ევროპის სახალხო პარტიის პრეზიდენტი ჯოზეფ დოული საქართველოში სტუმრად იმყოფება.
დოული თბილისში წუხელ ჩამოვიდა. ევროპის სახალხო პარტიის პრეზიდენტმა მის მიერ საქართველოს ვიზალიბერალიზაციის საკითხზე რამდენიმე დღის წინ გაკეთებულ განცხადებასთან დაკავშირებით მედიასთან განმარტებაც გააკეთა.
"მოხარული ვარ, რომ საქართველოში ვიმყოფები. მე აქ ჩამოვედი, რადგან ყოველთვის ვთვლიდი, რომ საქართველო არის ქვეყანა, რომელსაც აქვს უფლება და ვალდებულება, რომ ევროკავშირის წევრი გახდეს. ასევე ჩამოვედი იმისთვის, რომ მხარი დავუჭირო ჩვენს პარტიას, "ერთიან ნაციონალურ მოძრაობას". გავიგე, რომ ბევრი რამ ითქვა პრესაში ჩემი ინტერვიუს შესახებ, რომელიც ვიზების ლიბერალიზაციას შეეხებოდა, თქვენ თქვენს საქმეს აკეთებთ ჟურნალისტები და მე სწორედ ასეთი მიყვარხართ, მედიის თავისუფლების გამო. ერთ რამეს მინდა ხაზი გავუსვა. ჩვენი პარტია იყო სწორედ ის, ვინც ყველაზე მეტი იმუშავა საქართველოს ევროკავშირთან დაახლოების და გაწევრიანებისთვის. თქვენ მე არ მიცნობთ, მაგრამ მე გულწრფელი ადამიანი ვარ. გადაწყვეტილება ვიზების ლიბერალიზაციის შესახებ ევროკომისიაში მიღებულია, მაგრამ საბოლოო გადაწყვეტილებამდე ჯერ გარკვეული გზაა გასავლელი: ჯერ ევროკავშირის საბჭომ უნდა მიიღოს გადაწყვეტილება, შემდეგ ევროპარლამენტმა უნდა უყაროს კენჭი. თამასა, რომელიც მთავრობამ დააწესა, ივნისის თვე, ძალიან მაღალია. მე პირველი ვიქნებოდი ამის მომხრე, თუ ეს შესაძლებელია, რომ ვიზების ლიბერალიზაცია მოხდეს, მაგრამ მე არ მინდა იმედების გაცრუება. ჩემი გამოცდილებით, კარგად ვიცი, რომ ხალხი, რომელიც რაღაცას ელოდება, შემდეგ შეიძლება იმედგაცრუებული აღმოჩნდეს. ხალხი უნდა მოვამზადოთ, რომ გადაწყვეტილება ჩვეულებრივი პროცედურის გავლის შედეგად მიიღება. ეს წესი მოქმედებს არა მხოლოდ საქართველოსთან, არამედ სხვა ქვეყნებთან მიმართებითაც. ეს ჩვეულებრივი პროცედურაა და გულისხმობს ევროკავშირის საბჭოს და ევროპარლამენტის მხრიდან გადაწყვეტილებების მიღებას”, – განაცხადა ევროპის სახალხო პარტიის პრეზიდენტმა.
დოულის დღევანდელ ვიზიტს და მის მიერ გაკეთებულ განმარტებას საპარლამენტო უმრავლესობის წევრი ზვიად კავჭანტირაძე ფეისბუქის საკუთარ გვერდზე გავრცელებული პოსტით ეხმაურება. კვაჭანტირაძე მიიჩნევს, რომ "ნაციონალური მოძრაობის" გეგმა -დოული შეეყვანათ შეცდომაში და მისი სახელით დაეშანტაჟებინათ საქართველო – ჩავარდა
"ჟოზეფ დოულის თბილისში ვიზიტის ფარგლებში დღეს გამართული შეხვედრების შედეგების მიხედვით აშკარაა, რომ "ნაციონალების" მიერ დაგეგმილი ავანტურა, ევროპის სახალხო პარტიის თავმჯდომარე შეეყვანათ შეცდომაში და მისი სახელით დაეშანტაჟებინათ ქართველი ამომრჩეველი – ჩ ა ვ ა რ დ ა !
ეს ნაცების მიერ გაკეთებულ პირველივე კომენტარებში აშკარა გახდა და დღეს უკვე ოფიციალურ შეხვედრებზე სტუმარმა აღარ გაიმეორა ის კონკრეტული ფორმულირება, რაც მან ადრე წაიკითხა რუსთავი 2 ის ეთერში და რაც ჩვენ და ოპოზიციური პარტიების წარმომადგენლებმაც კი უმკაცრესად გავაპროტესტეთ.
ხაზგასმით უნდა გავიმეორო, რომ საქართველოს (და არა მხოლოდ ნაცმოს) ძალიან ბევრი მეგობარი ჰყავს ევროპის სახალხო პარტიაში, ისევე, როგორც ამ ოჯახის წევრ სხვა პარტიებში და მათ შორის არიან ევროკავშირის და მისი წევრი ქვეყნების უმაღლესი თანამდებობის პირები და ევროდეპუტატები. ისინი აღნიშნავენ ჩვენი ხელისუფლების და ქვეყნის მიერ მიღწეულ პროგრესს ასოცირების შეთანხმების შესრულებასა და ევროინტეგრაციულ პროცესებში და მტკიცედ უჭერენ მხარს საქართველოსთვის უვიზო მიმოსვლის რეჟიმის უახლოეს მომავალში დაწესებას.
მოვუწოდებ რეაქციონერებს ნაციონალური მოძრაობიდან მომავალში აღარასოდეს იკადრონ და ბოროტად აღარ გამოიყენონ ევროპის სახალხო პარტიის დამსახურებულად მაღალი ავტორიტეტი და მისი წარმომადგენლების ნდობა საკუთარი ავანტურისტული მიზნების მისაღწევად. ყველამ კარგად დაინახა, რომ ისევ თავი შეირცხვინეთ ჩვენი ევროპელი კოლეგების წინაშე, თორემ ქვეყნის შიგნით საკუთარ ავტორიტეტზე ისედაც კარგად უწყით.'"-წერს ზვიად კვაჭანტირაძე.
