენობიდან ძალის გამოყენებით გაიყვანეს. ჟურნალისტი კადრებს იღებდა როგორ ართმევდა პრეზიდენტი მოსახლეობას ხელს და როგორ ესაუბრებოდა მათ. ამ დროს, პრეზიდენტის ადმინისტრაციის თანამშრომელმა ირმა ნადირაშვილმა ჰკითხა რომელი მედიაორგანიზაციიდან იყო. პრესის დამადასტურებელი ბარათი მოთხოვა, რომელიც დაცვამ გამოართვა და ნადირაშვილთან ერთად ტერიტორია დატოვა. როგორც ჟურნალისტი ყვება, ამის შემდეგ პრეზიდენტის დაცვა გადაადგილებას უზღუდავდა და გადაღების უფლებას არ აძლევდა.
„მე გადაღება გავაგრძელე, ამ დროს ჩემთვის უცნობმა პირებმა ორივე მხარეს ხელი მომკიდეს, ტერიტორიიდან ძალით გამიყვანეს და გამეცალნენ. უკან მობრუნებულზე რამდენიმეს ვინც ძალით დამატოვებინა ტერიტორია და ხელს მიშლიდა საქმიანობის განხორციელებაში, ფოტოები გადავუღე.”
პრეზიდენტის სიტყვით გამოსვლის დასრულების შემდეგ, ჟურნალისტს კადრების წაშლა მოთხოვეს, შემდეგ კამერა და ჩანთა წაართვეს, რომელიც რამდენიმე წუთში საავადმყოფოს კიბესთან დატოვეს, თუმცა ვიდეო კამერის აპაარტში ე.წ ჩიპი და მეხსიერების ბარათი აღარ იდო.
„ვინაიდან, პრეზიდენტის დაცვის წევრებსა და ადგილზე მობილიზებულ კუდ-ის თანამშრომლებს ეცვათ ერთნაირი სამოქალაქო ტანსაცმელი, მათი გარჩევა ჩვენი მხრიდან შეუძლებელია. რედაქცია ასევე სამართალდამცავ ორგანოებს დამნაშავის ვინაობის დადგენას თხოვს, რაზეც ადგილობრივ პოლიციას უკვე მიმართა“, _ ნათქვამია რედაქციის მიერ გავრცელებულ მიმართვაში.
ელისო ჯანაშია: “არ არის ჩვეულებრივი შემთხვევეა, როდესაც ჟურნალისტს ხელს უშლიან საქმიანობაში, ეხებიან ხელით, ართმევენ მის პირად ნივთებს, რედაქციის კუთვნილ ვიდეოკამერას და უნადგურებენ მასალას.
მე შემიძლია ეს ყველაფერი კრიმინალურ ქმედებად შევაფასო და ალბათ ამაში ნებისმიერი იურისტი დამეთანხმება და მომხდარს მსგავს კვალიფიკაციას მისცემს.
_ თქვენ წერილის შეტანას აპირებთ პრეზიდენტის ადმინისტრაციაში, რეაგირების იმედი გაქვთ?
_ ეს არ არის პირველი შემთხვევა, როდესაც ჩვენს ჟურნალისტს ხელი შეუშალეს საქმიანობაში და არც მაშინ დამდგარა რაიმე შედეგი. იმიტომ კი არ შეგვაქვს, რომ რეაგირების იმედი გვაქვს. უბრალოდ, ვინაიდან ეს მოხდა პრეზიდენტის ვიზიტის დროს და მისი თანხმლები პირების მიერ, თავს ვალდებულად ვთვლი ჩავაყენო საქმის კურსში. იქნებ მისი მხრიდან მსგავს ქმედებებზე პასუხის გაცემის ერთი პრეცედენტი მაინც დაფიქსირდეს. მე მინდა მივიღო ოფიციალური პასუხი და თანაც ნამდვილად არ მინდა მითხრან, პრეზიდენტი არ იყო საქმის კურში, თორემ ამას უპასუხოდ არ დატოვებდაო. ამ მოტივით შემაქვს განცხადება პრეზიდენტის ადმინისტრაციაში.
_ ადგილობრივ სამართალდამცავ ორგანოებს თუ მიმართეთ და რა რეაგირება მოყვა ამას მათი მხრიდან?
