ოზურგეთში, დღეს ფაშიმზე გამარჯვების 67-ე წლისთავი, ცნობილი სიმღერის _ “დენ პაბედი”-ს ფონზე დილიდანვე აღინიშნება. გმირთა მოედანზე, ომში დაღუპულთა ობელისკთან ვეტერანებმა, ხელისუფლებისა და საზოგადოების წარმომადგენლებმა კიდევ ერთხელ მიაგეს პატივი გარდაცვლილი მეომრების ხსოვნას.
ზინა სალუქვაძე, ბიბლიოთეკარი: _ სამამულო ომის პერიოდში სკოლაში ვმუშაობდი, პედსასწავლებელში. ბავშვებთან კარგი ურთიერთობა მქონდა _ ჩვენთან ერთად ვაკრეფინებდითYჩაის და მიღებული შემოსავალი ფრონტზე საჩუქრად იგზავნებოდა, სკოლაში ამანათებს ვამზადებდით. ომში ჩემი ძმა და ბიძაშვილი იბრძოდნენ, ერთ-ერთი ლენინგრადში ბლოკადაში იყო და წითელი ვარსკვლავის ორდენი მიიღო, ორივე მათგანი დაბრუნდა. ბედნიერი ვარ, რომ მომავალი თაობა ამ ყველაფერს აფასებს.
ილია ვაშაყმაძე, ოზურგეთის მუნიციპალიტეტის გამგებლის მოვალეობის შემსრულებელი: _ ოზურგეთში 83 ომის ვეტერანია, მათ შორის, ბევრს უკვე ჯანმრთელობის პრობლემები აქვს. დღეს აქ 20-25 ადამიანი მოვიდა. მათ, ტრადიციულად, ოზურგეთის ბიუჯეტიდან 50-50 ლარი ჩაერიცხებათ, თვის ბოლოს კი სახელმწიფოსგან 200 ლარს მიიღებენ.
ყველა ვეტერანს ვულოცავ ფაშიზმზე გამარჯვების დღეს, დღეა, თუმცა, გამარჯვებასა და სიხარულთან ერთად ის ძალიან დიდ ტკივილთან, დანაკარგთან, და ძალიან ბევრ ცრემლთან ასოცირდება _ საქართველოდან 700 000 მეტი ადამიანი წავიდა ომში და ნახევარზე მეტი ვერ დაბრუნდა. ისინი მისაბაძი ხალხია და კიდევ ერთხელ ვუხდი მადლობას!
ალიოშა ცხომელიძე, მეორე მსოფლიო ომის ვეტერანი, მარტოხელა: _ უკმაყოფილო ვარ _ უნდა მეხმარებოდეს ხელისუფლება. ხელისუფლებას არც შეშა მოუცია და არც არაფერი. განცხადებას კი მაწერინებენ, მაგრამ უშედეგოდ.
9 მაისთან დაკავშირებით დღეს, მუნიციპალიტეტის კულტურის სამსახურის ორგანიზებით სახელმწიფო დრამატულ თეატრში ფაშიზმზე გამარჯვების დღისადმი მიძღვნილი ღონისძიება გაიმართა, რომელშიც ადგილობრივი ფოლკლორული და ვოკალური ანსამბლები მონაწილეობდნენ.
