ოზურგეთში, ადმინისტრაციულ შენობაში, საშვს მხოლოდ "გურია ნიუსის" ჟურნალისტებს სთხოვენ
8 მაისს, "გურია ნიუსი" ოზურგეთის მუნიციპალიტეტის გამგეობის ზედამხედველობის სამსახურის მთავარ სპეციალისტთან გურამ ბერძენიშვილთან შეხვედრაზე მივიდა.
შპს "ლიხაურის მეურნეობაში" მოჭრილი ნაძვების თემასთან დაკავშირებული საკითხების დაზუსტება გვსურდა. ადმინისტრაციული შენობის წინ მდგომმა დაცვამ, რა თქმა უნდა, შესვლა საშვის გარეშე აგვიკრძალა. რადგან ხელისუფლებამ ასეთი წესი შემოიღო, დადგენილი წესის სრული დაცვით შევედით ადმინისტრაციულ შენობაში.
ჩვენი იქ ყოფნის დროს, გურამ ბერძენიშვილის სამუშაო კაბინეტში ორი ახალგაზრდა შემოვიდა. "გურია ნიუსის" ყურადღება იმან მიიპყრო, რომ მათ საშვი ხელში არ ეჭირათ. დავინტერესდით და ვთხოვეთ ეჩვენებინათ საშვი. ვერ წარმოგვიდგინეს, რადგან ადმინისტრაციულ შენობაში ისინი ყოველგვარი საბუთის გარეშე შემოუშვეს. კითხვით, _ რატომ შემოვიდნენ ისინი შენობაში საშვის გარეშე _ დერეფანში მდგომ დაცვას მივმართეთ. პასუხი არ ჰქონდათ. ამავდროულად, მეორე სართულზე ასასვლელ კიბეზე ახალგაზრდა მამაკაცი შევნიშნეთ, რომელსაც ასევე ვთხოვეთ საშვის ჩვენება. საბუთი არც მას აღმოაჩნდა, ჩვენ კითხვაზე, _ როგორ მოახერხა შემოსვლა, გვიპასუხა, რომ საშვი არა, მაგრამ პასპორტი ჰქონდა თან. ამ ყველაფრის მომსწრე ოზურგეთის მუნიციპალიტეტის საკრებულოს თავმჯდომარის მოადგილე, ავთანდილ მექვაბიშვილი გახლდათ, რომელიც მეორე სართულიდან ჩამოდიოდა.
ამ დროს, საუბარში დაცვა ჩაგვერთო და განაცხადა, თითქოს ის ახალგაზრდა მამაკაცი შენობაში თავისი ნებით შემოსულა და ზევითაც თავისი ნებით ავიდა. დაცვის განმარტებით, თურმე ერთ-ერთმა სთხოვა, მელოდებიან და უნდა შევიდეო…
მომხდარ ფაქტს თვალყურს ადევნებდა ავთანდილ მექვაბიშვილი. იმ მოქალაქეებზე, რომლებიც ასე თავისუფლად შემოვიდნენ გამგეობის შენობაში, მხოლოდ ჩვენი პროტესტის შემდეგ გამოწერეს საშვები.
ამ ფაქტთან დაკავშირებით, "გურია ნიუსმა" ოზურგეთის მუნიციპალიტეტის საკრებულოს თავმჯდომარეს ალეკო მამეშვილს მიმართა, რომელიც ცხრამაისობის დღესასწაულზე, სიმღერის – "დენ პაბედის" ფონზე ჩავწერეთ კიდეც. მას მოვუყევით იმ ფაქტის შესახებ, რომელსაც ჩვენთან ერთად მისი მოადგილეც შეესწრო. მან მსგავსი ფაქტი დაუჯერებლად მიიჩნია, თუმცა აღიარა, რომ ნამდვილად დარღვევაა თუ ადმინისტრაციულ შენობაში საშვის გარეშე შედის ვინმე,
_ ბატონო ალეკო, რამდენად კანონიერია ის ქმედება, რაც ადმინისტრაციულ შენობაში ჩემი იქ ყოფნისას მოხდა _ თავისუფლად გადაადგილება მხოლოდ "გურია ნიუსის" ჟურნალისტებს გვეზღუდება!