_ პოლიციის უფროსი შემთხვევის ადგილზე იმყოფებოდა, როცა ეს ყველაფერი ხდებოდა, ჟურნალისტს ხელით შეეხნენ და ამ ამბავზე არანაირი რეაგირება არ მოუხდენია. ჩვენ მას მოგვიანებით დავუკავშირდით და გვითხრა, წერილობით მომმართეთო. საჩივრის შეტანას წერილობით ამ დილით ვაპირებთ.
_ პრეზიდენტის ადმინისტრაციის პრესსამსახურს თუ დაუკავშირდით?
_ მთელი ამ ხნის განმავლობაში ვცდილობთ მათთან დარეკვას, მაგრამ არ გვპასუხობენ ან ვერ ვუკავშირდებით, ამიტომ მათი პოზიციის შესახებ ჩვენ არანაირი ინფორმაცია არ გვაქვს. მაგრამ, ნებისმიერ შემთხვევაში, ვაპირებ ამ ამბავს ბოლომდე მივყვე, რადგან არ შეიძლება ასე ხდებოდეს გამუდმებით. ყველაზე აღმაშფოთებელი კი ისაა, რომ ეს ხდება დღისით და მზისით, ყველას თანდასწრებით.
_ ანუ, თვითმხილველებიც ბევრი ჰყავდა ამ ამბავს. ისეთები თუ აღმოჩნდნენ, ვინც დაადასტურებს ამ ფაქტს?
_ ამ შეკრებას ძირითადად პედაგოგები ესწრებოდნენ და ერთ-ერთმა მათგანმა დაგვიდასტურა კიდეც, რაც ძალიან გაგვიკვირდა. ამის ჩანაწერიც გვაქვს. როგორც გავიგეთ, იქ სხვებიც იძახდნენ, _ ჟურნალისტია, თავი გაანებეთო, მაგრამ მათ არავინ მოუსმინა.
_ ანუ თქვენ აპირებთ ბოლომდე ბრძოლას და თქვენი ჟურნალისტის უფლებების დაცვას.
_ რა თქმა უნდა, ბოლომდე ვიბრძოლებ. მივმართავ სახალხო დამცველს, დონორ ორგანიზაციებსა და საელჩოებს.
_ სახალხო დამცველს რაიმე კომენტარი ხომ არ გაუკეთებია მომხდართან დაკავშირებით?
_ არა, არანაირი და ჩვენ ვაპირებთ ოფიციალურად მივმართოთ მას წერილობით. ადრეც იყო მსგავსი ფაქტი ისევ ამ ადამიანთან დაკავშირებით, აეროპორტის გახსნის დროს და არც მას მოჰყოლია რეაგირება. საერთოდ, რატომღაც სახალხო დამცველის ანგარიშებში ვერცერთხელ მოხვდა მსგავსი ფაქტები, ყოველ შემთხვევაში ჩვენ ნამდვილად ვერ მოვხვდით. მე ჩავთვალე, რომ რადგან პირადად არ მივმართე მას, იმიტომ არ მოხდა რეაგირება. მაგრამ, ჩვენ ხომ სულ ვწერთ ამ ყველაფერზე? სახალხო დამცველისთვის საჭირო არ უნდა იყოს, რომ მაინცდამაინც ცხვირწინ დაუდო წერილი! რადგან იწერება ასეთი რამეები, მასზე მყისიერი რეაგირება უნდა მოხდეს ამ კუთხით მე შემიძლია სერიოზული პრეტენზიები გამოვთქვა სახალხო დამცველის მისამართით. მაგალითად შარშან ჩვენი ჟურნალისტის მიმართ პოლიციელის მხრიდან გახორცილდა ფიზიკური ზეწოლა და პროკურატურაში გვაქვს საჩივარი შეტანილი. ამავდროულად გამოვაქვეყნეთ ჩანაწერები, სადაც დაფიქსირებულია ამ პოლიციელის სახე და ეს ყველაფერი არ უნდა დარჩენილიყო სახალხო დამცველის ყურადღების მიღმა. სხვა თუ არაფერი, რეგიონში მყოფ მის წარმომადგენელს მაინც შეეძლო რაიმე სახის რეაგირების მოხდენა და ბოლოსდაბოლოს პოზიციის დაფიქსირება. ამიტომ, ამ ფაქტთან დაკავშირებით პირადად მივმართავ სახალხო დამცველს, იქნებ მისმა გამოხმაურებამ რაიმე სახის ზემოქმედება მოახდინოს.
