5 მაისს, ოზურგეთის მე-2 საჯარო სკოლის მეთერთმეტე კლასის მოსწავლე გოგონას ლ.წ.-ს მანდატურმა გაკვეთილები დაატოვებინა და სახლში იმ მიზეზით გაუშვა, რომ ის სკოლაში “ქართული ოცნების” წარწერიანი მაისურით მივიდა.
ჩვენი წყაროს ინფორმაციით, მეთერთმეტე კლასის მოსწავლეს ამის გამო პრობლემები შეექმნა: _ სკოლაში დიდი აჟიოტაჟი ამტყდარა, “ქართული ოცნების” მაისური როგორ გაცვიაო. როგორც დ.მ-მ მშობლებს მოუთხრო, მანდატურმა მას ჯერ მაისურის გახდა თხოვა, ან უკუღმა ჩაცმა, “ქართული ოცნების” წარწერა რომ არ გამოჩენილიყო. ბავშვი ამაზე არ დათანხმებულა. მაშინ სახლში წასვლა, გახდა და ისევ მოსვლა “ურჩიეს”. მოსწავლეს ამაზეც სასტიკი უარი განუცხადებია, რადგან ის ოზურგეთის მუნიციპალიტეტიდან მოშორებით, ერთ-ერთი სოფელში ცხოვრობს, რის გამოც ვერ მოახერხებდა სახლში წასვლას და შემდეგ ისევ სკოლაში დაბრუნებას.
ამის შემდეგ, მანდატურს მოუთხოვია, მოსწავლეს გაკვეთილები დაეტოვებინა და სახლში წასულიყო: _ სამინისტროდან დარეკეს და აუცილებლად უნდა წახვიდეო,
“გურია ნიუსი” ამ ფაქტთან დაკავშირებით დ.მ.-ს მშობლებს დაუკავშირდა.
_ თქვენს შვილს, გუშინ, მე-2 საჯარო სკოლაში გაკვეთილები დაატოვებინეს იმის გამო, რომ მას “ქართული ოცნების” მაისური ეცვა. მანდატურმა უთხრა, რომ სამინისტროდან დარეკეს, გაკვეთილები უნდა დატოვოო. რას გვეტყვით ამასთან დაკავშირებით?
_ უთხრეს, რომ ან გაიხადე, ან მაისური შეიბრუნე, ან გაკვეთილები დატოვეო. ბავშვს უთქვამს, მირჩევნია სახლში წავიდეო და წამოვიდა სახლში. მეთერთმეტე კლასელ გოგოს რომ ეტყვი მაისური გაიხადე და შეიბრუნეო, რას იზამდა? მას თავმოყვარეობა აქვს და ამაზე უარი თქვა.
_ ხვალიდან აღარ ჩაიცმევს თქვენი შვილი “ქართული ოცნების” მაისურს?
_ სკოლაში არ უნდა პრობლემები შეექმნას მაისურის გამო. რომ სცოდნოდა, პრობლემები შეექმნებოდა, სკოლაში არ ჩაიცმევდა. მე თუ მკითხავთ, ეს არ იყო საპრობლემო. სკოლაში არა, მაგრამ ქალაქში ნამდვილად ჩაიცმევს. რა, მაისურებს ხომ აქვს სხვადასხვა წარწერები? რა მოხდა _ ეწერა “ქართული ოცნება”.
“გურია ნიუსი” მომხდარ ფაქტთან დაკავშირებით მანდატურების უფროსს აკაკი მდინარაძეს დაუკავშირდა..
_ ბატონო აკაკი, როგორც შევიტყვეთ, მეორე საჯარო სკოლაში მეთერთმეტე კლასის მოსწავლეს მანდატურებმა გაკვეთილები დაატოვებინეს იმის გამო, რომ მას ეცვა “ქართული ოცნების” მაისური, რამდენად კანონიერი იყო მანდატურების ქმედება ამ შემთხვევაში?
_ ასეთი სიტუაციაა… სკოლაში არ შეიძლება არანაირი, გინდა “ქართული ოცნების” იყოს, ან “ნაციონალური მოძრაობის” არანაირი სააგიტაციო რამის, პლაკატის ან მაისურის გამოყენება. იკრძალება წესით და კანონით. ამის შესახებ ყველაფერი წერია კანონში შავით თეთრზე და ეგ იყო, მეტი არაფერი.
_ ანუ მაისურის ჩაცმა აგიტაციაა?
_ რა თქმა უნდა აგიტაციაა, რაც კანონით იკრძალება. დანარჩენთან დაკავშირებით პრესსამსახურს დაუკავშირდით, _ გვითხრა მდინარაძემ.
“გურია ნიუსმა” მეორე საჯარო სკოლის დირექტორთან მარინა ჯაფარიძესთან დაკავშირება ვერ მოახერხა, რადგან მას მას ტელეფონი გამორთული ჰქონდა.
“საერთაშორისო გამჭვირვალობა _ საქართველოს” აღმასრულებელმა დირექტორმა ეკა გიგაურმა “გურია ნიუსთან” საუბრისას განაცხადა, რომ სასწავლო დაწესებულებები აპოლიტიკური უნდა იყოს და იქ ნამდვილად აკრძალულია ნებისმიერი სახის პოლიტიკური ხასიათის აგიტაცია-პროპაგანდა. თუმცა, ეს წესი ყველა პოლიტიკურ სუბიექტზე უნდა ვრცელდებოდეს.
