“არ მეგონა თუ საზოგადოებაში ასეთი ტიპის განხილვა საჭირო გახდებოდა” – ბეგლარ სიორიძე

ოზურგეთის "დემოკრატიული ჩართულობის ცენტრში" საქართველოს პარლამენტის ინიციატივით და ქალაქ ოზურგეთის მერიის ორგანიზებით გაიმართა საკონსტიტუციო ცვლილების საჯარო განხილვა ოჯახის დეფინიციასთან დაკავშირებით.

ამ საკითხთან დაკავშირებით პარლამენტარებმა მანანა კობახიძემ, გიორგი ვოლსკიმ და  გია გაჩეჩილაძემ ისაუბრეს. ასევე შეხვედრას ესწრებოდა მსახიობი და რეჟისორი მერაბ თავაძე.

მანანა კობახიძის თქმით,  საქართველოს კონსტიტუციის 36-ე მუხლის პირველი პუნქტი უნდა ჩამოყალიბდეს შემდეგი რედაქციით: "ქორწინება, რომელიც არის ოჯახის შექმნის მიზნით ქალისა და მამაკაცის ნებაყოფლობითი კავშირი, ემყარება მეუღლეთა უფლებრივ თანასწორობას."

როგორც შეხვედრაზე ითქვა, კონსტიტუციის გადასინჯვის კანონპროექტი მიღებულად ჩაითვლება, თუ მას საქართველოს პარლამენტის ორ თანამიმდევრულ სესიაზე სულ ცოტა სამი თვის ინტერვალით მხარს დაუჭერს საქართველოს პარლამენტის სრული შემადგენლობის არანაკლებ სამი მეოთხედი – 113 დეპუტატი.

"თუ არ მოხდა პარლამენტში ამ ცვლილების დამტკიცება, მაშინ რეფერენდუმის გზას გამოვიყენებთ." – თქვა შეხვედრაზე მანანა კობახიძემ.

"არ მეგონა თუ საზოგადოებაში ასეთი ტიპის განხილვა საჭირო გახდებოდა. ოჯახი არის ქალისა და მამაკაცის ერთობა, საზოგადოების უმრავლესობა ამ აზრს უჭერს მხარს და დისკუსიაც შესაბამისად წარიმართა'' – თქვა ქალაქ ოზურგეთის მერმა, ბეგლარ სიორიძემ და  სტუმრებს ერთი კითხვით მიმართა.

"ერთი კითხვა მექნება სტუმრებთან. ვიცი, რომ თქვენ რამდენიმე ქალაქში უკვე ჩაატარეთ შეხვედრა ამ საკითხთან დაკავშირებით. მაინტერესებს, რომელიმე ქალაქში თუ ყოფილა ერთიმო წინააღმდეგე  მაინც ამ ცვლილების?"

"არსად არ ყოფილა წინააღმდეგობა. ხალხს უნდა, რომ ეს ცვლილება მოხდეს" – უპასუხა ბეგლარ სიორიძეს გიორგი ვოლსკიმ.

შეხვედრას, რომელიც საათნახევრის განმავლობაში მიმდინარეობდა, ქალაქ ოზურგეთის მერიის, გურიის გუბერნიის პირველი პირები, საჯარო მოხელეები, ა.(ა).ი.-პ-ების და საზოგადოების წევრები ესწრებოდნენ.