რაც უფრო ახლოვდება საპარლამენტო არჩევნები, მით უფრო აქტიურდება ხელისუფლება _ როგორც ჩვენი წყარო ამბობს, ოზურგეთის მუნიციპალიტეტის სოფლების რწმუნებულებს, სპეციალისტებს, სოფელში მცხოვრებ საჯარო სამსახურში დასაქმებულებს, ოზურგეთის მუნიციპალიტეტის ადმინისტრაციულ შენობაში საკრებულოს თავმჯდომარე, ალეკო მამეშვილი იბარებს და მოახლოებულ არჩევნებთან დაკავშირებით, ფარულ შეხვედრებს უწყობს. ეს შეხვედრები სამუშაო დღეებში ღამით, შაბათ-კვირას კი დღისით ხდება.
6 მაისს, “გურია ნიუსი” თავად შეესწრო, როგორ შევიდნენ ერთ-ერთი სოფლის რწმუნებული, მისი სპეციალისტები, ბაღის გამგე, სკოლის დირექტორი, სოფლის “აქტივისტები” და საჯარო სამსახურში დასაქმებული რამდენიმე მოქალაქე ადმინისტრაციულ შენობაში.
როგორც ჩვენმა წყარომ გვითხრა, შეხვედრა საკრებულოს დარბაზში გაიმართა და საუბარი საარჩევნო თემას ეხებოდა. საკრებულოს თავმჯდომარე მათ ასწავლიდა, რით უნდა მოეხიბლა თითოეულ მათგანს ამომრჩეველი: _ აჩვენეთ ეს გასაკეთებელი პროექტები, ესაუბრეთ, რა გაკეთდა ოზურგეთში, რას ვაკეთებთ და რა უნდა გაკეთდეს, _ უთქვამს საკრებულოს თავმჯდომარეს შეხვედრაზე.
“გურია ნიუსისთვის” ცნობილი გახდა, რომ ოზურგეთის მუნიციპალიტეტის საბიუჯეტო ორგანიზაციების თანამშრომლები ასევე დაიბარეს საკრებულოს თავმჯდომარესთან და მათაც დახმარებას და დაფინანსებას შეჰპირდნენ, სამაგიეროდ არჩევნებზე მათი მხრიდან თანადგომა და დახმარება მოსთხოვეს, რაც, სულ ცოტა, თითოეულისგან მიღებულ 10 ხმაში გამოიხატება.
წყაროს თქმით, ერთ-ერთ საბიუჯეტო სამსახურს, მაგალითად, თეატრს, 5 მილიონი ლარით დახმარებას შეჰპირდნენ, რაც სარეაბილიტაციო სამუშაოებს გულისხმობს, რა თქმა უნდა, ხმების სანაცვლოდ. წყარო ამბობს, რომ ამ შეხვედრაზე ის ადამიანებიც იყვნენ დაბარებული, რომლებიც ოპოზიციურ განწყობაში შეიმჩნევიან: _ დაასაქმეს ამდენი მოქალაქე აიპი-ებში. რისთვის? რას აკეთებენ? რაზე მუშაობენ და ხელფასს რაში იღებენ, უმეტესად, არ იციან. ეს არის მხოლოდ საარჩევნო რეზერვი, ადამიანები, რომლებმაც “დაოთხილმა” უნდა ირბინონ ასე საოცნებო ხმებისთვის. ხმები ახლა ყველაზე მეტად სჭირდებათ ნაციონალებს, ვიდრე ოდესმე დასჭირვებიათ ხელისუფლებაში მოსვლის დღიდან, _ გვითხრა წყარომ.
ოზურგეთის სახელმწიფო თეატრის მმართველი, ზაზა ჯინჭარაძე “გურია ნიუსთან” ინფორმაციას, ხელისუფლებასთან საარჩევნო საკითხზე შეხვედრის შესახებ, კატეგორიულად უარყოფს: _ ვინ გითხრათ ეს? მითხარით და გეტყვით, არის თუ არა მართალი. არანაირი 5 მილიონ ლარზე არ ყოფილა საუბარი, არანაირი საარჩევნო შეხვედრები არ გვქონია ხელისუფლებასთან, ეს თქვა კულტურის მინისტრმა, ჯუმბერ დუნდუას ვარსკვლავის გახსნის დროს. თათბირი ყოველ ორშაბათს ტარდება, დღესაც ვიყავი გამგებელთან.