_რა იცით რომ არ ჰქონდათ საშვი? არ არსებობს!
_ არ ჰქონდათ ბატონო ალეკო, არ გჯერათ? ჩანაწერიც გვაქვს და ამ ყველაფერს თქვენი მოადგილე, ავთანდილ მექვაბიშვილი შეესწრო.
_ არ არსებობს! არ მჯერა!
_ ძალიან გთხოვთ, მომისმინეთ…
_ გისმენთ და ვიცი, რომ არ არის ეგეთი ფაქტი. არ შეიძლება
_ როგორ არ არის ბატონო ალეკო? ვიტყუებით? ერთი მოქალაქე კიბეზე საშვის გარეშე ადიოდა, თქვენი მოადგილე შეესწრო…
_ არ შეიძლება, დარღვევაა…
_ კი ბატონო, გეთანხმებით, დარღვევაა.
_ არ შეიძლება, რომ ადიოდეს საშვის გარეშე ვინმე შენობაში, _ გვითხრა საკრებულოს თავმჯდომარემ და ჩქარი ნაბიჯებით დაგვტოვა.
შეგახსენებთ, რომ 2012 წლის 12 მარტს, საკრებულოს თავმჯდომარის მიერ გამოცემული ბრძანებით, ოზურგეთის მუნიციპალიტეტის ადმინისტრაციულ შენობაში დაწესდა პირთა გადაადგილების ახალი წესები. ბრძანების თანახმად, შემოიღეს საშვთა სისტემა. თუმცა, საშვთა სისტემის შემოღება ქცევის ზოგად წესს ადგენს და ნორმატიული აქტით უნდა მიღებულიყო. ბრძანების საფუძველს წარმოადგენდა საკრებულოს დებულების 117-ე მუხლი.
ისაკ ლომთათიძემ, (სახელმწიფო რწმუნებულის გუბერნატორის ადმინისტრაციის ადმინისტრაციული სამსახურის უფროსი), საშვის შემოღებასთან დაკავშირებით "ახალგაზრდა იურისტების" მიერ მოწყობილ მრგვალ მაგიდასთან ასეთი განცხადება გააკეთა: "რაც შეეხება საშვთა ბიუროს ჩამოყალიბებას, ერთი საქმეა, რამდენად მართლზომიერად მოხდა ანუ კანონიერი საფუძველი რა იყო. უკანონობას ამაში, ძალიან რომ გინდოდეთ, ვერ ნახავთ. რაც შეეხება იმას, თუ რეალურად რა მოყვა საშვთა ბიუროს ჩამოყალიბებას, ყველა თქვენთაგანმა იცის, ნებისმიერ ქალაქში, ორგანიზაციაში, სადაც სერიოზული ადმინისტრაციაა განთავსებული(?!), არის გარკვეული ქცევის წესი და გარკვეული ქცევის ნორმა, რომელიც ითვალისწინებს იმას, რომ ადამიანი მოწესრიგებულად განსაზღვრულად, შესაბამისი აღრიცხვის საფუძველზე მივიდეს კონკრეტულ თანამდებობის პირთან. შემდეგ თავისი საქმე გაარკვიოს, ჩამოყალიბდეს, მობრუნდეს უკან და წაბრძანდეს ისევ თავისი გზით. საშვთა ბიუროს შემოღებამდე, ჩვენთან შენობაში თვითნებურად გადაადგილდებოდა მოქალაქეების უმრავლესობა. შეხვდებოდით ადამიანებს, რომლებიც ეკონომიურ საქმიანობასაც კი ეწეოდნენ ადმინისტრაციული შენობის დერეფანში. თუ შეიზღუდა სხვისთვის თვითნებური პარპაში, უფლება გაეზარდა მეორეს, რათა თავისი კანონიერი საქმე თვითმმართველობაში გააკეთოს კანონიერად, ვიდრე აქამდე ჰქონდა. თუკი მიგაჩნიათ, რომ უკანონოა ბრძანება, მიმართეთ შესაბამის ორგანოებს."
