_ ავტომანქანა “ვაზ 21213” გამგეობის მუნიციპალური ქონების მართვის სამსახურზეა მიმაგრებული; ავტომანქანა “მიცუბიში პაჯერო”-თი მუნიციპალიტეტის გამგებელი, ლელა იმედაშვილი სარგებლობს; ავტომანქანა “ჰონდა”-თი საკრებულოს თავმჯდომარე ანტონ ხუნდაძე; ავტომანქანა “მერსედეს ბენცი-230” გამგეობის მუნიციპალური შესყიდვების სამსახურზეა მიმაგრებული; ამავე სამსახურს ჰყავს ავტომანქანა “ივეკო 65.9”; სამხედრო სამსახურს ავტომანქანა “ტორნეო” ჰყავს; ავტომანქანა “ფორდ ტრანზიტი” კომუნალურ სამსახურს. ამავე სამსახურზეა მიმაგრებული 2 ნაგავმზიდი. ავტომანქანა “ვაზ 2121” მუნიციპალიტეტის გამგებლის მოადგილეს ჰყავს, მხოლოდ ავტობუსი “პაზ 42-34” _ კულტურის ცენტრს.
ამ ჩამონათვალში რატომღაც ვერ მოხვდა მიმდინარე წლის მარტში შეძენილი ჯიპი, რომელშიც 12 500 ლარია გადახდილი. აღნიშნული ინფორმაცია და შესაბამისი დოკუმენტები, ჩვენ შესყიდვების სააგენტოს ოფიციალურ გვერდზე ვიპოვეთ. ჩოხატაურის მუნიციპალიტეტის გამგეობის საჯარო ინფორმაციის გაცემაზე პასუხისმგებელი პირი, თეა უჯმაჯურიძე კითხვაზე, რატომ არ არის ეს ავტომანქანა ჩვენს მიერ მოთხოვნილი საჯარო ინფორმაციის ჩამონათვალში, მით უმეტეს, რომ სატენდერო კომისიის წევრი თავად იყო, ვერ გვპასუხობს.
უცნობია ისიც, ვისთვის შეიძინეს ახალი ავტომობილი, რომელსაც ოფიციალური მონაცემებით 900 000 კილომეტრი აქვს გარბენი, რაც სპეციალისტების თქმით, ძალიან ბევრია, რადგან ამ გარბენის ავტომანქანას, რომლის გამოშვების წელია 2001, ექსპლოატაციის ყოველგვარი ვადა გასული აქვს და მალე გაფუჭდება. ერთადერთი, რაც ამ საკითხთან დაკავშირებით დაზუსტებულია, ის არის, რომ აღნიშნული ავტომანქანა 4 მაისამდე ჩოხატაურში არ გამოჩენილა.
აღსანიშნავია, რომ “მიცუბიში პაჯერო” ჩოხატაურის მუნიციპალიტეტმა 2010 წელს შეიძინა და მასში ხელშეკრულების თანახმად 22 500 ლარი გადაიხადა. თუმცა, ეს ავტომობილი დღეს დაზიანებულია და როგორც ამბობენ, პროფილაქტიკაში უყენიათ.
ჩოხატაურის მუნიციპალიტეტის გამგეობის პრესსამსახურის ხელმძღვანელი, თეონა ჩიგოგიძე პროფილაქტიკის მისამართს ვერ გვეუბნება და აღნიშნავს, რომ მას ამის ცოდნა არ ევალება. ჩოხატაურის მუნიციპალიტეტის გამგეობაში ვერ ვიპოვეთ ადამიანი, რომელსაც ეცოდინება, თუ სად არის ავტომანქანა. იგი ვერც ჩოხატაურში მდებარე პროფილაქტიკებში აღმოვაჩინეთ.
უნდა ითქვას ისიც, რომ ამ ავტომანქანების რემონტზე ათასობით ლარია დახარჯული.
2012 წლის დასაწყისში ჩოხატაურის მუნიციპალიტეტმა გამარტივებული ტენდერი მუნიციპალიტეტის ბალანსზე არსებული ავტომანქანების _ “მიცუბიში პაჯეროს” და “ჰონდას” ავტოტექმომსახურების შესყიდვის მიზნით გამოაცხადა. წელს, შპს “ავტოსატრანსპორტო საწარმო ავტოსერვისთან” გაფორმებული ხელშეკრულების თანახმად, ამ ავტომანქანების ნაწილებისთვის 6 400 ლარი დაიხარჯება. თუმცა, არ არის გამორიცხული ეს თანხა გაიზარდოს.
მუნიციპალიტეტის ბალანსზე არსებული სხვა ავტომობილებისთვის კი “თეგეტა მოტორსიდან” საბურავების შეძენისთვის ბიუჯეტიდან 6 700 ლარი დაიხარჯება. თუმცა, მითითებული არ არის, კონკრეტულად, რომელ ავტომობილებს ესაჭიროება საბურავების გამოცვლა.
“გურია ნიუსმა” ხელისუფლების მიერ დამალული კიდევ ერთი ავტომობილი იპოვა _ “ოპელი”, რომლითაც გამგეობის ინფრასტრუქტურის სამსახურის უფროსი, ლევან ჩხიკვაძე სარგებლობს და რომელიც მუნიციპალიტეტის ბალანსზეა, ჩვენთვის მოწოდებული ნუსხის ჩამონათვალში არ აღმოჩნდა.
ჩვენთან საუბრისას, გამგებლის მოადგილე გია გიორგაძე ადასტურებს, რომ “ოპელი” ნამდვილად მუნიციპალიტეტის ბალანსზეა და ამბობს, რომ ინფორმაციის მოწოდებისას, ალბათ, გამორჩათ(?!). ლევან ჩხიკვაძის თქმით, არსებობს დოკუმენტაცია, სადაც წერია, რომ “ოპელი”, რომლითაც სარგებლობს, გამგეობას ეკუთვნის.
მუნიციპალიტეტის ბალანსზე არსებული ყველა ავტომობილის ნახვა ჩვენ ვერ მოვახერხეთ. სხვადასხვა მიზეზებით ისინი ადგილზე არ აღმოჩნდა.
ჩოხატაურის მუნიციპალიტეტის კულტურის ცენტრის დირექტორის, თამარ კეკელიძის თქმით, მათ სამსახურზე მიმაგრებული ავტობუსი მძღოლის ეზოში დგას: _ ჩვენ გარაჟი არ გაქვს და ამიტომ, ავტობუსი მძღოლთან, ეზოში დგას.
_ ქალბატონო თამარ, ჩვენ გაქვს დაზუსტებული ინფორმაცია, რომ ეს ავტობუსი მძღოლს პირად სარგებლობაში ჰყავდა და ბაზარში ხალხი დაჰყავდა.
_ ერთხელ იყო ასეთი შემთხვევა, თუმცა, ხალხი არ ჰყოლია _ თავად გამოვიდა ავტობუსით. ამის გამო მან საყვედური მიიღო და შემდგომში მსგავსი ფაქტი არ გამეორებულა, _ აღნიშნა ჩვენთან საუბრისას კეკელიძემ.