_ რაზე საუბრობენ თათბირზე?
_ ეს გამგებელს ჰკითხეთ. საუბრობენ ჩვეულებრივ სამუშაო პროცესებზე, _ გვითხრა ჯინჭარაძემ.
ერთ-ერთი სოფლის რწმუნებული “გურია ნიუსთან” იმ დეტალებზე საუბრობს, რაც საკრებულოს თავმჯდომარესა და გამგებელთან შეხვედრაზე გააცნეს:
_ როგორც ვიცით, არასამუშაო დღეს მუნიციპალიტეტის ხელისუფლებასთან შეხვედრები გქონდათ, თუ შეიძლება, გვითხარით, რას ეხებოდა ეს შეხვედრა _ არჩევნებს?
_ უბრალოდ, გაგვაცნეს ოზურგეთში გასახორციელებელი და გახორციელებული პროექტები, პრეზენტაცია იყო. არჩევნები რა შუაშია?!
_ სოფლიდან ვინ ესწრებოდა?
_ შეხვედრას ვესწრებოდით მე, ჩემი თანამშრომლები, სკოლის დირექტორი, ბაღის გამგე, რამდენიმე ისეთი ადამიანი, ვისაც აინტერესებდა, _ გვითხრა რწმუნებულმა.
“გურია ნიუსი”, ამ იდუმალი შეხვედრების შესახებ ინფორმაციის დასაზუსტებლად, ოზურგეთის მუნიციპალიტეტის საკრებულოს თავმჯდომარესთან, ალეკო მამეშვილთან დაკავშირებას ეცდა, თუმცა, უშედეგოდ _ მან ორი დღის განმავლობაში, ჩვენს სატელეფონო ზარებს არ უპასუხა, რაც მეტად საკვირველია, მითუმეტეს მაშინ, როცა გვაქვს ინფორმაცია, რომ იგი საპარლამენტო არჩევნებში მაჟორიტარ კანდიდატად აპირებს კენჭისყრას.
ამის შემდეგ, ალეკო მამეშვილს პრესსამსახურის მეშვეობით, რამდენიმე კითხვით მივმართეთ.
_ ბატონო ალეკო, რატომ არ პასუხობთ “გურია ნიუსის” სატელეფონო ზარებს?
_ ზუსტად ვერ გეტყვით, რომელ გახორციელებულ ზარს გულისხმობთ. სავარაუდოდ, თქვენი დარეკვა დაემთხვა შეხვედრას და მოუცლელობის გამო, ვერ ვუპასუხე ტელეფონს.
_ როგორც ვიცით, ოზურგეთის მუნიციპალიტეტის სოფლების რწმუნებულებს, მათ თანამშრომლებს, სკოლის დირექტორებს, ბაღის გამგეებს და სოფელში მცხოვრებ საჯარო სამსახურში დასაქმებულებს საღამოობით, არასამუშაო დღეებში კი დღისით ხვდებით, რის შემსწრეც თავად გახლდით. როგორც გვითხრეს, გასაკეთებელი პროექტების პრეზენტაცია ხდება, ამასთანავე არის წინასაარჩევნო საუბრები.
_ ჩვენ ვხვდებით მოსახლეობას და ვაცნობთ მათ მუნიციპალიტეტში მიმდინარე, უკვე გახორციელებულ და გასახორციელებელ პროექტებს. მოსახლეობამ უნდა იცოდეს, რა ხდება ჩვენს მუნიციპალიტეტში და რა იგეგმება სამომავლოდ. ჩვენ, ხელისუფლება ვალდებული ვართ, პერიოდულად შევხვდეთ მათ და ანგარიში ჩავაბაროთ.
_ ბატონო ალეკო, როგორც ჩვენი წყარო ამბობს, კენჭი უნდა იყაროთ საპარლამენტო არჩევნებში ოზურგეთის მაჟორიტარ დეპუტატობის კანდიდატი იქნებით. ადასტურებთ თუ არა ამ ინფორმაციას?
_ არა, რა თქმა უნდა, არ ვადასტურებ. ეს ყოველგვარ საფუძველს მოკლებული ჭორია.
