დღეს ცნობილი გახდა, რომ “ნეტგაზეთისა” და “ლაივპრესის” რეპორტიორებს ზუგდიდში ჟურნალისტურ საქმიანობაში ხელი შეუშალეს.
“გურია ნიუსის” ინფორმაციით, პროკურატურასთან მისულ “ლაივპრესის” რეპორტიორს თამარ ზანთარაიას და “ნეტგაზეთის” რეპორტიორს ოთო დალაქიშვილს ვიდეოკამერა წაართვეს. მათ მოგვიანებით დაუბრუნეს ვიდეოკამარები, მაგრამ კამერიდან მეხსიერების ბარათი ამოღებული იყო.
“გურია ნიუსის” ინფორმაციით, სახალხო დამცველის აპარატის წარმომადგენლებმა ამ საქმესთან დაკავშირებით უკვე ჩაწერეს ჟურნალისტები, მათ შორის გუშინ დაზარალებული ” ტსპრესს.გე”-ს ჟურნალისტი იზა სალაყაია, რომელსაც პრეზიდენტის დაცვის თანამშრომლებმა ფიზიკური შეურაცხყოფა მიაყენეს და ასევე წაართვეს ვიდეო კამერა.
ჯერჯერობით, სახალხო დამცველის აპარატმა მხოლოდ ირაკლი ვაჩიბერიძის ფაქტზე გაავრცელა განცხადება, სადაც ნათქვამია: “საინფორმაციო საშუალებებით გავრცელდა ინფორმაცია, რომლის თანახმად, 2012 წლის 2 მაისს, ქუთაისის დღესთან დაკავშირებით ლადო მესხიშვილის თეატრში გამართულ ღონისძიებაზე ჟურნალისტთა და მედია საშუალებათა ნაწილი არ დაუშვეს.
ამავე წლის 3 მაისს, საინფორმაციო საშუალებებით გავრცელდა ინფორმაცია, რომლის თანახმად, ქუთაისის ოპერისა და ბალეტის თეატრში, ადგილობრივი თვითმმართველობისა და ,,ნაციონალური მოძრაობის“ აქტივისტებთან შეხვედრაზე არ დაუშვეს ადგილობრივი გაზეთის, ,,P.შ.“-ის ჟურნალისტი ირაკლი ვაჩიბერაძე. მისი განცხადებით, იგი ოთხმა უცნობმა, სამოქალაქო ფორმაში ჩაცმულმა ადამიანმა ცემა და წაართვა აპარატურა, რომელიც მოგვიანებით, ასევე უცნობმა პირმა დაუბრუნა.
საქართველოს სახალხო დამცველმა დაიწყო აღნიშნული ფაქტების შესწავლა. კერძოდ, 2012 წლის 3 მაისს საქართველოს სახალხო დამცველის წარმომადგენლები შეხვდნენ და ახსნა-განმარტებები ჩამოართვეს სააგენტო ,,პირველი“-ს კორესპონდენტ ნოდარ ჯოჯუას, რადიო ,,ძველი ქალაქისა“ და გაზეთ ,,ვერსიას“ ჟურნალისტ თორნიკე ხურციძეს, გაზეთ ,,P.შ“-ის ჟურნალისტ ირაკლი ვაჩიბერაძესა და ტელეკომპანია ,,მეგა-თV“-ის ჟურნალისტ ალეკო გვეტაძეს.
საქართველოს სახალხო დამცველი ახსნა-განმარტებებისა და საქმის გარშემო არსებული მასალის სრულყოფილი შესწავლის შემდგომ მოახდენს შესაბამის რეაგირებას.
